الماتىدا زاڭسىز قۇرىلىسقا توسقاۋىل قويۋ جۇمىستارى ءجۇرىپ جاتىر. 

قالا قۇرىلىسىن باقىلاۋ باسقارماسىنىڭ مالىمەتىنشە، 2026 جىلى زاڭ تالاپتارىن بۇزا وتىرىپ سالىنعان 41 نىسان تولىق نەمەسە ءىشىنارا سۇرىلگەن. قازىرگى ۋاقىتتا قالالىق ادىلەت دەپارتامەنتىندە زاڭدى كۇشىنە ەنگەن 74 سوت شەشىمى ورىندالۋ ساتىسىندا تۇر. ولار زاڭسىز سالىنعان نىسانداردى تولىق نەمەسە جارتىلاي ءسۇرىپ تاستاۋدى كوزدەيدى.

جىل باسىنان بەرى باسقارما 1072 جوسپاردان تىس تەكسەرۋ جۇرگىزگەن. ونىڭ قورىتىندىسى بويىنشا جالپى سوماسى 383,9 ملن تەڭگەگە ايىپپۇل سالىنىپ، انىقتالعان زاڭبۇزۋشىلىقتاردى جويۋ تۋرالى 432 نۇسقاما بەرىلدى.

سونداي-اق قۇرىلىس-مونتاج جۇمىستارىن ساپاسىز ورىنداعانى ءۇشىن 43 ۇيىم جاۋاپكەرشىلىككە تارتىلدى. ال تەحنيكالىق قاداعالاۋدى ءتيىستى دەڭگەيدە جۇرگىزبەگەنى ءۇشىن 40 ۇيىم مەن تەحنيكالىق قاداعالاۋ مامانىنا قاتىستى شارا قولدانىلدى. بۇدان بولەك 148 جوبالاۋ ۇيىمى اكىمشىلىك جاۋاپكەرشىلىككە تارتىلىپ، ولارعا جالپى سوماسى 32,4 ملن تەڭگە كولەمىندە ايىپپۇل سالىنعان.

Abai.kz