استانا تۇرعىندارىنا جاڭا الاياقتىق ايلا-شارعىلار تۋرالى ەسكەرتۋ جاسالدى. بۇل تۋرالى قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ كوميتەتىنىڭ قوعامدىق قاۋىپسىزدىك قاتەرلەرى مەن تاۋەكەلدەرىن بولجاۋ ورتالىعى حابارلادى.

قاسكويلەر مەسسەندجەرلەر مەن SMS ارقىلى «جەتكىزىلمەگەن سالەمدەمە» تۋرالى جالعان حابارلامالاردى جاپپاي تاراتىپ جاتىر، دەپ حابارلايدى ەلوردا اكىمدىگىنىڭ رەسمي سايتى.

العاش قاراعاندا مۇنداي حابارلامالار زيانسىز كورىنەدى جانە كۋرەرلىك قىزمەتتەردىڭ ادەتتەگى ەسكەرتۋلەرىنە ۇقسايدى.

حابارلامادا كۋرەر سالەمدەمەنى جەتكىزە الماعانى ايتىلىپ، قايتا جەتكىزۋدى راسىمدەۋ ءۇشىن ارنايى سىلتەمەگە ءوتۋدى ۇسىنادى.

الايدا كورسەتىلگەن سىلتەمە لوگيستيكالىق كومپانيالاردىڭ رەسمي سايتتارىنا ۇقساتىپ جاسالعان جالعان سايتقا اپارادى.

وندا پايدالانۋشىدان جەكە دەرەكتەرىن – اتى-ءجونى، جسن، تۇرعىلىقتى مەكەنجايى، سونداي-اق جەتكىزۋدى قايتا راسىمدەۋ ءۇشىن از مولشەردە تولەم ەنگىزۋ سۇرالادى.

بۇل مالىمەتتەردى ەنگىزىپ، تولەم جاساعاننان كەيىن الاياقتار قۇپيا اقپارات پەن بانك دەرەكتەرىنە قول جەتكىزەدى. بۇل قارجىلىق شىعىندارعا عانا ەمەس، جەكە دەرەكتەردىڭ باسقا دا قىلمىستىق سحەمالاردا پايدالانىلۋىنا اكەلۋى مۇمكىن.

الاياقتاردىڭ قۇربانى بولماس ءۇشىن مىناداي قاراپايىم، بىراق ماڭىزدى ساقتىق شارالارىن ساقتاۋ قاجەت:
• ەگەر جەتكىزىلىم كۇتپەسەڭىز، مەسسەندجەرلەر مەن SMS-تەگى سىلتەمەلەرگە وتپەڭىز;
• سايتتىڭ مەكەنجايىن مۇقيات تەكسەرىڭىز – الاياقتىق رەسۋرستار كوبىنە ءبىر-ەكى ارىپپەن نەمەسە بەلگىلەرمەن عانا ەرەكشەلەنەدى;
• كۇماندى سايتتارعا جەكە جانە بانك دەرەكتەرىن ەنگىزبەڭىز;
• جەتكىزىلىم ستاتۋسىن تەك رەسمي سايتتار مەن قوسىمشالار ارقىلى تەكسەرىڭىز;
• كۇماندى حابارلامالاردى ەلەمەي، ولاردى بۇعاتتاڭىز.

الاياقتار ازاماتتاردىڭ سەنگىشتىگىن جانە جەتكىزىلىم تۋرالى حابارلامالارعا جىلدام ارەكەت ەتۋ ادەتىن بەلسەندى پايدالانادى.

سوندىقتان مۇنداي سحەمالار تەز تارالىپ، كەز كەلگەن ادامعا قاۋىپ ءتوندىرۋى مۇمكىن. تسيفرلىق ورتادا ساقتىق تانىتۋ – قارجىلىق شىعىن مەن جەكە دەرەكتەردىڭ تارالۋىنان قورعانۋدىڭ ەڭ ءتيىمدى جولى

Abai.kz