ەلدەگى «ەكىنشى ادام» اتانعان ازاماتقا مەملەكەت باسشىسى قاسىم-جومارت توقاەۆ جۇكتەگەن سەنىمنىڭ سالماعى وراسان زور، جاۋاپكەرشىلىك ودان دا جويقىن! ءتورت جىلدىڭ توڭىرەگىندە تورگە شىعارار ابىروي مەن بەدەل جيناي ءجۇرۋ، سالماعى باتپان مەملەكەتشىل مىندەتتەر ۇددەسىنەن شىعا ءبىلۋ – بۇل ەلدىككە ەتكەن ەرەن ەڭبەكتىڭ ناتيجەسى بولسا كەرەك!

ساياسي يستەبليشمەنتتە ەكى جاققا بىردەي مىندەتى بولۋى ءتيىس «سەنىم» دەگەن جالعىز اۋىز اتاۋدان ءبىراز ءسوز سۋىرتپاقتاۋعا بولادى. قاڭتارعا دەيىنگى ەكىۇداي جىلداردى ەسەپكە الماعاندا، بيلىگى بەكەمدەنگەن بەرگى ءتورت جىلدا ەل پرەزيدەنتى ءبىراز ازاماتقا سەنىم ارتتى: نەكەن-ساياق بىرەۋلەرى سۋىرىلىپ شىعا ءبىلدى; ەندى بىرەۋلەرى وگىز بەن اربانىڭ اماندىعى ارقاسىندا عانا بورازدانى بۇزباي ءجۇر; سەنىم جۇگىن قىزمەت-قارىمىنا وڭگەرە الماعان ءبىرازى بيىك-بيىك لاۋازىمنان كەتۋگە ءماجبۇر بولدى.

ال ەندىگى جەردە ساياسي يەرارحياداعى «ەكىنشى ادام» اتانعان ەرلان كارين – قاڭتارعا دەيىن دە، ودان كەيىن دە پرەزيدەنتتىك سەنىمنىڭ جەتەگىمەن تەك قانا ورلەۋ ۇستىندە كەلە جاتقان تۇلعا. ارينە، ەلدىڭ باستى يدەولوگى بولعان سوڭ، ەسكى بيلىك بولشەكتەپ تاستاعان الا-قۇلا قوعامنىڭ «نەگە ويتپەيدى، نەگە بۇيتپەيدى» دەگەن سياقتى «قازاقى ساراپشىلىق» سوزدەرى ەستىلىپ جاتادى. اسىرەسە ونلاين-ورتانىڭ اۋزىنا قاقپاق بولا المايسىڭ...

بىراق مەملەكەتتىك ىشكى ساياسات الىپ-قاشپا پىكىردەگى «ءويتىپ-بۇيتۋمەن» جاسالمايدى. بۇل ساياسات ادەتتە دابىراشىل قوعامنىڭ الدىندا عانا ەمەس، تۇتاس ەلدىڭ، مەملەكەتتىڭ جانە تاۋەلسىزدىك تالاپتارى الدىندا جاۋاپتى. سوندىقتان قازاقستان حالقىن ءبىرتۇتاس ەلدىك دامۋ يدەولوگياسىنا جۇمىلدىرا ءبىلۋ – «مايدان قىل سۋىرعانداي» سىرباز قادامدى قاجەت ەتەدى. جانە بۇل ساليقالى قاجەتتىلىك ەدەل-جەدەل ەمەس، ۋاقىتپەن بىرگە مىسقالدانىپ قالىپتاسادى.

مىنە، مەنىڭشە، كەشەگى مەملەكەتتىك كەڭەسشى، بۇگىنگى ۆيتسە-پرەزيدەنت ەرلان كارين – ەل باسشىسى ارتقان وسىنداي سەنىمدى ارقالاي العان ازامات. ءدىلمارسىز ءسوز بەن قۇتتىقتاۋدىڭ بۇگىنگى توبىقتاي ءتۇيىنى – باستالعان وتە ماڭىزدى مەملەكەتتىك ىسىڭە جاراتقان جار بولسىن، قازاقستان رەسپۋبليكاسىنىڭ ۆيتسە-پرەزيدەنتى ەرلان مىرزا!

ارقاڭدى ايبىندى ەلىڭە سۇيە، اياعىڭدى تاۋەلسىز جەرىڭە تىرە! وسى ەكەۋىنە قالتقىسىز قىزمەت قىلا بىلسەڭ، تۇعىردان تۇسپەسىڭ كامىل! ىسكە ءسات!

ءتۇيىن: ايتپاقشى، تاۋەلسىزدىكتىڭ العاشقى جىلدارىندا بىزدە ۆيتسە-پرەزيدەنتتىك لاۋازىم بولعانى جاڭا تاريحتان ءمالىم. بىراق ول لاۋازىم كەيىنگى جەكە-دارا بيلىكتى قالىپتاستىرۋ قامىنىڭ قۇربانى بولدى. ال ەندىگى ۆيتسە-پرەزيدەنت تاۋەلسىزدىك تۇعىرىن بەكىتۋ جولىنداعى حالىق پەن قوعامنىڭ دانەكەر تۇلعاسىنا اينالادى دەگەن سەنىم زور!

ەرمۇرات باپي،

DAT گازەتى

Abai.kz