وتكەندە تۇنگى الماتىدا, ءال-فارابي داڭعىلىندا ورىن العان جول اپاتى كوپشىلىكتى دۇرلىكتىرگەنى جاسىرىن ەمەس. بىرنەشە ادامنىڭ ءومىرىن قيعان بۇل وقيعا تۋرالى العاشلاردىڭ ءبىرى بولىپ اشىق پىكىر بىلدىرگەن زاڭگەر – ادىلەتحان مولداحان ەدى. بۇگىن زاڭگەر مولداحاننىڭ قاماۋعا الىنعانى تۋرالى اقپارات تارادى.

ادىلەتحان اپاتتىڭ ءمان-جايىن جاريالاپ، بىرنەشە ادامنىڭ اتىن اتاعان ەدى. ونىڭ ارىپتەسى نۇرتۋعان ومىرزاق الەۋمەتتىك جەلىدەگى جازباسىندا: «تۇنگى 23:45. ءبىز پوليتسيا دەپارتامەنتىنىڭ الدىنا كەلدىك. ادىلەتحان باۋىرىمىز تەرگەۋگە شاقىرىلدى. ءبىز ادۆوكات كۋالىگىن كورسەتتىك، بىراق ىشكە كىرگىزبەي، ەشقانداي تۇسىنىكتەمە بەرمەي وتىر»، – دەپ جازدى.

سول ءبىر جول اپاتىنان ءۇش ادام قازا تاۋىپ، وقيعا قوعامدا ۇلكەن رەزونانس تۋدىرعان. زاڭگەردىڭ ايتۋىنشا، سول ءتۇنى بىرنەشە اۆتوكولىك، ونىڭ ىشىندە «Zeekr» كولىگى دوستىق داڭعىلىنان باستاپ زاڭسىز جارىس ۇيىمداستىرىپ، ءال-فارابي ارقىلى ساعاتىنا 250 شاقىرىم جىلدامدىقپەن جۇيتكىپ وتكەن. سونىمەن قاتار، كەيبىر كولىكتەردىڭ جالعان نومىرمەن جۇرگەنى انىقتالعان، ولاردىڭ اراسىندا پوليتسيانىڭ جوعارى لاۋازىمدى قىزمەتكەرىنە تيەسىلى بولۋى مۇمكىن كولىكتەر دە بار.

قازىرگى ۋاقىتتا پوليتسيا دەپارتامەنتى زاڭگەردىڭ ۇستالۋى جونىندە رەسمي مالىمدەمە جاساعان جوق. قوعام بۇل وقيعانىڭ جاڭا قىرىن بىلگىسى كەلەدى: زاڭسىز جارىس پەن جول قاۋىپسىزدىگى ماسەلەسى، قۇقىق قورعاۋ ورگاندارىنىڭ ىقتيمال قاتىسى–بارلىعى ءالى تولىق اشىلعان جوق.

Abai.kz