پەريزات قايرات پەن ونىڭ اناسى عايني الاشباەۆاعا قاتىستى اتىشۋلى ءىستىڭ نۇكتەسى قويىلدى. سوت ەكەۋىنە دە ناقتى مەرزىمگە جازا كەستى.

پەريزات قايراتقا الاياقتىق جاساپ، ميللياردتاعان تەڭگەنى زاڭسىز يەمدەندى جانە اسا ءىرى كولەمدە قىلمىستىق جولمەن تابىلعان قارجىنى زاڭداستىردى دەگەن ايىپ تاعىلعان ەدى. ول قازاقتار زارداپ شەككەندەرگە كومەك رەتىندە جيناعان قىرۋار اقشانى جەكە باسىنىڭ يگىلىگىنە جۇمساعان.

سوت شەشىمىمەن پەريزات قايرات 10 جىلعا باس بوستاندىعىنان ايىرىلسا، ونىڭ اناسى عايني الاشباەۆاعا 7 جىل تۇرمە جازاسى كەسىلدى. 

پروكۋرور بۇعان دەيىن پەريزاتقا 10 جىل، اناسىنا 8 جىل جازا سۇراعان بولاتىن.

سۋديا سابىرجان كارىموۆ سوت ۇكىمىن وقىپ، پەريزات قايراتتى قر قىلمىستىق كودەكسىنىڭ 190-بابى 4-بولىگىنىڭ 2-تارماعى («الاياقتىق») جانە 218-بابى 3-بولىگىنىڭ 3-تارماعى («اسا ءىرى كولەمدەگى قىلمىستىق جولمەن تابىلعان قارجىنى زاڭداستىرۋ») بويىنشا كىنالى دەپ تانىدى.

سوت ۇكىمى جاريالانعان بويدا ەكەۋى دە قاماۋعا الىندى.

سونداي-اق سوتتىڭ شەشىمىمەن پەريزات قايرات مەملەكەت تاراپىنان بەرىلگەن «شاپاعات» مەدالىنەن ايىرىلدى. ءىس بويىنشا تاركىلەنگەن بارلىق مۇلىك جابىرلەنۋشىلەرگە كەلتىرىلگەن شىعىندى وتەۋگە جۇمسالادى.

ءىس ماتەريالدارىندا ايتىلعانداي، پەريزات قايرات جينالعان قارجىعا ەليتالى تۇرعىن ۇيلەر، قىمبات اۆتوكولىكتەر مەن زەرگەرلىك بۇيىمدار ساتىپ العان. سوت پروتسەسى ءىشىنارا جابىق فورماتتا ءوتتى.

Abai.kz