ەلورداداعى «استانا تازالىق» كوممۋنالدىق كاسىپورنى ەنگىزگەن تسيفرلىق شەشىمدەر قازاقستاندا عانا ەمەس، شەتەلدە دە قىزىعۋشىلىق تۋدىرىپ وتىر. تاجىريبە الماسۋ اياسىندا استاناعا قىرعىز رەسپۋبليكاسىنىڭ بىشكەك قالاسىنان كەلگەن دەلەگاتسيا كاسىپورىندا ەنگىزىلگەن تەحنولوگيالىق شەشىمدەرمەن تانىستى، دەپ حابارلايدى قالا اكىمدىگىنىڭ رەسمي سايتى.

ۇسىنىلعان جاڭاشىلدىقتاردىڭ نەگىزگىسى – ەلەكتروندى جول پاراعى. بۇل زاماناۋي جۇيە ارنايى تەحنيكانىڭ جۇمىسىن ناقتى ۋاقىت رەجيمىندە باقىلاۋعا مۇمكىندىك بەرەدى. ياعني، تەحنيكانىڭ قوزعالىس باعىتى، اتقارىلعان جۇمىس كولەمى جانە ماتەريال شىعىنى تولىق قاداعالانادى.

«استانا تازالىق» جشس-ءنىڭ باس ديرەكتورى زامير ساعىنوۆتىڭ ايتۋىنشا، تسيفرلاندىرۋ – كاسىپورىن دامۋىنىڭ ستراتەگيالىق باعىتى.

«بۇگىندە تسيفرلىق شەشىمدەر تەك باقىلاۋ قۇرالى عانا ەمەس، ءتيىمدى باسقارۋدىڭ نەگىزىنە اينالدى. ولار پروتسەستەردىڭ اشىقتىعىن ارتتىرىپ، رەسۋرستاردى وڭتايلاندىرۋعا جانە قالالىق ينفراقۇرىلىمنىڭ تۇراقتى جۇمىسىن قامتاماسىز ەتۋگە مۇمكىندىك بەرەدى»، – دەدى ول.

قازىرگى تاڭدا جۇيە 393 ارنايى تەحنيكاعا ەنگىزىلىپ، جوعارى ناتيجە كورسەتىپ وتىر.
ەسەپتىلىكتى اۆتوماتتاندىرۋ:
• جول پاراعىن راسىمدەۋ ۋاقىتى 10 مينۋتتان 1 مينۋتقا دەيىن قىسقاردى;
• مەديتسينالىق تەكسەرىستە ادامي فاكتورلار جويىلىپ، تەحنيكانى ىسكە قوسۋ قاۋىپسىزدىگى ارتتى.

جانار-جاعارماي شىعىنىنىڭ اشىقتىعى:
• وتىن دەڭگەيى مەن بوس ءجۇرىس داتچيكتەرىن باقىلاۋ ارقىلى جىلىنا 10%-عا دەيىن ۇنەم جاسالادى;
• تەحنيكانى ماقساتسىز پايدالانۋ دەرەكتەرى ءىس جۇزىندە جويىلعان.

مارشرۋتتاردى وڭتايلاندىرۋ جانە تيىمدىلىكتى ارتتىرۋ:
• ناقتى ۋاقىتتاعى دەرەكتەردىڭ ارقاسىندا باسقارۋشىلىق شەشىمدەر قابىلداۋ جىلدامدىعى 15%-عا ارتتى;
• «ءوتىنىم – ورىنداۋ – اكت» تىزبەگىنىڭ اشىقتىعى ءتارتىپتى كۇشەيتىپ، داۋلى جاعدايلاردى ازايتتى.

بۇل جۇيەگە دەگەن قىزىعۋشىلىق ارتىپ كەلەدى. وسىعان دەيىن ونى الماتى قالاسىنىڭ كوممۋنالدىق قىزمەت وكىلدەرى زەرتتەگەن، قازىرگى تاڭدا ەنگىزۋ جۇمىسى باستالىپ كەتتى.

رەسپۋبليكا بويىنشا جولداردى كۇتىپ ۇستاۋعا جاۋاپتى «قازاۆتوجولسەرۆيس» كاسىپورنى دا ەلەكتروندى جول پاراعى جۇيەسىن بەلسەندى تۇردە ەنگىزىپ جاتىر. سونىمەن قاتار، وبلىستىق جانە قالالىق اكىمدىكتەرمەن، كوممۋنالدىق مەكەمەلەرمەن كەلىسسوزدەر جۇرگىزىلۋدە.

قىزمەتكەرلەردىڭ قاۋىپسىزدىگىنە دە ەرەكشە نازار اۋدارىلعان. كاسىپورىندا «Med365» جانە «Adal Check» جۇيەلەرى قولدانىلادى، ولار كۇندەلىكتى مەديتسينالىق تەكسەرىستەن ءوتۋدى ونلاين باقىلاۋعا مۇمكىندىك بەرەدى.

بۇدان بولەك، ارنايى تەحنيكا جۇرگىزۋشىنىڭ جاعدايىن باقىلايتىن جۇيەلەرمەن جابدىقتالعان. كامەرالار قاۋىپسىزدىك تالاپتارىنىڭ ساقتالۋىن، مارشرۋتتان اۋىتقۋدى جانە شارشاۋ بەلگىلەرىن تىركەپ، ىقتيمال قاۋىپتەر تۋرالى جەدەل ەسكەرتۋ جاسايدى.

«استانا تازالىق» تسيفرلىق شەشىمدەردى ەنگىزۋدى جالعاستىرىپ، كوممۋنالدىق ينفراقۇرىلىمدى باسقارۋدىڭ زاماناۋي ءارى ءتيىمدى ۇلگىسىن قالىپتاستىرىپ كەلەدى.

Abai.kz