5 ماۋسىم كۇنى قىزىم التىنايدىڭ ۇزاتۋ تويى ءوتتى.

ءاربىر اكە ءۇشىن ورنى بولەك، ەرەكشە كۇن. ۇيادان ۇشقان كىپ-كىشكەنتاي قىزىڭنىڭ ەسەيىپ، بويجەتكەنىن جانە ءومىر جولىن بىرگە ءجۇرىپ وتەتەتىن سەرىگىن تاڭداعانىن ىشتەي مويىنداپ، تەبىرەنەتىن ءسات.

مەن التىناي ءۇشىن شەكسىز باقىتتىمىن. بۇل تاڭداۋ كەزدەيسوق نەمەسە اسىعىس جاسالعان جوق. ونىڭ نەگىزىندە شىنايى، پاك ماحاببات جاتىر. كارل ەكەۋى التى جىلدان بەرى تانىس. وسىدان ەكى جىل بۇرىن كارل الماتىعا ارنايى كەلىپ، الدىمنان ءوتتى. مەن ءوز باتامدى بەردىم.

كارل ماعان ۇنايدى. ونىڭ ازاماتتىق ۇستانىمى دۇرىس، الدىنا قويعان ماقساتتارى ايقىن ءارى اۋقىمدى. ونىڭ ەڭبەكقورلىعىنا، بىلىمىنە جانە العان بەتىنەن قايتپايتىن قايسارلىعىنا قاراپ، كوزدەگەن شىڭدارىن باعىندىراتىنىنا كامىل سەنەمىن. بىراق مەن ءۇشىن ەڭ ماڭىزدىسى قىزىمدى شىن جۇرەكتەن، تەرەڭ ءارى نازىك سەزىممەن سۇيەتىنى.

بۇل تويدىڭ ءمانى مەن ءۇشىن تىم بولەك.

ۇلكەن قىزىم تۇرمىسقا شىققاندا مەن تۇرمەدە وتىردىم. ول كەزدە اكە رەتىندە قولىمنان بار كەلگەنى ايگەرىمىمە ارناعان اق تىلەگىمدى قاعازعا ءتۇسىرىپ، حاتپەن بەرىپ جىبەرۋ عانا بولدى. سول حات تويىندا وقىلدى.

ال بۇگىن ءبارى باسقاشا.

قىزىڭنىڭ قۋانىشىندا قاعازداعى قۇرعاق سوزبەن شەكتەلمەي، ءسوزى قاعازدان عانا وقىلاتىن ادام بولماۋدىڭ ءوزى ءبىر عانيبەت. قىزىڭدى ءوزىڭ ۇزاتىپ، وسىناۋ ومىرلىك ماڭىزى بار اق بوساعادان اتتار ساتىندە التىنايىڭا جۇرەكجاردى جىلى سوزدەرىڭدى ءوزىڭ ايتا الۋىڭ نەتكەن باقىت!

مەنى تۇتقىنداعاندا التىناي نە بارى 9 جاستا عانا ەدى. بوستاندىققا شىققانىمدا ول جيىرماعا تولىپتى.

ول مەنسىز ەسەيدى.

ول بالا كۇنىندە-اق، مەنى جانۇيامىز ارقىلى كورسەتىلەتىن قىسىمنان قۇتقارۋ ءۇشىن، تۋعان ءۇيىن تاستاپ جات جەرگە كەتۋگە ءماجبۇر بولدى، بوتەن ەلدە ءوستى.

اتا-اناسىنىڭ ايالى الاقانى مەن مەيىرىمىنە بولەنىپ وتىرعان بالانىڭ كەنەتتەن ۇيىنەن جىراقتاپ، جات تىلدە سويلەيتىن بوتەن ادامدار وقيتىن مەكتەپ-ينتەرناتتان ءبىر-اق شىققانىن ءتۇسىنۋ قيىن. بىراق ول سىنبادى، بارىنە توتەپ بەردى. مەكتەپتى، ارتىنشا ۋنيۆەرسيتەتتى ءبىتىردى. كاسىبي جۋرناليست، تابىستى مودەل رەتىندە تۇلعا بولىپ قالىپتاستى.

الەمنىڭ الپاۋىت كومپانيالارىنىڭ تاڭداۋىنا اينالىپ، جارنامالارىنان كورىنەتىن قىزىمنىڭ سۇيىكتى ديدارىنا قاراپ، جۇرەگىم ەلجىرەيدى، كەۋدەمدى ماقتانىش كەرنەيدى.

قىزىمنىڭ جەتكەن جەتىستىكتەرىن ماقتان تۇتامىن. مەنىڭ قولداۋىم ناعىز كەرەك بولعان شاقتاردا جانىندا بولا الماعانىما جانىم اۋىرادى.

التىنايدى قۇتتىقتاپ، ونىڭ ۇيلەنۋ تويىنا وراي اق تىلەگىن، ادال نيەتىن بىلدىرگەن بارشا جانعا شىن جۇرەكتەن العىس ايتامىن!

ال كەيبىر قيسىنسىز، ورىنسىز پىكىر جازىپ جاتقاندار تەك ايانىش پەن جيىركەنىش سەزىمىن تۋعىزادى.

ناعىز نامىس كۇيەۋ بالانىڭ ۇلتىمەن ولشەنبەيدى. نامىس دەگەنىمىز سول نامىس ءۇشىن تىم جوعارى باعا تولەۋگە تۋرا كەلگەندە، ادامدىق ارىڭ مەن ابىرويىڭدى تازا ساقتاپ قالا الۋىڭمەن ولشەنەدى!

ۇلتتىڭ جامانى بولمايدى. جامان ادامدار بولادى.

قالعان دۇنيەنىڭ ءبارى وسى قاراپايىم قاعيدانىڭ سالدارى عانا.

ار-ۇجدانىن مانساپقا ايىرباستاپ، ماعان قارسى ءىستى قولدان قۇراستىرعان تەرگەۋشىلەردىڭ، پروكۋرورلار مەن سۋديالاردىڭ ىشىندە بىردە-ءبىر شەتەلدىك بولعان جوق. مەنى سونداي «قۇدالاردان» ساقتاعان جاراتقانعا مىڭ شۇكىر.

ماعان ءوز قۇدالارىم ۇنايدى. ولاردىڭ اۋلەتى ۇلىبريتانيادا تۇرىپ جاتقانىنا جەتپىس جىلدان اسسا دا، ءوز تامىرلارىن ۇمىتپاعان. تويعا ولاردىڭ كوبى وزدەرىنىڭ ۇلتتىق كيىمدەرىن كيىپ كەلىپ، ءوز تەگىنە دەگەن قۇرمەتىن ەرەكشە كورسەتتى.

كارلدىڭ اكەسى گەنري ماعان وتە قاتتى ۇنادى. ەكەۋمىز قاتارلاسپىز، ونىمەن الەمدىك ەكونوميكالىق ۇردىستەر تۋرالى پىكىر الماسىپ، تاماشا اسەر الدىم. گەنريدىڭ ماماندىعى ينۆەستيتسيالىق بانكير، كارلدىڭ بويىنداعى كوپتەگەن جاقسى قاسيەتتەردىڭ اكەسىنەن دارىعانىن انىق بايقادىم.

كارلدىڭ وتباسى مەن تۋعان-تۋىستارىنىڭ قىزىما دەگەن ىستىق ىقىلاسىنا، قۇرمەتى مەن ماحابباتىنا ريزامىن.

ويتكەنى مەن ءۇشىن ەڭ باستىسى – قىزىمنىڭ باقىتتى بولعانى!

مەن ءوز بالالارىمنىڭ تاڭداۋىن ءاردايىم قۇرمەتتەيمىن جانە ولاردى ارقاشان قولدايمىن.

ولار تالاي سىناقتان ءوتتى. بىراق قيىندىققا مويىماي، ادام دەگەن اتقا لايىق ازامات بولىپ ءوستى، مەن ۇستاناتىن ومىرلىك قاعيدالاردى ساقتاي ءبىلدى.

ومىرلەرىڭ ۇزاق، ادال ءارى باقىتتى بولسىن! ارمانداعان اسقاق مۇراتتارىڭنىڭ ءبارى ورىندالسىن!

جانە مىنا دۇنيەنى ەستەن شىعارماڭدار: قانداي جاعداي بولسا دا، اكەلەرىڭ ارقاشان سەندەرمەن بىرگە.

سەندەردى جاقسى كورەمىن.

اكەلەرىڭ.

مۇحتار جاكىشەۆ

Abai.kz