ۇلتتىق قاۋىپسىزدىك كوميتەتىنىڭ (ۇقك) بۇرىنعى توراعاسى كارىم ءماسىموۆتىڭ بۇرىنعى كۇيەۋ بالاسى دەلىنەتىن «قازتەمىرترانس» اق-نىڭ ەكس-ۆيتسە-پرەزيدەنتى ازامات كاپەنوۆكە ىزدەۋ جاريالانىپ، سىرتتاي قاماۋعا الىندى، دەپ حابارلايدى اگەنتتىك ءتىلشىسى.

«قازاقستان رەسپۋبليكاسىنىڭ قارجىلىق مونيتورينگ اگەنتتىگى لاۋازىمدىق وكىلەتتىكتەرىن اسىرا پايدالاندى جانە اقشالاي قاراجاتتى جىمقىردى دەپ كۇدىكتەلگەن «قازتەمىرترانس» اق بۇرىنعى ۆيتسە-پرەزيدەنتى ا.ا. كاپەنوۆكە قاتىستى سوتقا دەيىنگى تەرگەپ-تەكسەرۋ امالدارىن جۇرگىزىپ جاتىر. (...) قازىرگى ۋاقىتتا ا.ا. كاپەنوۆكە حالىقارالىق ىزدەۋ جاريالاندى. سوت ونى قاماۋدا ۇستاۋ تۇرىندەگى بۇلتارتپاۋ شاراسىن سىرتتاي سانكتسيالادى»، - دەپ حابارلادى قارجىلىق مونيتورينگ اگەنتتىگىنىڭ (قما) ءباسپاسوز قىزمەتى.

تەرگەۋ مالىمەتىنشە، كاپەنوۆ قىزمەتتىك وكىلەتتىگىن اسىرا پايدالانا وتىرىپ، جۇك ۆاگوندارىمەن وپەراتورلىق قىزمەت كورسەتۋ كەزىندە وزىنە قاتىسى بار كومپانيالارعا نەگىزسىز ارتىقشىلىقتار بەرگەن.

قما دەرەكتەرى بويىنشا، مۇنداي ارەكەتتەردىڭ سالدارىنان «قازتەمىرترانس» اق-عا 5,2 ملرد تەڭگەدەن استام شىعىن كەلتىرىلگەن.

«كەلتىرىلگەن شىعىندى وتەۋ جانە زاڭسىز يەمدەنىلگەن اكتيۆتەردى قايتارۋ ماقساتىندا باس كولىك پروكۋراتۋراسى «دوستىق» ستانتسياسىنداعى تەرمينالدى سوتقا دەيىن تاركىلەۋ تۋرالى ءوتىنىشحات جولدادى. استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ قاۋلىسىمەن اتالعان مۇلىك مەملەكەت مەنشىگىنە ءوتتى»، — دەپ تولىقتىردى اگەنتتىك وكىلدەرى.

ءىس بويىنشا تەرگەۋ جالعاسۋدا.

قر قىلمىستىق-پروتسەستىك كودەكسىنىڭ 201-بابىنا سايكەس وزگە مالىمەتتەر جاريا ەتۋگە جاتپايدى.

Abai.kz