الماتىدا 19 قىركۇيەكتە وتەتىن Backstreet Boys كونتسەرتىنە دايىندىق قىزۋ ءجۇرىپ جاتىر. كۇزدىڭ ەڭ ءىرى مادەني وقيعالارىنىڭ ءبىرى بولاتىن بۇل شاراعا شامامەن 27 مىڭ كورەرمەن جينالادى دەپ كۇتىلۋدە. وسىعان وراي قالا اكىمىنىڭ ورىنباسارى ازامات قالدىبەكوۆتىڭ توراعالىعىمەن ورتالىق ستاديوندا ارنايى جيىن ءوتتى.

جيىنعا پوليتسيا، تجد، جەدەل جاردەم، كوممۋنالدىق قىزمەت وكىلدەرى، سونداي-اق قالا باسقارمالارى مەن قۇرىلىمدىق بولىمشەلەردىڭ جەتەكشىلەرى قاتىستى. كۇن تارتىبىندە قاۋىپسىزدىك، سانيتاريا، لوگيستيكا جانە تەحنيكالىق جابدىقتاۋ ماسەلەلەرى قارالدى.

كونتسەرت كەزىندە ءتارتىپتى قاداعالاۋ ءۇشىن 2100-دەن استام پوليتسيا قىزمەتكەرى، 500 ۇلتتىق گۆارديا اسكەرى جانە 200 كۇزەتشى جۇمىلدىرىلادى. ءىس-شارا الدىندا كينولوگتار اۋماقتى تەكسەرىپ، ينجەنەرلىك جەلىلەردى باقىلاۋدان وتكىزەدى. كورەرمەندەر مەتالل ىزدەگىش رامالار مەن سكانەرلەر ارقىلى كىرگىزىلەدى.

– اباي داڭعىلى ۋاقىتشا جابىلادى، كولىك كەپتەلىسىنىڭ الدىن الۋ ءۇشىن ارنايى «زمەيكا» تۇرىندەگى تۋرنيكەتتەر قويىلادى. سونىمەن قاتار الىپساتارلىق پەن زاڭسىز اكتسيالارعا قارسى كۇرەس شارالارى كۇشەيتىلەدى، ناقتى الگوريتم دايىن، – دەدى اكىمنىڭ ورىنباسارى ازامات قالدىبەكوۆ.

ول سونىمەن قاتار مەديتسينالىق جانە ءورت قاۋىپسىزدىگىن قامتاماسىز ەتۋدى تاپسىردى: ستاديوندا جەدەل جاردەم كولىكتەرى مەن ءورت ءسوندىرۋ بريگادالارى كەزەكشىلىك ەتەدى، ەۆاكۋاتسيالىق جوسپار ازىرلەنگەن. سانيتارلىق تالاپتارعا دا باسا ءمان بەرىلىپ، اۋماقتى كۇن سايىن تازالاۋ، بيووڭدەۋ جۇرگىزۋ جانە سانيتايزەرلەر ورناتۋ مىندەتتەلدى.

جيىندا ەرىكتىلەردىڭ جۇمىسىنا دا ارنايى توقتالدى. قالالىق جاستار ساياساتى باسقارماسىنىڭ باسشىسى ازيز قاجدەنبەكتىڭ ايتۋىنشا، كونتسەرتكە 150 ەرىكتى تارتىلادى. ولار تەك 18 جاستان اسقان جاستاردان ىرىكتەلەدى، ارقايسىسىنا تەگىن تاماقتانۋ تالوندارى بەرىلەدى.

كونتسەرتتى ۇيىمداستىرۋشى First Media Group كومپانياسىنىڭ باسقارۋشى سەرىكتەسى الفيا نۇرعۇماروۆا الدىڭعى تاجىريبەگە سۇيەنە وتىرىپ، جاڭا شارالار قابىلدانعانىن اتاپ ءوتتى:

– دجەننيفەر لوپەستىڭ كونتسەرتى بىزگە ۇلكەن ساباق بولدى. وسى جولى قاۋىپسىزدىك كۇشەيتىلىپ، جاڭاشىلدىقتار ەنگىزىلەدى. بيلەتتەردى تەكسەرەتىن قىزمەتكەرلەر سانى 100-دەن 150-گە ارتتى. ستاديون اۋماعىنا قوسىمشا بەينەكامەرالار ورناتىلىپ، الاياقتىق ارەكەتتەردى حابارلاۋ ءۇشىن سەنىم تەلەفونى ىسكە قوسىلادى، ءنومىرى LED-ەكرانداردا كورسەتىلەدى. ۆولونتەرلەر سانى دا كوبەيتىلدى. بۇدان بولەك، فۋد-كورت ايماقتارى كەڭەيىپ، كورەرمەندەرگە تەگىن سۋ تاراتىلادى، – دەدى ول.

سونداي-اق، ارتىستەرگە بارلىق جاعداي جاسالادى: ارنايى گريم بولمەلەرى بار شاتىرلى قالاشىق ورناتىلادى. Meet & Greet جانكۇيەرلەرمەن كەزدەسۋ قاراستىرىلماعانىمەن، ستاديون ماڭىندا توپتىڭ رەسمي مەرچ ونىمدەرى ساتىلاتىن ءۇش دۇڭگىرشەك جۇمىس ىستەيدى.

الماتى مادەني ءىس-شارالاردى ۇيىمداستىرۋدا جاڭا دەڭگەيگە كوتەرىلۋدە: قالا «ا» ساناتىنداعى كونتسەرتتەر وتەتىن الاڭعا اينالىپ، ولاردى وتكىزۋدىڭ جاڭا ستاندارتتارىن قالىپتاستىرۋدا — باستى نازار قاۋىپسىزدىككە، كورەرمەندەردىڭ جايلىلىعىنا جانە ۇيىمداستىرۋ ساپاسىنا اۋدارىلۋدا.

ايتا كەتەيىك، Backstreet Boys كونتسەرتى الماتى كۇنىنە وراي ۇيىمداستىرىلىپ وتىر. بۇل مەرەكە جىل سايىن قىركۇيەكتىڭ ءۇشىنشى جەكسەنبىسىندە اتالىپ وتەدى، بيىل ول 21 قىركۇيەككە سايكەس كەلەدى. 

Abai.kz