كونستيتۋتسيالىق سوت بىرقاتار لاۋازىمدى ادامدى تاعايىنداۋ مەن سايلاۋ مارتەسى تۋرالى نورمالاردىڭ قولدانىلۋ ءتارتىبىن ءتۇسىندىردى. بۇل تۋرالى ماتەريال كونستيتۋتسيالىق سوتتىڭ رەسمي سايتىندا جاريالاندى.

قازاقستان رەسپۋبليكاسى كونستيتۋتسيالىق سوتىنىڭ 2026 جىلعى 7 شىلدەدەگى № 89-نق نورماتيۆتىك قاۋلىسى

قازاقستان رەسپۋبليكاسى كونستيتۋتسيالىق سوتىنىڭ نورماتيۆتىك قاۋلىسىنا انىقتامالىق اقپارات

(2026 جىلعى 7 شىلدەدەگى № 89-نق)

قازاقستان رەسپۋبليكاسىنىڭ كونستيتۋتسيالىق سوتى قازاقستان رەسپۋبليكاسى پرەزيدەنتىنىڭ 2026 جىلعى 15 ناۋرىزداعى قازاقستان رەسپۋبليكاسى كونستيتۋتسياسىنىڭ 43-بابى 1-تارماعىنىڭ، 72-بابى 2 جانە 3-تارماقتارىنىڭ، 83-بابى 1-تارماعىنىڭ جانە 84-بابى 3-تارماعىنىڭ ەرەجەلەرىن:

«لاۋازىمىن 1995 جىلعى 30 تامىزداعى قازاقستان رەسپۋبليكاسىنىڭ كونستيتۋتسياسىنا سايكەس اتقارىپ كەلە جاتقان ادامدار 2026 جىلعى 15 ناۋرىزداعى قازاقستان رەسپۋبليكاسى كونستيتۋتسياسىنىڭ 43-بابى 1-تارماعىندا، 72-بابى 2 جانە 3-تارماقتارىندا، 83-بابى 1-تارماعىندا، 84-بابى 3-تارماعىندا كورسەتىلگەن قىزمەتكە سايلانا الا ما نە لاۋازىمعا تاعايىندالا الا ما؟» دەگەن سۇراققا جاۋاپ بەرىپ، رەسمي ءتۇسىندىرۋ تۋرالى ءوتىنىشىن قارادى.

كونستيتۋتسيالىق سوت اتالعان كونستيتۋتسيالىق نورمالاردىڭ مازمۇنىنان ولاردا بەلگىلەنگەن شەكتەۋلەر ادامنىڭ ءتيىستى قىزمەتكە الدىڭعى سايلانۋ نە لاۋازىمعا الدىڭعى تاعايىندالۋ فاكتىسىمەن قولدانىستاعى كونستيتۋتسيادا جانە سوعان سايكەس قابىلدانعان نورماتيۆتىك قۇقىقتىق اكتىلەردە كوزدەلگەن تارتىپتە عانا بايلانىستى بولاتىنى شىعادى دەپ اتاپ ءوتتى.

كونستيتۋتسيانىڭ 43-بابىنىڭ 1-تارماعىندا، 72-بابىنىڭ 2 جانە 3-تارماقتارىندا، 83-بابىنىڭ 1-تارماعىندا جانە 84-بابىنىڭ 3-تارماعىندا بەلگىلەنگەن شەكتەۋلەر قولدانىلعان جاعدايدا 1995 جىلعى نەگىزگى زاڭ قولدانىستا بولعان كەزەڭدە ءتيىستى لاۋازىمداردا بولۋ مەرزىمدەرىن، سونداي-اق قىزمەتكە سايلاۋ نە لاۋازىمعا تاعايىنداۋ فاكتىلەرىن ەسەپكە الۋدى كوزدەيتىن ەرەجەلەردى كونستيتۋتسيا قامتىمايدى.

دەمەك، ادامنىڭ اتالعان لاۋازىمداردىڭ ءبىرىن 1995 جىلعى كونستيتۋتسيا قولدانىستا بولعان كەزەڭدە اتقارۋ فاكتىسى قازاقستان رەسپۋبليكاسىنىڭ كونستيتۋتسياسى 2026 جىلعى 1 شىلدەدەن باستاپ كۇشىنە ەنگەننەن كەيىن ونى ءتيىستى قىزمەتكە سايلاۋعا نە لاۋازىمعا تاعايىنداۋعا نەگىزگى زاڭدا كوزدەلگەن كونستيتۋتسيالىق-قۇقىقتىق كەدەرگى بولىپ تابىلمايدى.

پرەزيدەنتتىڭ ءوتىنىشىن قاراۋ قورىتىندىسى بويىنشا كونستيتۋتسيالىق سوت رەسمي ءتۇسىندىرۋ بەردى: 2026 جىلعى كونستيتۋتسيانىڭ 43-بابىنىڭ 1-تارماعىن، 72-بابىنىڭ 2 جانە 3-تارماقتارىن، 83-بابىنىڭ 1-تارماعىن جانە 84-بابىنىڭ 3-تارماعىن وسى كونستيتۋتسيالىق نورمالاردا اتالعان لاۋازىمداردى 1995 جىلعى كونستيتۋتسياعا سايكەس اتقارىپ جۇرگەن ادامدار 2026 جىلعى كونستيتۋتسيا كۇشىنە ەنگەننەن كەيىن ءتيىستى قىزمەتكە سايلانۋى نە لاۋازىمعا تاعايىندالۋى مۇمكىن دەپ ءتۇسىنۋ كەرەك.

اتالعان كونستيتۋتسيالىق نورمالاردا بەلگىلەنگەن شەكتەۋلەردى قولدانۋ ماقساتى تۇرعىسىنان مۇنداي ادامداردىڭ 2026 جىلعى كونستيتۋتسيا كۇشىنە ەنگەننەن كەيىن ءتيىستى قىزمەتكە سايلانۋى نە لاۋازىمعا تاعايىندالۋى العاش رەت سايلانۋ نە تاعايىندالۋ دەپ ەسەپتەلەدى.

Abai.kz