قۇرمەتتى قازاقستاندىقتار!

قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا جول-كولىك وقيعالارى سالدارىنان بالالاردىڭ قازا بولۋى مەن جاراقات الۋ جاعدايلارىنىڭ جيىلەپ كەتۋىنە الاڭداۋشىلىق بىلدىرەدى.

جاز مەزگىلىندە بالالار ۇيدەن تىس جەردە كوبىرەك ۋاقىت وتكىزەدى. ولار كوشەدە، اۋلادا، سپورت جانە ويىن الاڭدارىندا بولادى، ۆەلوسيپەد، ساموكات تەبەدى، دەمالىس ورىندارىنا بارادى، ساياحاتتايدى.

سوندىقتان ءدال وسى كەزەڭدە بالالاردىڭ قاۋىپسىزدىگى ەرەسەكتەردىڭ قىراعىلىعى مەن جاۋاپكەرشىلىگىنە تىكەلەي بايلانىستى.

وسىعان بايلانىستى ۇلتتىق كوميسسيا اتا-انالاردى، جۇرگىزۋشىلەردى جانە بارشا ازاماتتاردى الداعى جازعى دەمالىس كەزىندە بالالاردىڭ ءومىرى مەن دەنساۋلىعىنا ەرەكشە جاۋاپكەرشىلىكپەن قاراۋعا شاقىرادى.

سۋرەت: ultcom.kz سايتىنان الىندى.

قۇرمەتتى اتا-انالار!

بالالارىڭىزبەن جولدا، اۋلادا، سۋ ايدىندارى ماڭىندا جانە تابيعات اياسىندا ءوزىنقاۋىپسىز ۇستاۋ قاعيدالارى تۋرالى سويلەسىڭىزدەر. بۇل ەرەجەلەردى ۇنەمى ەستەرىنە سالىپ وتىرىڭىزدار.

بالالارعا جولدا اسا مۇقيات بولۋ قاجەتتىگىن تۇسىندىرىڭىزدەر. جولدى تەك جاياۋ جۇرگىنشىلەر وتكەلىمەن جانە قاۋىپسىزدىگىنە كوز جەتكىزگەننەن كەيىن عانا كەسىپ ءوتۋ قاجەت. ال وتكەلدەن وتپەس بۇرىن مىندەتتى تۇردە ۆەلوسيپەدتەن نەمەسە ساموكاتتان ءتۇسۋ كەرەك.

سۋرەت: ultcom.kz سايتىنان الىندى.

ۆەلوسيپەد، ساموكات نەمەسە روليك تەپكەن كەزدە بالالاردىڭ قورعانىش قۇرالدارىن پايدالانۋىن قامتاماسىز ەتىڭىزدەر.

ۇيدەگى قاۋىپسىزدىك ماسەلەسىنە دە ەرەكشە نازار اۋدارىڭىزدار. تەرەزەلەردى قورعانىش قۇرىلعىلارىنسىز اشىق قالدىرماڭىزدار، بالانىڭ قۇلاپ كەتۋىنە اكەلۋى مۇمكىن جاعدايلارعا جول بەرمەڭىزدەر، سونداي-اق قاۋىپتى زاتتار مەن حيميالىق زاتتاردىڭ قاۋىپسىز ورىنداردا ساقتالۋىن قامتاماسىز ەتىڭىزدەر.

بالالاردى قاراۋسىز قالدىرماڭىزدار, ولاردىڭ قاي جەردە جۇرگەنىن باقىلاۋدا ۇستاعاندارىڭىز ابزال. اسىرەسە، كەشكى ۋاقىتتا بالالاردىڭ ەرەسەكتەردىڭ قاراۋىنسىز سىرتتا جۇرۋىنە جول بەرمەڭىزدەر.

وسى قاراپايىم ەرەجەلەر بالانىڭ ەڭ قىمبات بايلىعى - ءومىرى مەن دەنساۋلىعىن ساقتاۋعا كومەكتەسەدى.

سۋرەت: ultcom.kz سايتىنان الىندى.

قۇرمەتتى جۇرگىزۋشىلەر!

كوپشىلىگىڭىز – اتا-اناسىزدار، اعا-اپكەسىزدەر. كولىك تىزگىنىنە ءار وتىرعان سايىن وسىنى ەستە ساقتاڭىزدار.

جولدا، اسىرەسە تۇرعىن ۇيلەردىڭ ماڭىندا، اۋلالاردا، ساياباقتار مەن بالالار الاڭدارىنىڭ جانىندا اسا مۇقيات بولىڭىزدار.

جىلدامدىق رەجيمىن ساقتاڭىزدار، جاياۋ جۇرگىنشىلەر وتكەلى مەن اۋلاعا جاقىنداعاندا جىلدامدىقتى تومەندەتىڭىزدەر.

كولىك جۇرگىزۋ كەزىندە ءموبيلدى قۇرىلعىلاردى پايدالانۋدان باس تارتىڭىزدار.

بالا كولىكتى بايقاماي قالۋى مۇمكىن. ال جۇرگىزۋشى بالانى مىندەتتى تۇردە بايقاۋعا ءتيىس.

بالالاردىڭ ءومىرى ءسىزدىڭ ءبىر ءسات نازار اۋدارۋىڭىزعا بايلانىستى بولۋى مۇمكىن.

قۇرمەتتى قازاقستاندىقتار!

بالالاردىڭ ءومىرى مەن دەنساۋلىعى - وتباسىنىڭ، قوعامنىڭ جانە مەملەكەتتىڭ ورتاق جاۋاپكەرشىلىگى.

ەشقانداي الدىن الۋ شارالارى ەرەسەكتەردىڭ قىراعىلىعى، جەكە ونەگەسى مەن بالالارعا دەگەن جاناشىرلىعىن الماستىرا المايدى.

بالالارىمىزدىڭ جازعى دەمالىسى قاۋىپسىز ءوتۋى ءۇشىن بارشامىز بىرلەسىپ كۇش سالايىق.

قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا

Abai.kz