قازاقستان پرەزيدەنتى قاسىم-جومارت كەمەلۇلى توقاەۆقا!

قۇرمەتتى قاسىم-جومارت كەمەلۇلى!

قازاق حالقىندا «شاڭىراق – شاعىن مەملەكەت» دەگەن ۇلاعاتتى ءسوز بار. وكىنىشكە قاراي، بۇگىندە سول شاعىن مەملەكەتتەردىڭ شاڭىراعى شايقالىپ بارادى.

ناقتى دەرەكتەرگە جۇگىنسەك:

2024 جىلى ەلىمىزدە 123 600 جاس وتباسى شاڭىراق كوتەرسە، ونىڭ 40 500-ءى اجىراسىپ كەتكەن.

ورتا ەسەپپەن كۇن سايىن 110 وتباسى كۇيرەپ جاتىر.

بۇل – كۇن سايىن 110 ءۇيلى ءبىر اۋىلدىڭ جوعالعانىمەن بىردەي.

ەگەر ازاماتتىق نەكەدە تۇرىپ اجىراسقانداردى نەمەسە مەشىتتە عانا نەكەسىن قيىپ، كەيىن اجىراعانداردى قوسساق، بۇل كورسەتكىش بۇدان دا كوپ بولاتىنى انىق.

2022 جىلى 18 جاسقا دەيىنگى بالاسى بار 423 959 جالعىزباستى انا تىركەلگەن.

قازىر ولاردىڭ سانى جارتى ميلليوننان اسىپ وتىر.

ەگەر 18 جاستان اسقان بالاسى بار انالاردى قوسساق، ميلليونعا جۋىقتاۋىمىز مۇمكىن.

بۇگىندە جالعىزباستى انالاردىڭ قولىندا 300 مىڭعا جۋىق بالا ءوسىپ كەلەدى.

بۇل – بەيبىت ەل ءۇشىن اسا اۋىر جاعداي. مۇنداي كورسەتكىش تەك سوعىس بولىپ جاتقان مەملەكەتتەردە كەزدەسەتىن قاسىرەتكە ۇقسايدى.

بالالاردىڭ تاعدىرى

اتا-انانىڭ اجىراسۋى – ەڭ الدىمەن بالاعا اۋىر سوققى.

اكە-شەشەسىنىڭ كەسىرىنەن تىرىدەي جەتىم قالعان ءسابيدىڭ پسيحولوگياسى ءسابي كۇنىنەن بۇزىلادى.

ەلىمىزدە ميلليونعا جۋىق بالا اكەسىز ءوسىپ كەلەدى. بۇل – ۇلتتىڭ بولاشاعىنا تونگەن ۇلكەن قاۋىپ.

اجىراسۋدىڭ سەبەپتەرى

اجىراسۋعا بىرجاقتى ەر نەمەسە ايەل كىنالى ەمەس.

بۇل – قوعام بولىپ ءبارىمىزدىڭ جاۋاپكەرشىلىگىمىز.

وكىنىشكە قاراي، قازىر ۇكىمەت سالدارىمەن كۇرەسىپ ءجۇر، ال نەگىزگى سەبەپتەرى تەرەڭ زەرتتەلمەي وتىر.

سوندىقتان:

سىزدەن ارنايى عىلىمي-زەرتتەۋ كوميسسياسىن قۇرۋدى،

جاس وتباسىلاردىڭ اجىراسۋىنا اسەر ەتەتىن باستى سەبەپتەردى انىقتاپ، سولاردى جويۋعا باعىتتالعان ناقتى شارالاردى قولعا الۋدى سۇرايمىز.

مەكتەپتەن باستاپ «شاڭىراقتى ساقتاۋ» ساباعى ەنگىزىلسىن.

شاڭىراق قورعاۋ جىلى

قۇرمەتتى قاسىم-جومارت كەمەلۇلى!

جاستاردىڭ شاڭىراعى شايقالماۋى ءۇشىن مەملەكەت تاراپىنان كەشەندى ساياسات قاجەت.

قازىر اجىراسۋ پروتسەسى تىم جەڭىلدەتىلىپ جىبەرىلدى – جاستار اشۋمەن ونلاين تۇردە دە نەكەسىن بۇزا سالاتىن جاعدايعا جەتتى.

سونىمەن بىرگە سوڭعى جىلدارى اجىراسقان انالارعا ءتۇرلى جەڭىلدىكتەر قاراستىرىلىپ وتىر. كەيبىر جاستار وسى جەڭىلدىكتەر ءۇشىن دە وتباسىنىڭ قادىرىن اياقاستى ەتىپ وتىر.

وسىعان وراي، سىزدەن:

2026 جىلدى «شاڭىراق قورعاۋ جىلى» دەپ جاريالاۋدى،

جاس وتباسىلاردى قولدايتىن كەشەندى مەملەكەتتىك باعدارلاما قابىلداۋدى سۇرايمىز.

اق نەكە – قاسيەتتى ۇعىم. ونى ويىنعا اينالدىرۋعا جول بەرۋگە بولمايدى.

ءاربىر شاڭىراقتى قورعاۋ – تاۋەلسىزدىكتى ساقتاۋ دەگەن ءسوز.

ۇسىنىس – بىزدەن، ناقتى شەشىم – سىزدەن بولسىن، پرەزيدەنت مىرزا!

قۇرمەتپەن،

جانىبەك سۇيەۋۇلى قوجىق،

ماڭعىستاۋ وبلىسى، وندى اۋىلى

Abai.kz