الماتىدا قوعام بەلسەندىلەرىنىڭ قاتىسۋىمەن لگبت ناسيحاتىنا قارسى ءباسپاسوز كونفەرەنتسياسى ءوتتى.

الماتى قالاسىندا ازاماتتىق بەلسەندىلەر مەن قۇقىق قورعاۋشىلاردىڭ قاتىسۋىمەن «ۇلتقا بالتا شابار لگبت ۇيىمداردىڭ ناسيحاتىنا جول جوق!» اتتى ءباسپاسوز كونفەرەنتسياسى ءوتتى. شارانىڭ ماقساتى - قازاقستان رەسپۋبليكاسى پارلامەنتى ءماجىلىسى دەپۋتاتتارى ۇسىنعان ءداستۇرلى ەمەس جىنىستىق قاتىناستاردى ناسيحاتتاۋعا تىيىم سالۋ تۋرالى زاڭ جوباسىن قولداۋ جانە قوعامدى اقپاراتتاندىرۋ.

ءباسپاسوز جيىنىن قوعام بەلسەندىسى ءارى قۇقىق قورعاۋشى باعيلا بالتاباەۆا ۇيىمداستىردى. ونىڭ ايتۋىنشا، بۇل باستاماعا قازاقستاندىقتاردىڭ باسىم بولىگى قولداۋ ءبىلدىرىپ وتىر.

«2019 جىلدان بەرى قاراي ءبىرجىنىستى قارىم-قاتىناستى قولداۋشىلار ءوز بەلسەندىلىكتەرىن كۇشەيتىپ، ءتۇرلى الاڭداردا جالاۋلارىن كوتەرىپ ءجۇر. بۇل ءبىزدى بەيجاي قالدىرمادى. مەن قوعام بەلسەندىسى ءارى انا رەتىندە مۇنداي ناسيحاتقا قارسى ارەكەت ەتۋگە ءماجبۇر بولدىم. جاستاردىڭ وسىنداي ۇيىمداردىڭ جيىندارىندا جۇرگەنىن كورىپ، ءۇنسىز قالا المادىم. سول سەبەپتى ءداستۇرلى ەمەس قاتىناستاردى ناسيحاتتاۋعا تولىق تىيىم سالۋ ماقساتىندا پەتيتسيا جاريالادىق. ناتيجەسىندە 50 مىڭنان استام قول جينالىپ، ۇسىنىس ۇكىمەتكە جەتكىزىلدى. قازىر ول سەناتتىڭ قاراۋىندا. مەملەكەت باسشىسى قول قويسا، زاڭ تولىق كۇشىنە ەنەدى»، – دەدى باعيلا بالتاباەۆا.

كونفەرەنتسياعا بەلگىلى قوعام قايراتكەرلەرى مەن شىعارماشىل تۇلعالار قاتىسىپ، ءوز پىكىرلەرىن ءبىلدىردى. ولاردىڭ اراسىندا جازۋشى، قازاقستان جازۋشىلار وداعىنىڭ مۇشەسى مارات توقاشباەۆ تا بار.

«ءبىز ەڭ الدىمەن كەلەشەك ۇرپاق ءۇشىن الاڭدايمىز. مەنىڭ 12-13 نەمەرەم بار. سول بالالاردىڭ ۇلتتىق بولمىسقا جات، ارسىز دۇنيەلەردىڭ ىقپالىنا تۇسكەنىن قالامايمىن. ءبىرجىنىستى ۇيىمدار حالىقتىڭ نەبارى 1 پايىزىن قۇرايدى. سول ازشىلىق ءۇشىن قالعان 99 پايىز حالىق زارداپ شەكپەۋگە ءتيىس»، – دەدى ول.

بەلسەندى، قوعام قايراتكەرى شولپان بوستانقىزى دا زاڭنىڭ شىعۋىن قولداپ، بۇل كەلەشەك ۇرپاق ءۇشىن ماڭىزدى تۇيتكىل ەكەنىن باسا ايتتى.

«لگبت وكىلدەرى ءوز قۇقىقتارى تاپتالدى دەپ ءجيى مالىمدەمە جاسايدى. بىراق ءبىز ولاردىڭ جەكە ومىرىنە ارالاسىپ جاتقان جوقپىز. ءبىز تەك ولاردىڭ اشىق تۇردە ناسيحات جۇرگىزۋىنە، كەلەشەك ۇرپاقتىڭ ساناسىن ۋلاۋىنا قارسىمىز. وسىنى دۇرىس تۇسىنگەن ءجون»، – دەپ اتاپ ءوتتى ول.

جيىن بارىسىندا قاتىسۋشىلار الەۋمەتتىك زەرتتەۋلەردىڭ ناتيجەلەرىن دە ۇسىندى. زەرتتەۋلەر قازاقستاندىقتاردىڭ باسىم بولىگى ءداستۇرلى ەمەس قاتىناستارعا قارسى ەكەنىن كورسەتتى. «قازاقستاندىق قوعامدى دامىتۋ ينستيتۋتىنىڭ» دەرەگىنشە، رەسپوندەنتتەردىڭ 90,5 پايىزى گوموسەكسۋالدىق قاتىناستاردى ءوز بالالارىنا قابىلداۋعا دايىن ەمەس ەكەنىن ايتقان. ال حالىقارالىق زەرتتەۋلەردە مۇنداي قاتىناستاردىڭ «اقتالۋ دەڭگەيى» نەبارى 2,2 بالل بولعان.

باعيلا بالتاباەۆانىڭ ايتۋىنشا، زاڭ جوباسى ءسوز بوستاندىعىنا شەكتەۋ ەمەس، قوعام مەن جاستاردىڭ پسيحيكالىق جانە رۋحاني دەنساۋلىعىن قورعاۋعا باعىتتالعان.

«بۇل باستاما ۇلتتىڭ رۋحاني قاۋىپسىزدىگىن قورعاۋعا باعىتتالعان. ماقسات – بىرەۋدى قۋدالاۋ ەمەس، جاستاردىڭ ساناسىن تەرىس ناسيحاتتان ساقتاۋ، – دەدى ول جيىندى قورىتىندىلاي كەلە.

ءداستۇرلى ەمەس جىنىستىق قاتىناستاردى ناسيحاتتاۋعا تىيىم سالۋ تۋرالى زاڭ جوباسى قازىرگى تاڭدا سەنات قاراۋىندا. زاڭ قابىلدانعان جاعدايدا، ول «بالا قۇقىقتارى تۋرالى»، «جارناما تۋرالى»، «ماسس-مەديا تۋرالى» جانە باسقا دا بىرقاتار زاڭدارعا ەنگىزىلمەك.

Abai.kz