تۇنگى الماتىدا ءال-فارابي داڭعىلىندا ورىن العان جول اپاتى كوپشىلىكتى شوشىتتى. وقيعا كەزىندە بىرنەشە اۆتوكولىك، ونىڭ ىشىندە Zeekr, دوستىق داڭعىلىنان باستاپ زاڭسىز جارىس ۇيىمداستىرىپ، ساعاتىنا 250 شاقىرىم جىلدامدىقپەن جۇيتكىپ وتكەن. اپات سالدارىنان ءۇش ادام قازا تاۋىپ، جاعداي قوعامدا ۇلكەن رەزونانس تۋدىردى. كەيبىر كولىكتەردىڭ جالعان نومىرمەن جۇرگەنى انىقتالىپ، ولاردىڭ ىشىندە پوليتسياعا قاتىستى جوعارى لاۋازىمدى تۇلعالاردىڭ كولىكتەرى بولۋى مۇمكىن ەكەنى ايتىلدى.

بۇل جول اپاتىنا بايلانىستى زاڭگەر ادىلەتحان مولداحان العاش رەت اشىق پىكىر بىلدىرگەن ەدى، الايدا كۇتپەگەن جاعدايعا تاپ بولىپ، ۇستالۋى كوپشىلىكتىڭ نازارىن اۋداردى. ونىڭ ارىپتەسى نۇرتۋعان ومىرزاق الەۋمەتتىك جەلىدەگى جازباسىندا: «تۇنگى 23:45. ءبىز پوليتسيا دەپارتامەنتىنىڭ الدىنا كەلدىك. ادىلەتحان تەرگەۋگە شاقىرىلدى. ادۆوكات كۋالىگىن كورسەتتىك، بىراق ىشكە كىرگىزبەي وتىر»، – دەپ حابارلادى.

قوعامدا قازىر قىزۋ تالقىلانىپ جاتقان تاقىرىپ – ادىلەتحان مولداحاننىڭ ۇستالۋى جانە ونىڭ بۇرىنعى قىزمەتى. Threads الەۋمەتتىك جەلىسىندە ونىڭ بۇرىڭعى ىشكى ىستەر سالاسىنىڭ قىزمەتكەرى بولعانى، كەيىن قىلمىستىق ىسكە بايلانىستى قىزمەتىنەن الىنعانى جونىندە اقپاراتتار تارادى.

ءبىز الماتى قالالىق پوليتسيا دەپارتامەنتىنە رەسمي حابارلاسىپ، ادىلەتحان مولداحان نە ءۇشىن ۇستالعانى، ونىڭ قازىرگى ستاتۋسى جانە بۇرىنعى قىزمەتى تۋرالى سۇرادىق. پوليتسيا دەپارتامەنتى جاۋاپ بەردى:

ادىلەتحان مولداحانعا بۇعان دەيىن كورىنەۋ جالعان اقپارات تاراتۋ دەرەگى بويىنشا سوتقا دەيىنگى تەرگەپ-تەكسەرۋ جۇرگىزىلگەن. كۇدىكتى ۋاقىتشا ۇستاۋ يزولياتورىنا قامالدى، تەرگەۋ امالدارى جالعاسۋدا. ونىڭ بۇعان دەيىن قىلمىستىق جاۋاپكەرشىلىككە تارتىلعانى راستالعان. 2023 جىلى ادامدار توبىمەن بىرلەسىپ، تۇرعىن ءۇي ساتىپ الۋ ءۇشىن اقشا العان ازاماتقا شابۋىل جاساپ، اۆتوكولىگىن توقتاتىپ، ءىرى كولەمدەگى اقشانى زاڭسىز يەمدەنگەنى ءۇشىن سوت ونى پروباتسيالىق باقىلاۋ ارقىلى باس بوستاندىعىن شەكتەۋ تۇرىندەگى جازاعا كەستى. ول ىشكى ىستەر ورگاندارىنان تەرىس سەبەپتەرمەن بوساتىلعان.

پوليتسيا دەپارتامەنتى قۇقىق بۇزۋشىلىققا مۇلدەم توزبەۋشىلىك قاعيداسىن ۇستانىپ، وسىنداي ارەكەتتەر جاساعان تۇلعالاردى قاتارىنان شىعارۋ باعىتىندا جۇيەلى جۇمىستار جۇرگىزىپ وتىرعانىن اتاپ ءوتتى.

Abai.kz