استانادا دۇنيەجۇزىلىك دەنساۋلىق ساقتاۋ كۇنىنە وراي جانە «تازا قازاقستان» رەسپۋبليكالىق ەكولوگيالىق اكتسياسى اياسىندا ءبىلىم بەرۋ ۇيىمدارىندا بىرىڭعاي فورماتتا تاربيەلىك ءمانى بار ءىس-شارالار وتكىزىلىپ جاتىر، دەپ حابارلايدى ەلوردا اكىمدىگىنىڭ رەسمي سايتى.

سونىڭ ءبىرى بالالارعا قوسىمشا ءبىلىم بەرۋ وقۋ-ادىستەمەلىك ورتالىعىنىڭ ۇيىمداستىرۋىمەن ەلوردانىڭ №101 جالپى ورتا ءبىلىم بەرەتىن مەكتەبىندە جالعاستى.

ۇيىمداستىرۋشىلاردىڭ ايتۋىنشا، بۇل باستاما جاس ۇرپاقتىڭ دەنساۋلىعىنا دەگەن جاۋاپكەرشىلىگىن ارتتىرىپ قانا قويماي، ولاردىڭ ەكولوگيالىق مادەنيەتىن دامىتۋعا جانە قوعامدا تازالىق قۇندىلىقتارىن كەڭىنەن ناسيحاتتاۋعا مۇمكىندىك بەرەدى.

بىرىڭعاي فلەشموب بارىسىندا وقۋشىلار تازالىق پەن سالاۋاتتى ءومىر سالتىن دارىپتەيتىن ءتۇرلى سپورتتىق بي قويىلىمدارىن قويىپ، ۇجىمدىق ارەكەتتەر ۇيىمداستىردى.

ايتا كەتەيىك، مۇنداي ءىس-شارا جاس ۇرپاقتى دەنى ساۋ، سانالى جانە قورشاعان ورتاعا جاناشىر ازامات رەتىندە تاربيەلەۋگە باعىتتالعان ماڭىزدى قادامداردىڭ ءبىرى.

Abai.kz