جەتىسۋ وبلىسىندا بوچچا سپورت تۇرىنەن اشىق رەسپۋبليكالىق تۋرنير باستالدى. ەلدىڭ ءار وڭىرىنەن كەلگەن سپورتشىلار شەبەرلىكتەرىن سىناپ، ءوزارا مىقتىنى انىقتاۋدا.

قازىرگى تاڭدا جارىسقا 61 سپورتشى قاتىسۋدا. تۋرنيرگە استانا جانە الماتى قالالارىنان، سونداي-اق اباي، جامبىل جانە جەتىسۋ وبلىستارىنان كوماندالار كەلگەن.

ءتۋرنيردىڭ اشىلۋ سالتاناتىنا جەتىسۋ وبلىستىق ءماسليحاتىنىڭ توراعاسى، جەتىسۋ وبلىسىنىڭ بوچچا فەدەراتسياسىنىڭ پرەزيدەنتى گۇلنار تويلىباەۆا، قازاقستان رەسپۋبليكاسىنىڭ بوچچا فەدەراتسياسىنىڭ ۆيتسە-پرەزيدەنتى اينۋر نۋرحوجاەۆا، جەتىسۋ وبلىسى دەنە شىنىقتىرۋ جانە سپورت باسقارماسىنىڭ باسشىسى، تۇڭعىش «قازاقستان بارىسى» ءتۋرنيرىنىڭ جەڭىمپازى ۇلان رىسقۇل، جەتىسۋ وبلىستىق ءماسليحاتىنىڭ دەپۋتاتى ەلدوس بايالىشباەۆ، وبلىس اكىمىنىڭ الەۋمەتتىك سالا بويىنشا كەڭەسشىسى روزا اكجاركەنوۆا، سونداي-اق جۇمىسپەن قامتۋ جانە الەۋمەتتىك قورعاۋ باعدارلامالارىن ۇيلەستىرۋ باسقارماسىنىڭ باسشىسى ەرمەك ميزامباەۆ قاتىستى.

ايتا كەتەيىك، تۋرنير ەرەكشە قاجەتتىلىكتەرى بار سپورتشىلاردىڭ شەبەرلىگىن شىڭداۋعا جانە وڭىرلەر اراسىنداعى سپورتتىق بايلانىستى نىعايتۋعا باعىتتالعان. جارىس بارىسىندا قاتىسۋشىلار جۇلدەلى ورىندار ءۇشىن تارتىستى باسەكەدە باق سىنايدى.

بوچچا سپورت تۇرىنەن قازاقستان رەسپۋبليكاسىنىڭ سپورت شەبەرى قۋانىش اسقاربەكوۆ مۇنداي تۋرنيرلەردىڭ ماڭىزى زور ەكەنىن اتاپ ءوتتى.

— بۇل جارىس سپورتشىلارعا ءوزارا تاجىريبە الماسۋعا جانە شەبەرلىكتەرىن ارتتىرۋعا مۇمكىندىك بەرەدى. وسىنداي رەسپۋبليكالىق تۋرنيرلەر بوچچا سپورتىن دامىتۋعا ۇلكەن سەرپىن بەرەدى، - دەدى ول.

Abai.kz