قازاقستان سىرتقى ىستەر مينيسترلىگىنىڭ نارازىلىعىنا قاراماستان، كاسپي قۇبىر كونسورتسيۋمىنىڭ (كقك) تەڭىز تەرمينالى ماڭىندا مۇناي تيەپ جاتقان تانكەرلەرگە دروندار شابۋىل جاساپ جاتىر، دەپ حابارلايدى Ulysmedia.kz.

كاسپي قۇبىر كونسورتسيۋمىنىڭ مالىمەتىنشە، 19 شىلدە كۇنى كەشكە نوۆوروسسيسك ماڭىنداعى تەڭىز تەرمينالىندا الدىڭعى شابۋىلداردان كەيىن مۇناي تيەۋ جۇمىستارى قايتا باستالعان. الايدا قازاقستاننىڭ سىرتقى ىستەر مينيسترلىگى مەن ەنەرگەتيكا مينيسترلىگى تانكەرلەردىڭ ازاماتتىق نىسان ەكەنىن مالىمدەپ، شابۋىلداردى قاتاڭ ايىپتاعان ەدى. الايدا سوعان قاراماستان، 20 شىلدەدە تاعى ءبىر وسىنداي وقيعا تىركەلدى.

كقك ءباسپاسوز قىزمەتىنىڭ حابارلاۋىنشا، 20 شىلدەدە ۆپۋ-1 ايلاعىندا مۇناي تيەپ تۇرعان NELSA ازاماتتىق تانكەرىنە درون شابۋىل جاساعان.

درون تانكەردىڭ وڭ جاق بورتىنداعى ارتقى بولىگىنە سوعىلىپ، سالدارىنان كەمەدە ءورت شىققان. ءورت بىرنەشە ساعات ىشىندە تولىق ءسوندىرىلدى. كەمەدەگى 22 ەكيپاج مۇشەسى كونسورتسيۋمنىڭ بۋكسيرلەرى ارقىلى ەۆاكۋاتسيالاندى. بورتتا تەك كاپيتان مەن اعا كومەكشىسى عانا قالدى.

كقك مالىمەتىنشە، ورتكە قاراماستان تانكەر سۋ بەتىندە قالقىپ تۇر جانە سۋعا باتۋ قاۋپى جوق.

– مۇناي تيەۋ جۇمىستارى توقتاتىلدى. مۇنايدىڭ توگىلۋىنە جانە رەزەرۆۋارلاردا تۇتانۋىنا جول بەرىلگەن جوق، – دەپ مالىمدەدى كونسورتسيۋم.

كونسورتسيۋم وكىلدەرى مۇناي تيەۋ كەزىندە تانكەرلەرگە جاسالعان شابۋىلداردىڭ ەكولوگيالىق ءارى تەحنوگەندىك تۇرعىدان وتە ۇلكەن قاۋىپ توندىرەتىنىن ايتىپ، مەملەكەتتىك ورگانداردى مۇنداي ارەكەتتەردى ايىپتاۋعا ۇندەدى.

سونداي-اق مالىمدەمەدە ءسوز بولىپ وتىرعان مۇنايدىڭ قازاقستاندا وندىرىلگەنى ەرەكشە اتاپ ءوتىلدى.

بۇعان دەيىن

ەسكە سالايىق، 19 شىلدەدە كاسپي قۇبىر كونسورتسيۋمىنىڭ تەڭىز تەرمينالىندا قازاقستاندىق مۇنايدى تيەپ جاتقان ەكى تانكەرگە دە دروندار شابۋىل جاساعان ەدى.

وقيعادان كەيىن قازاقستاننىڭ ەنەرگەتيكا مينيسترلىگى مەن سىرتقى ىستەر مينيسترلىگى رەسمي مالىمدەمە جاساپ، ازاماتتىق تەڭىز كەمەلەرىنە جاسالعان شابۋىلداردى ايىپتادى.

بۇعان دەيىن دە Yasa Polaris جانە Nordic Zenith تانكەرلەرى كقك تەڭىز تەرمينالىنا قاراي بەت العان كەزدە درون شابۋىلىنا ۇشىراعان ەدى.

Abai.kz