تۇركيا رەسپۋبليكاسى جوعارعى سايلاۋ كەڭەسىنىڭ توراعاسى احمەت يەنەر استانا قالاسىنداعى №149 سايلاۋ ۋچاسكەسىنە بارىپ، قازاقستاندا ءوتىپ جاتقان جاڭا كونستيتۋتسيا بويىنشا رەفەرەندۋم تۋرالى پىكىر ءبىلدىردى.

احمەت يەنەر ەڭ الدىمەن قازاقستان حالقىنا سالەم جولداپ، ناۋرىز مەيرامىنىڭ باستالۋىمەن تۇسپا-تۇس كەلگەن امال كۇنىمەن قۇتتىقتادى.

«ەڭ الدىمەن قازاقستان حالقىنا سالەم جولدايمىن. ناۋرىزدىڭ باستاۋى سانالاتىن امال كۇنىنە وراي تۇرىك حالقىنىڭ دا ىستىق سالەمىن جەتكىزگىم كەلەدى. بۇگىن قازاقستاندا ماڭىزدى كۇن – كونستيتۋتسيا بويىنشا رەفەرەندۋم وتۋدە»، – دەدى ول.

ول سونداي-اق ءوزى ارالاعان سايلاۋ ۋچاسكەلەرىندە ازاماتتاردىڭ بەلسەندىلىگى جوعارى ەكەنىن اتاپ ءوتتى. ونىڭ سوزىنشە، داۋىس بەرۋ پروتسەسى جاقسى ءوتىپ جاتىر، ال ۋچاسكە قىزمەتكەرلەرى كاسىبي دايىندىقتان وتكەن.

«ءبىز بارعان سايلاۋ ۋچاسكەلەرىندە حالىقتىڭ قىزىعۋشىلىعى جوعارى ەكەنىن بايقادىق. ۋچاسكە قىزمەتكەرلەرىنىڭ بىزگە دەگەن قارىم-قاتىناسى وتە جاقسى بولدى. بۇل قازاقستاننىڭ ورتالىق سايلاۋ كوميسسياسى شامامەن 70 مىڭعا جۋىق ۋچاسكە قىزمەتكەرىن ساپالى دايىنداعانىن كورسەتەدى. وسى رەتتە وسك توراعاسى نۇرلان ءابدىروۆ پەن ونىڭ جانىنداعى قىزمەتكەرلەرگە العىس ايتقىم كەلەدى»، – دەدى ول.

احمەت يەنەر سايلاۋ ۋچاسكەلەرىندە باقىلاۋشىلاردىڭ دا جۇمىس ىستەپ جاتقانىن ايتىپ، مۇنى دەموكراتيانىڭ ماڭىزدى بەلگىسى دەپ باعالادى.

«قازىرگى ۋاقىتتا داۋىس بەرۋ اشىق ءارى تىنىش جاعدايدا ءوتىپ جاتقانىن كورىپ وتىرمىز. ءبىز العان اقپاراتقا سايكەس، وسى ساتتە سايلاۋشىلاردىڭ قاتىسۋ دەڭگەيى شامامەن 40 پايىزعا جۋىق. بۇل كۇن سوڭىنا قاراي كورسەتكىش 70–75 پايىزدان جوعارى بولۋى مۇمكىن ەكەنىن بىلدىرەدى»، – دەدى ول.

تۇركيا جوعارعى سايلاۋ كەڭەسىنىڭ توراعاسى سونداي-اق قازاقستان مەن تۇركياداعى سايلاۋ جۇيەلەرىن سالىستىرىپ، ەكى ەلدەگى تاجىريبەنىڭ كوپ جاعىنان ۇقساس ەكەنىن اتاپ ءوتتى.

«ءار ەلدىڭ سايلاۋ جۇيەسى ءوز ەرەكشەلىگىنە قاراي قالىپتاسادى. دەگەنمەن جالپى العاندا ەكى ەلدەگى سايلاۋ تاجىريبەسىنىڭ شامامەن 70 پايىزى ۇقساس. مىسالى، مۇندا مۇمكىندىگى شەكتەۋلى ازاماتتارعا داۋىس بەرۋ ءۇشىن بەلگىلى ءبىر ۋاقىتتان كەيىن ۇيلەرىنە بارىپ، داۋىس بەرۋ مۇمكىندىگى جاسالادى. تۇركيادا دا وسىنداي تاجىريبە بار، بىزدە جىلجىمالى سايلاۋ جاشىكتەرى قولدانىلادى. سونىمەن قاتار كورۋ قابىلەتى ناشار ازاماتتارعا ارنالعان ارنايى ترافەرەت ەكى ەلدە دە بار»، – دەدى احمەت يەنەر.

ونىڭ ايتۋىنشا، كەيبىر تەحنيكالىق ايىرماشىلىقتار سايلاۋشىلاردى تىركەۋ جۇيەسىندە عانا كەزدەسەدى. بۇل ءار مەملەكەتتىڭ ءوز زاڭناماسى مەن جاعدايىنا بايلانىستى قالىپتى قۇبىلىس ەكەنىن اتاپ ءوتتى.

احمەت يەنەر رەفەرەندۋم ناتيجەلەرى قازاقستان حالقى مەن ەلدەگى دەموكراتيالىق ۇدەرىستەر ءۇشىن پايدالى بولادى دەگەن سەنىم ءبىلدىردى.

Abai.kz