باس كولىك پروكۋراتۋراسى «زاڭ مەن ءتارتىپ» تۇجىرىمداماسىن ىسكە اسىرۋ اياسىندا جاڭا تسيفرلىق پروفيلاكتيكا فورماتىن ىسكە قوستى. ەندى قازاقستاندىقتار ءارتۇرلى قۇقىقبۇزۋشىلىقتار تۋرالى – الاياقتىقتان باستاپ ەسىرتكى اينالىمىنا جانە وزگە دە قىلمىستىق سحەمالارعا دەيىن – جەدەل الدىن الۋ اقپاراتىن Egov Mobile جانە InDriver قوسىمشالارى ارقىلى الا الادى.

Egov Mobile قوسىمشاسىنىڭ باستى بەتىنە ارنايى ينتەراكتيۆتى ءبولىم ورنالاستىرىلعان. وسى بولىمگە وتكەن پايدالانۋشىلار پروكۋراتۋرا ورگاندارىنىڭ رەسمي سايتىنا باعىتتالادى. وندا تۇسىندىرمە ماتەريالدار، كەڭ تاراعان قىلمىستىق سحەمالاردان قورعانۋ بويىنشا ۇسىنىمدار، سونداي-اق قىلمىستىق جاۋاپتىلىق تۋرالى مالىمەتتەر جاريالانعان. اقپاراتتىڭ بەرىلۋ فورماتى ونى بارىنشا قولجەتىمدى ءارى تۇسىنىكتى ەتۋگە باعىتتالعان.

وسىعان ۇقساس پروفيلاكتيكالىق باننەرلەر مەن push-حابارلامالار InDriver پلاتفورماسىنا دا ەنگىزىلدى. بۇل اۋديتوريانى ايتارلىقتاي كەڭەيتىپ، الدىن الۋ مازمۇنىن ەلدىڭ كەز كەلگەن وڭىرىندەگى ازاماتتارعا قولجەتىمدى ەتتى.

تسيفرلىق شەشىمدەر پروفيلاكتيكانى جاڭعىرتۋ بويىنشا جۇيەلى جۇمىس اياسىندا جۇزەگە اسىرىلىپ، مەملەكەت باسشىسىنىڭ «زاڭ مەن ءتارتىپ» باستاماسىمەن ۇيلەسىمدە ورىندالۋدا. باستى ماقسات — حالىقتىڭ حاباردارلىعىن ارتتىرۋ، قۇقىقبۇزۋشىلىقتاردىڭ الدىن الۋ جانە وزەكتى ەسكەرتۋلەردى جەدەل تۇردە كەڭ اۋديتورياعا جەتكىزۋ.

پروفيلاكتيكالىق سەرۆيس تاۋلىك بويى جۇمىس ىستەيدى، ال جاڭارتۋلار مەن ەسكەرتۋلەر پايدالانۋشىلارعا تۇرعىلىقتى وڭىرىنە قاراماستان قولجەتىمدى.

Abai.kz