الماتى قالاسىنداعى س.قوجىقوۆ اتىنداعى №39 ليتسەيدىڭ 5-سىنىپ وقۋشىسى داۋلەن باۋىرجانۇلى – ءوز قاتارلاستارىنىڭ اراسىندا ەرەكشە العىرلىعىمەن جانە ازاماتتىق كوزقاراسىمەن تانىلعان جاس ورەن. 11 جاسار داۋلەن جاقىندا مەملەكەت باسشىسى قاسىم-جومارت توقاەۆقا حات جازىپ، ءوزىنىڭ اسەرى مەن ارمان-تىلەگىن ءبولىستى.

بۇل – داۋلەننىڭ پرەزيدەنتكە جولداعان ءۇشىنشى حاتى. العاشقى حاتىن ول ءبىرىنشى سىنىپتا جازعان ەكەن. سول كەزدە كىشكەنتاي وقۋشى قاتارلاستارىنىڭ كەيدە مەكتەپ اسحاناسىندا تاماقتانۋعا مۇمكىندىگى بولماي قالاتىنىن بايقاپ، سول تۋرالى ءوتىنىش بىلدىرگەن. بالانىڭ شىنايى تىلەگى كوپ ۇزاماي ورىندالدى. 2023 جىلعى 1 قىركۇيەكتەن باستاپ ەلىمىزدەگى باستاۋىش سىنىپ وقۋشىلارى 100 پايىز تەگىن ىستىق تاماقپەن قامتىلدى.

داۋلەننىڭ ەكىنشى حاتى 2024 جىلعى كوكتەمگى سۋ تاسقىنى كەزىندە جازىلعان. ول سول ۋاقىتتا زارداپ شەككەن وڭىرلەرگە كومەكتەسكىسى كەلىپ، ونلاين پلاتفورما ارقىلى ءوز ەڭبەگىمەن تاپقان 25 000 تەڭگەسىن جىلۋ رەتىندە اۋدارعان. بۇل يگى ءىسى مەملەكەت باسشىسىنىڭ نازارىنا ىلىگىپ، داۋلەن پرەزيدەنتتەن العىس حات العان. سول جولى قاسىم-جومارت توقاەۆ وعان ءوزىنىڭ «اكە تۋرالى وي-تولعاۋ» اتتى كىتابىن سىيعا تارتقان ەدى.

جاس وقىرمان بيىل جازدا سىيعا تارتىلعان كىتاپتى وقىپ، جاڭا حاتىندا ودان العان اسەرىن جازعان. ول ءوز سوزىندە:

«جازعى دەمالىستا قالپە اۋىلىنا ارنايى باردىم. ەندى تاربيە ساعاتىندا سول ساپاردان العان اسەرىمدى دوستارىممەن بولىسۋگە دايىندالىپ جاتىرمىن»، – دەپ جازعان.

قازىر ول مۇعالىمىمەن بىرگە سىنىپتاستارى ءۇشىن وسى كىتاپ تۋرالى تولىعىراق بايانداپ بەرۋگە دايىندالىپ جاتىر. ءتىپتى پرەزەنتاتسياسىن ءوزى جاساپ شىعارعان.

داۋلەننىڭ حاتى تەك ريزاشىلىق ەمەس، ويلى ازاماتتىڭ كوزقاراسىن دا بىلدىرەدى. ول پرەزيدەنتتىڭ جولداۋىندا ايتقان جاساندى ينتەللەكت سالاسىنا ەرەكشە قىزىعۋشىلىق تانىتقان. اقپاراتتىق تەحنولوگيانى تەرەڭ ۇيرەنۋ ءۇشىن ارنايى كۋرسقا بارىپ، ءوز ءبىلىمىن جەتىلدىرىپ ءجۇر.

اناسىنىڭ ايتۋىنشا، داۋلەن ەلىمىزدە بولىپ جاتقان جاڭالىقتاردىڭ ءبارىن قالت جىبەرمەيدى. كۇن سايىن جاڭالىقتاردى كورىپ، ەلدەگى وزگەرىستەر مەن باستامالارعا قىزىعۋشىلىقپەن نازار اۋدارادى.

وقۋشى ءبىلىم سالاسىنا دا بەي-جاي قاراماي، ءوز ويىن ءبولىسىپ وتىرادى. جاس بالانىڭ ءوز ورتاسىنا جانى اشيتىن، قوعامداعى ءبىلىم ماسەلەسىنە بەي-جاي قارامايتىن بەلسەندى تۇلعا بولىپ قالىپتاسىپ كەلە جاتقانى قۋانتارلىق جاعداي.

حاتىنىڭ سوڭىندا داۋلەن ءوز ارمانىن دا جاسىرماعان:

«الماتىعا جولىڭىز تۇسسە، ءبىزدىڭ مەكتەپكە شاقىرۋعا رۇقسات ەتىڭىز. ءبىز باقىتتىمىز! سىزگە زور دەنساۋلىق، ەڭبەگىڭىزگە تابىس تىلەيمىن!» – دەپ اياقتاپتى ول.

ەسەپكە جۇيرىك، ىزدەنىمپاز بالا بولاشاعىن عارىش جانە ينجەنەريا سالاسىمەن بايلانىستىرۋدى ارماندايدى. داۋلەن كىتاپ وقۋعا قۇمار، ەلىمىزدىڭ ۇلى تۇلعالارى مەن عالىمدارىنىڭ ءومىر جولىن قىزىعىپ زەرتتەيدى.

بىلىمگە دەگەن ىنتاسى مەن ەلگە دەگەن سۇيىسپەنشىلىگى ونى قاتارلاستارىنا ۇلگى ەتەدى. وسىنداي ۇلتجاندى، ىزدەنىمپاز بالالار - ەلىمىزدىڭ ەرتەڭىنە دەگەن سەنىمنىڭ ايعاعى.

Abai.kz