پرەزيدەنت قاسىم-جومارت توقاەۆ اقوردادا حالىقارالىق ءپان وليمپيادالارى جەڭىمپازدارىمەن جانە جۇلدەگەرلەرىمەن كەزدەستى

ءىس-شاراعا 24 لاۋرەات، اتاپ ايتقاندا، 4 التىن، 11 كۇمىس جانە 9 قولا مەدال يەگەرى شاقىرىلدى. وقۋشىلار حيميا، ماتەماتيكا، فيزيكا، گەوگرافيا، ينفورماتيكا جانە بيولوگيا پاندەرىنەن ۇزدىك ناتيجە كورسەتكەن.

پرەزيدەنت جاستاردى، ەڭ الدىمەن، ءبىلىم الەمىندەگى جەڭىستەرىمەن قۇتتىقتاپ، شىنايى ريزاشىلىعىن ءبىلدىردى. ولاردىڭ حالىقارالىق بەدەلدى ءبىلىم سايىستارىندا توپ جارىپ، قازاقستاننىڭ اتىن الەمگە پاش ەتۋىن زور جەتىستىك رەتىندە باعالادى.

– جۇزدەن جۇيرىك، مىڭنان تۇلپار شىعۋ، الەمدىك جارىستا جەڭىسكە جەتۋ وڭاي ەمەس. بىلىمگە دەگەن ۇمتىلىستىڭ، ناعىز ەڭبەكقورلىق پەن تاباندى ءىس-ارەكەتتىڭ ارقاسىندا وسىنداي بيىككە شىعىپ جاتسىزدار. راسىندا، دارىنعا يە بولۋ، بۇل – باقىت. بىراق جاي عانا ەڭبەكسىز دارىن جەتىستىكتىڭ كەپىلى بولا المايدى. دارىننىڭ كوزىن اشۋ كەرەك جانە ونى تولىعىمەن پايدالانا ءبىلۋ قاجەت. ءار جەڭىس، ءار مەدال تىنىمسىز ىزدەنىسپەن، ماڭداي تەرمەن، ۇزدىكسىز دايىندىقپەن كەلەدى، – دەدى مەملەكەت باسشىسى.

پرەزيدەنت شاكىرت قابىلەتىن ۇشتاعان ۇلاعاتتى ۇستازدار مەملەكەتتىك ماراپاتقا لايىق ەكەنىن جەتكىزىپ، وزىق ويلى ۇرپاق تاربيەلەگەن اتا-انالارعا العىس ايتتى. قازاقستاننىڭ بولاشاعى – جاسامپاز جاستاردىڭ قولىندا ەكەنىنە نازار اۋدارىپ، ۇل-قىزدارىمىز ءاردايىم ۇزدىكتەر قاتارىنان تابىلاتىنىن اتاپ ءوتتى.

– جاستارىمىز جاھاندىق سپورت جانە ونەر دودالارىندا جەڭىمپاز اتانىپ، تۋىمىزدى كوكتە جەلبىرەتىپ ءجۇر. ءبىلىم سالاسىنداعى بەدەلىمىز دە ارتىپ كەلە جاتىر. بىلتىردان بەرى وقۋشىلارىمىز 30-دان استام حالىقارالىق وليمپيادا مەن عىلىمي جارىسقا قاتىسىپ، مىڭعا جۋىق مەدال الدى. ونىڭ 200-گە جۋىعى – التىن، 300-دەن استامى – كۇمىس، ال 500-گە جۋىعى – قولا مەدال. بۇل تاماشا كورسەتكىش قازاقستانداعى ءبىلىم ساپاسىنىڭ دەڭگەيى جوعارى ەكەنىن كورسەتەدى. تاعى دا قايتالاپ ايتامىن، ءبىز الەمدىك جارىستا ەل نامىسىن قورعاعان ءار جەڭىمپازدى ماقتان تۇتامىز. سىزدەردى ەلىمىزدىڭ بەتكە ۇستار، لايىقتى ازاماتتارى دەپ سانايمىن. بولاشاقتا دا قازاقستاننىڭ ودان ءارى دامۋىنا قوماقتى ۇلەس قوساتىندارىڭىزعا كامىل سەنەمىن، – دەدى پرەزيدەنت.

قاسىم-جومارت توقاەۆ جاستارعا بارىنشا جاعداي جاساۋ مەملەكەتتىڭ باستى مىندەتىنىڭ ءبىرى ەكەنىنە توقتالدى. بۇل باعىتتا اۋقىمدى ءىس اتقارىلىپ جاتىر. بىراق نەگىزگى جۇمىس ءالى الدا.

– قازىرگى تاڭدا ەلىمىزدىڭ ار ايماعىندا زاماناۋي ۇلگىدەگى «كەلەشەك مەكتەپتەرى» اشىلۋدا. مۇعالىم مارتەبەسىن كوتەرۋگە باسا ءمان بەرىلىپ جاتىر. عىلىم جولىنا تۇسكەن جاستارعا جان-جاقتى قولداۋ كورسەتىلۋدە. بۇل رەتتە «بولاشاق» حالىقارالىق ستيپەندياسى ءتيىمدى ءرول اتقارۋدا. جوبا اياسىندا مىڭداعان جاس ازامات الەمنىڭ وزىق ۋنيۆەرسيتەتتەرى مەن زەرتتەۋ ورتالىقتارىندا ءبىلىم الدى. بۇگىندە ولاردىڭ كوبى ەلىمىزدى وركەندەتۋگە مول ۇلەس قوسۋدا. الدىمىزدا تۇرعان مىندەت – وسى ستيپەندياعا ناعىز قابىلەتتى، دارىندى بالالاردى ىرىكتەۋ. كەزدەيسوق ادامداردى قوسۋعا بولمايدى. سوندىقتان كەلەسى جىلدان باستاپ حالىقارالىق وليمپيادا جەڭىمپازدارىن «بولاشاق» باعدارلاماسى بويىنشا وقۋعا جىبەرۋ تۋرالى شەشىم قابىلداندى. وسىلايشا، ءبىز دارىندى ءارى تالاپتى جاستارعا جان-جاقتى قولداۋ كورسەتە بەرەمىز، – دەدى مەملەكەت باسشىسى.

پرەزيدەنتتىڭ پىكىرىنشە، حالىقارالىق بەدەلدى وليمپيادالارداعى جاستاردىڭ جەتىستىكتەرى ۇلتىمىزدىڭ زياتكەرلىك قۋاتى مەن وسكەلەڭ ۇرپاقتىڭ زور الەۋەتىن تانىتادى.

– ەلىمىزگە عالىمدار، ينجەنەرلەر، پەداگوگتار، دارىگەرلەر مەن باسقا دا جوعارى بىلىكتى ماماندار قاجەت. اسىرەسە، جاساندى ينتەللەكت سالاسىنداعى ماماندار ايرىقشا سۇرانىسقا يە بولادى. يننوۆاتسيا مەن جوعارى تەحنولوگيالار نەگىزىندە ەلىمىزدىڭ الداعى دامۋ كەزەڭدەرىنىڭ بەرىك ىرگەتاسىن قالاپ جاتىرمىز. «روساتوم» كومپانياسىمەن بىرگە سالىناتىن العاشقى اتوم ەلەكتر ستانساسى ستراتەگيالىق ماڭىزعا يە. بىرەر كۇن بۇرىن ونىڭ قۇرىلىسى رەسمي تۇردە باستالدى. اەس ەنەرگەتيكا نىسانى عانا ەمەس، عىلىمي-تەحنيكالىق پروگرەستىڭ جارقىن سيمۆولى بولۋعا ءتيىس. ازىرگە ونىڭ اتاۋى جوق. بۇل ەلىمىزدەگى تۇڭعىش ستانسا بولعاندىقتان، حالىق اراسىندا ۇزدىك اتاۋ جونىندە بايقاۋ جاريالاۋعا بولادى دەپ سانايمىن. وسى سايىسقا قاتىسىپ، شىعارماشىلىق قارىمدارىڭىزدى كورسەتۋگە شاقىرامىن. بالكىم، شەشىم قابىلداعان كەزدە سىزدەردىڭ دە ۇسىنىستارىڭىزعا سۇيەنەرمىز، – دەدى پرەزيدەنت.

مەملەكەت باسشىسى جاستارعا عيبراتتى ءسوزىن ارنادى.

– ءبىز قازىر ءبارىمىز ءبىر ەل بولىپ ادىلەتتى، تازا ءارى قاۋىپسىز قازاقستاندى قۇرىپ جاتىرمىز. بۇل – جاي ساياسي ناۋقان ەمەس. بۇل – مەملەكەتتىلىگىمىزدى نىعايتۋ دەگەن ءسوز. وسى اۋقىمدى جۇمىستى جاستارىمىز ءۇشىن باستادىق. ەندى ونى مىندەتتى تۇردە ورىنداۋىمىز قاجەت. ونىڭ بار يگىلىگىن، ەڭ الدىمەن، وسكەلەڭ ۇرپاق، ياعني، سىزدەر كورەسىزدەر! مەن ەلىمىزدىڭ جاستارىنا زور سەنىم ارتامىن. قازاقستان جاستارى كوزى اشىق، كوكىرەگى وياۋ، ويى ۇشقىر، دارىندى، ەڭبەكقور ازاماتتار دەپ ۇنەمى ايتىپ جۇرەمىن. ۇل-قىزدارىمىز ارقاشان ادال ازامات دەگەن اتقا ساي بولسىن دەپ تىلەيمىن. ەڭ الدىمەن وتانعا، ەلىمىزگە ادال بولىڭىزدار. سىزدەر حالقىمىزدى جەر جۇزىنە زياتكەر ۇلت رەتىندە تانىتىپ جۇرسىزدەر. ءاردايىم ىزدەنىس پەن ەڭبەك جولىندا بولىڭىزدار. وسكەلەڭ ۇرپاق سىزدەرگە – تالانتتى جاستارعا قاراپ بوي تۇزەيدى، – دەدى قاسىم-جومارت توقاەۆ.

مەملەكەت باسشىسى حالىقارالىق جارىستاردا توپ جارىپ، التىن، كۇمىس جانە قولا مەدال يەلەنگەن جاستارعا 1500, 1000 جانە 500 ايلىق ەسەپتىك كورسەتكىش مولشەرىندە قارجىلاي سىياقى سەرتيفيكاتتارىن سالتاناتتى تۇردە تابىستادى.

Abai.kz