بۇگىنگى تاڭدا عالامشارىمىز شىنى شىتىناعان ساعاتتاي المعايىپ حالدە. كليماتتىڭ وزگەرۋى، شولسىزدەۋ پروتسەسىنىڭ ۇدەۋى مەن ورمان-توعايدىڭ سيرەۋى — ادامزاتقا بەرىلگەن سىباعانىڭ سوڭعى تۇياق سەرپەر ەسكەرتۋى ىسپەتتى دەسەك ارتىق ايتقاندىعىمىز ەمەس.

وسىنداي ادامزات باسىنا قارا بۇلت ۇيىرىلگەن سىندارلى شاقتا بۇۇ مىنبەرىنەن الەمگە وي سالارلىق سالماقتى ءۇن قاتىلدى. جەر اناعا تازا تىنىس سىيلاپ، جاسىل جەلەكپەن كومكەرۋ يدەياسىن قازاقستان جاھاندىق دەڭگەيگە شىعاردى.

نيۋ-يوركتەن سوققان جاسىل لەپ

بۇۇ باس اسسامبلەياسى قازاقستان رەسپۋبليكاسىنىڭ باستاماسىمەن «حالىقارالىق عالامشاردى كوگالداندىرۋ كۇنى» تۋرالى ارنايى رەزوليۋتسيا قابىلدادى. ەندى جىل سايىن 22 ءساۋىر — حالىقارالىق عالامشاردى كوگالداندىرۋ كۇنى رەتىندە الەم بويىنشا ەرەكشە اتالىپ وتەدى.

بۇل باستامانىڭ تامىرى تەرەڭدە. ەستەرىڭىزدە مبولسا، پرەزيدەنت قاسىم-جومارت توقاەۆ 2025 جىلدىڭ كۇزىندە بۇۇ باس اسسامبلەياسىنىڭ 80-ءشى سەسسياسىندا الەم ەلدەرىن اعاش ەگىپ، ەكوجۇيەنى قالپىنا كەلتىرۋگە شاقىرعان بولاتىن. ارادا جىل وتەر-وتپەستە بۇل ۇسىنىس جاھاندىق قولداۋعا يە بولىپ، رەزوليۋتسياعا جەر شارىنىڭ ءار تۇكپىرىندەگى 32 مەملەكەت قوس قولىن كوتەرە بۇل ۇندەۋگە جاندارى قالماي قوسىلدى.

اعاش وتىرعىزۋ — بولاشاققا سالىنعان ينۆەستيتسيا

بۇل رەزوليۋتسيا — تەك رەسمي قۇجات ەمەس، بۇل — تابيعات پەن ادام اراسىنداعى ۇزىلگەن بايلانىستى قايتا جالعاۋعا جاسالعان ۇلكەن قادام. باستامانىڭ نەگىزگى تۇپكى مانىنە كوز جۇگىرتە توقتار بولساق: ەكوجۇيەنى ءتيىمدى قالپىنا كەلتىرۋ: جاي عانا اعاش ەگۋ ەمەس، توزعان جەرلەرگە قايتا جان ءبىتىرۋ; ەكولوگتىق مادەنيەتتى قالىپتاستىرۋ: جاسىل جەلەكتى قورعاۋدى ءاربىر ادامنىڭ كۇندەلىكتى ادەتىنە اينالدىرۋ; حالىقارالىق ىنتىماقتاستىقتى نىعايتۋ: كليماتتىق داعدارىسقا قارسى بۇكىل الەم ەلدەرىنىڭ كۇشىن بىرىكتىرۋدى بەيمارال اڭعارامىز.

«تازا قازاقستاننان» — بۇكىلالەمدىك قوزعالىسقا

حالىقارالىق دەڭگەيدەگى بۇل جاعىمدى باستاما ەلىمىزدە كەڭىنەن قانات جايعان «تازا قازاقستان» جالپىۇلتتىق ەكولوگيالىق اكتسياسىمەن تىعىز استاسىپ جاتىر. ءوز تۋعان جەرىن كوركەيتىپ، ايلاناسىن تازا ۇستاۋعا ۇمتىلعان قازاق ەلى تۇرعىندارىنىڭ پاتيروتتىق ىشكى ۇمتىلىسى ەندى بۇكىل الەمدىك قوزعالىسقا ۇلاسقانى جانىڭدى جادىراتادى.

بابالارىمىز «اتادان مال قالعانشا، تال قالسىن» دەپ تەگىن ايتپاعان. 22 ساۋىردە وتىرعىزىلعان ءاربىر جاس شىبىق — ەرتەڭگى ۇرپاققا قالدىراتىن ەڭ باعالى مۇرامىز، عالامشارعا سىيلاعان ومىرلىك تىنىسىمىز بولماق. ونى تەك قازاققا قانا ەمەس، بۇكىل الەمگە الاش ۇسىنعان ۇلاعاتتى ءتالىم بولىپ تاريح پاراعىنا جازىلدى.

Abai.kz