ماڭعىستاۋدا كاسىپكەرلىك جانە ساۋدا سالاسىنداعى 156 جوباعا مەملەكەتتىك قولداۋ كورسەتىلدى

اعىمداعى جىلى ماڭعىستاۋ وبلىسىندا كاسىپكەرلىك جانە ساۋدا سالاسىنداعى 156 جوبا مەملەكەتتىك قولداۋعا يە بولدى. ناتيجەسىندە 150 جۇمىس ورنىن ساقتاپ، قوسىمشا 81 جۇمىس ورنىن قۇرۋ جوسپارلانۋدا. بۇل تۋرالى قوعامدىق كوممۋنيكاتسيالار ورتالىعىندا وتكەن بريفينگتە ءوڭىردىڭ كاسىپكەرلىك جانە ساۋدا باسقارماسىنىڭ باسشىسى پىكىر سانسىزباەۆ مالىمدەدى.

ونىڭ ايتۋىنشا، قولداۋعا يە بولعان 111 جوبا سۋبسيديالاۋ قۇرالى ارقىلى، ال 45 جوبا كەپىلدىك بەرۋ قۇرالى ارقىلى جۇزەگە اسىرىلدى.

- جەرگىلىكتى بيۋدجەتتەن الەۋمەتتىك كاسىپكەرلەرگە جانە ء"بىر اۋىل — ءبىر ءونىم" باعدارلاماسىنىڭ فيناليستەرىنە مەملەكەتتىك گرانتتار بەرۋگە قاراجات ءبولىندى. قاراشا ايىندا وتكىزىلگەن كونكۋرستىق راسىمدەردىڭ قورىتىندىسى بويىنشا 20 كاسىپكەردىڭ جوبالارى ماقۇلداندى، سونىڭ ارقاسىندا 50 جاڭا جۇمىس ورنى اشىلادى، — دەپ اتاپ ءوتتى باسقارما باسشىسى.

بريفينگ بارىسىندا پىكىر سانسىزباەۆ وڭىردە الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ بويىنشا شارالار بەلسەندى ىسكە اسىرىلىپ جاتقانىن اتاپ ءوتتى.

-2025-2026 جىلدارداعى كۇزگى-قىسقى كەزەڭدە كوكونىستەردىڭ تۇراقتى جەتكىزىلۋىن قامتاماسىز ەتۋ ءۇشىن ءتورت شارۋاشىلىقپەن فورۆاردتىق كەلىسىمشارتتار جاسالدى. 2000 توننا كارتوپ، 765 توننا ءسابىز جانە 4,5 ميلليون تاۋىق جۇمىرتقاسىن ساتىپ الۋ جوسپارلانۋدا. ءوڭىردىڭ 340 ساۋدا نۇكتەسىمەن الەۋمەتتىك ماڭىزى بار تاۋارلارعا ساۋدا ۇستەمەسىن 15% - دان 10% - عا دەيىن تومەندەتۋ تۋرالى مەموراندۋمدارعا قول قويىلدى. ۇلتتىق ستاتيستيكا بيۋروسىنىڭ مالىمەتىنشە، ماڭعىستاۋ وبلىسى جىل باسىنان بەرى الەۋمەتتىك ماڭىزى بار ونىمدەرگە ەڭ تۇراقتى باعا جاعدايى بار بەس ءوڭىردىڭ قاتارىنا كىرەدى، - دەدى پىكىر سانسىزباەۆ.

Abai.kz