ەلىمىزدىڭ ۇلتتىق استىق وپەراتورى 30 جىل ىشىندە العاش رەت ارمەنياعا ازىق-تۇلىكتىك بيداي جەتكىزدى. استىق ازەربايجان اۋماعى ارقىلى تاسىمالداندى.

بۇل تۋرالى اۋىل شارۋاشىلىعى مينيسترلىگى مالىمدەدى. 21 قازان كۇنى استانادا وتكەن توقاەۆ پەن اليەۆتىڭ كەزدەسۋىندە ەرەۆان باعىتى بويىنشا جۇك ترانزيتىنە قويىلعان بارلىق شەكتەۋلەردىڭ الىنعانى تۋرالى ايتىلدى.

«ازەربايجان مەن ارمەنيا اراسىنداعى بەيبىت كەلىسىمدەردى قولداۋ ماقساتىندا قازاقستان جاڭا تەمىرجول باعىتىمەن ازىق-تۇلىكتىك بيدايدىڭ پيلوتتىق پارتياسىن جونەلتتى. بۇگىن 15 ۆاگوننان تۇراتىن پويىز ازەربايجان شەكاراسىنان ءوتتى. بىرنەشە كۇننەن كەيىن قازاقستاندىق بيداي ارمەنياداعى دالاريك ستانتسياسىنا جەتكىزىلەدى دەپ جوسپارلانىپ وتىر»، – دەلىنگەن حابارلامادا.

Abai.kz