استانا قالاسىنداعى «جاستار» سارايىندا «ەل قورعاۋ – ناعىز ەرلەر ءىسى!» اكتسياسى ءوتتى، دەپ حابارلايدى ەلوردا اكىمدىگىنىڭ رەسمي سايتى.

اسكەري-پاتريوتتىق اكتسياعا قر قورعانىس ءمينيسترىنىڭ ورىنباسارى، استانا قالاسىنىڭ اكىمىنىڭ ورىنباسارى، قر ۇقك شەكارا قىزمەتى باسشىلىعى، استانا قالاسى اكىمدىگىنىڭ باسقارمالارىنىڭ باسشىلىعى، قر قك، قر ۇقك شەكارا قىزمەتى اسكەري قىزمەتشىلەرى مەن ارداگەرلەرى قاتىستى.

قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنە جاس ساربازداردى شىعارىپ سالۋ سالتاناتتى تۇردە ۇيىمداستىرىلدى.

«21 سارباز شىعىس قازاقستان وبلىسى زايسانعا شەكارا قىزمەتىنە بارادى. شەكارا قىزمەتىنە بارۋشىلار ارنايى قاۋىپسىزدىك كوميتەتىنىڭ تالاپتارى بويىنشا ىرىكتەلدى. بۇگىنگى شارانىڭ نەگىزگى ماقساتى مەكتەپ تۇلەكتەرىن اسكەردەن قالماي بارۋعا، ولاردى وتان الدىنداعى بورىشىن وتەۋگە شاقىرامىز. ءىس-شاراعا 700-دەن استام قالا مەكتەپتەرىنىڭ وقۋشىلارى جانە «جاس سارباز» جاسوسپىرىمدەر مەن بالالار اپك تاربيەلەنۋشىلەرى، كۋرسانتتار مەن مەرزىمدى اسكەري قىزمەت قىزمەتشىلەرى قاتىسىپ وتىر»، – دەدى شەكارا قىزمەتى تاربيەلىك-يدەولوگيالىق جانە كادرلىق جۇمىستارى دەپارتامەنتى باسشىسىنىڭ ورىنباسارى بەرىك جيەنباەۆ.

«18 جاسقا كەلگەن جىگىتتەردى اسكەرگە جىبەرەيىن دەپ جينالدىق. جالپى استانا قالاسى بويىنشا 1400 ازامات اسكەرگە شاقىرىلاتىن كورىنەدى. بالالار مىندەتتەرىن ابىرويىمەن اتقارىپ، امان-ەسەن كەلۋىن تىلەيمىن. ەل مەن جەردى قورعاۋ ءاربىر ازاماتتىڭ مىندەتى بولعاندىقتان، ساتتىلىك تىلەيمىن»، – دەدى قالالىق ارداگەرلەر كەڭەسىنىڭ توراعاسى سانسىزباي ەسىلوۆ.

جاستاردى اسكەري پاتريوتتىق تاربيەلەۋ جانە اسكەري قىزمەتتىڭ وڭ بەدەلىن كوتەرۋ ماقساتىندا مەكتەپ وقۋشىلارىنا اسكەري تەحنيكا مەن قارۋ-جاراق تۇرلەرى، كيىم ۇلگىلەرى كورمەسى ۇسىنىلدى. ارنايى كونتسەرتتىك باعدارلاما ۇيىمداستىرىلدى.

Abai.kz