قازاقستانداعى العاشقى اتوم ەلەكتر ستانتسياسىنىڭ قۇرىلىسى رەسمي تۇردە باستالدى.

الماتى وبلىسىنداعى ۇلكەن اۋىلىنىڭ ماڭىندا قازاقستان تاريحىنداعى العاشقى اتوم ەلەكتر ستانتسياسىنىڭ قۇرىلىسىن باستاۋ ءراسىمى ءوتتى.

سالتاناتتى شاراعا قر اتوم ەنەرگەتيكاسى اگەنتتىگىنىڭ باسشىسى الماسادام ساتقاليەۆ، «روساتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچيوۆ جانە باسقا دا رەسمي تۇلعالار قاتىستى.

ەسكە سالايىق، قۇرىلىس الاڭىنا ارنايى تەحنيكا جەتكىزىلىپ، سونداي-اق نوۆوۆورونەج اتوم ەلەكتر ستانتسياسىنىڭ ماكەتى ورناتىلعان. قازاقستاندا سالىناتىن ستانتسيا وسى ۇلگىگە ۇقساس بولادى. ماكەتتە كورسەتىلگەن № 6 ەنەرگوبلوك — الەمدەگى 3+ بۋىنىنا جاتاتىن العاشقى ەنەرگوبلوك.

ءراسىم ۇيىمداستىرىلعان جەردە توپىراق سىناماسىن الۋ ءۇشىن بۇرعىلاۋ جۇمىستارى دا باستالدى. الىنعان كاپسۋلاداعى ۇلگىلەر رەسەي جاعىنا زەرتتەۋ جۇرگىزۋ ءۇشىن تاپسىرىلادى.

قازاقستانداعى العاشقى اتوم ەلەكتر ستانتسياسىنىڭ قۇرىلىسىن اياقتاۋ 2035–2036 جىلدارعا جوسپارلانعان.

بۇعان دەيىن «روساتوم» كومپانياسى قازاقستانداعى العاشقى اتوم ەلەكتر ستانتسياسىن سالۋ جوباسى بويىنشا حالىقارالىق كونسورتسيۋمنىڭ كوشباسشىسى رەتىندە انىقتالعانىن جازعان ەدىك.

Abai.kz