2025 جىلعى 5 قىركۇيەكتە حالىقارالىق «قازاق ءتىلى» قوعامىنىڭ ۇيىمداستىرۋىمەن استانا قالاسىنداعى نازارباەۆ ۋنيۆەرسيتەتىندە قازاقستان حالقى تىلدەرى كۇنى مەن ۇلت ۇستازى احمەت بايتۇرسىنۇلىنىڭ تۋعان كۇنىنە ارنالعان «قازاق ءتىلى – عىلىم مەن تەحنولوگيا ءتىلى» تاقىرىبىندا رەسپۋبليكالىق كونفەرەنتسيا ءوتتى.

كونفەرەنتسياعا قر عىلىم جانە جوعارى ءبىلىم ءمينيسترى ساياسات نۇربەك، قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ، «قازاقتەلەكوم» اق باسقارما توراعاسى باعدات مۋسين، شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ باس ديرەكتورى ماقپال جۇماباي، سونداي-اق، عالىمدار مەن ساراپشى ماماندار قاتىستى. ەلىمىزدىڭ بارلىق وڭىرىنەن ءتىل ساياساتىنا جاۋاپتى ماماندار مەن ءبىلىم باسقارمالارىنىڭ وكىلدەرى ونلاين فورماتتا قوسىلدى.

جيىندا عىلىم، ءبىلىم، تەحنولوگيا، ءتىل ساياساتى جانە تسيفرلىق دامۋ سالالارى تالقىلانىپ، مەملەكەتتىك ءتىلدىڭ زاماناۋي عىلىمي-تسيفرلىق كەڭىستىكتەگى ورنى مەن مۇمكىندىكتەرى قاراستىرىلدى.

حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحانۇلى قازاق تىلىندەگى ءماتىندى دىبىسقا اينالدىرۋعا ارنالعان «TTS» (Text-to-Speech) جوباسىن تانىستىردى. بۇل باستاما قازاق ءتىلىنىڭ دىبىستىق قورىن جاساندى ينتەللەكت ەكوجۇيەسىنە ەنگىزىپ، ونى عىلىم مەن تەحنولوگيا سالاسىندا كەڭىنەن قولدانۋعا مۇمكىندىك بەرەدى. قازاقشا دىبىس مودەلى حالىقارالىق Hugging Face پلاتفورماسىندا جاريالانادى.

كونفەرەنتسيا اياسىندا حالىقارالىق «قازاق ءتىلى» قوعامى مەن شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى بىرلەسە وتىرىپ، «ۇلتتىق ديكتانت» جوباسىن رەسمي تۇردە باستادى. جوبانىڭ ماقساتى – جازۋ مادەنيەتىن دامىتۋ، ساۋاتتى جازۋ داعدىلارىن قالىپتاستىرۋ جانە ءتىل ارقىلى ۇلتتىق بىرەگەيلىكتى نىعايتۋ. ديكتانت وفلاين جانە ونلاين فورماتتا وتكىزىلەدى، وعان كەز كەلگەن ازامات قاتىسا الادى.

كونفەرەنتسيانىڭ رەسمي بولىگى اياقتالعان سوڭ قاتىسۋشىلاردىڭ بارلىعى «ۇلتتىق ديكتانتقا» قاتىستى. ديكتانتتى بەلگىلى ديكتور قىمبات دوسجان جۇرگىزدى. ديكتانت ءماتىنى قازاق ادەبيەتى كلاسسيكتەرىنىڭ شىعارمالارىنان تاڭدالدى. قاتىسۋشىلارعا باعا قويىلمايدى، اركىم ءوز ساۋاتتىلىعىن ءوزى تەكسەرەدى.

ونلاين ديكتانتتى www.til.kz پلاتفورماسىنداعى «ۇلتتىق ديكتانت» پاراقشاسىندا كەز كەلگەن ۋاقىتتا كەز كەلگەن جەردە جازۋعا بولادى. قاتىسۋشىلارعا ەلەكتروندى العىس حات پەن KITAP پلاتفورماسىنا تەگىن جازىلىم بەرىلەدى.

«ۇلتتىق ديكتانت» قورىتىندىسى جىل سوڭىنا دەيىن جاريالانىپ، جىل سايىن ءداستۇرلى تۇردە وتكىزىلەدى.

Abai.kz