2026 جىلعى 9 قىركۇيەكتە دۇنيەجۇزىلىك توعىزقۇمالاق استاناسى – الماتى قالاسىندا، «دوستىق» سپورت كەشەنىندە دۇنيەجۇزىلىك توعىزقۇمالاق كۇنىنە ارنالعان مەرەكەلىك سپورتتىق جارىس جوعارى دەڭگەيدە ۇيىمداستىرىلدى.

ءىس-شارانىڭ سالتاناتتى اشىلۋىنا الماتى قالاسى ىشكى ساياسات باسقارماسىنىڭ باسشىسى مەرەي ابزالبەكوۆ قاتىسىپ، جارىستى رەسمي تۇردە اشتى. ول قاتىسۋشىلارعا ساتتىلىك تىلەپ، ۇلتتىق زياتكەرلىك سپورتىمىز – توعىزقۇمالاقتى وسكەلەڭ ۇرپاق اراسىندا كەڭىنەن ناسيحاتتاۋدىڭ ماڭىزدىلىعىنا توقتالدى.

جارىسقا 200-گە جۋىق سپورتشى قاتىسىپ، راپيد تۇرىنەن 5 تۋر بويىنشا ءوزارا باق سىنادى. تۋرنير قورىتىندىسىندا جۇلدەلى ورىندارعا يە بولعان سپورتشىلار الماتى قالاسى سپورت باسقارماسىنىڭ قولداۋىمەن باعالى سىيلىقتارمەن ماراپاتتالدى.

(سۋرەت:الماتى قالاسى اكىمدىگىنەن الىندى )

سونىمەن قاتار سالتاناتتى شارا بارىسىندا قازاقستان رەسپۋبليكاسى توعىزقۇمالاق سپورتى فەدەراتسياسىنىڭ ۆيتسە-پرەزيدەنتى بولات وسپانوۆ توعىزقۇمالاق سپورتىن دامىتۋعا، جاس سپورتشىلاردى تاربيەلەۋگە جانە ۇلتتىق ويىندى كەڭىنەن ناسيحاتتاۋعا ۇلەس قوسىپ جۇرگەن الماتى قالاسىنىڭ توعىزقۇمالاق جاتتىقتىرۋشىلارىنا العىس حاتتار تابىستادى.

ءىس-شارانىڭ نەگىزگى ماقساتى – ۇلتتىق زياتكەرلىك سپورت ءتۇرى توعىزقۇمالاقتى كەڭىنەن دارىپتەۋ، بالالار مەن جاسوسپىرىمدەردىڭ سپورتقا قىزىعۋشىلىعىن ارتتىرۋ، ۇلتتىق قۇندىلىقتاردى وسكەلەڭ ۇرپاق ساناسىنا ءسىڭىرۋ جانە توعىزقۇمالاق سپورتىنىڭ بۇقارالىق دامۋىنا قولداۋ كورسەتۋ.

الماتى قالاسىنىڭ دۇنيەجۇزىلىك توعىزقۇمالاق استاناسى رەتىندەگى مارتەبەسىنە ساي، ۇلتتىق زياتكەرلىك سپورتىمىزدى دامىتۋ، بۇقارالاندىرۋ جانە حالىقارالىق دەڭگەيدە كەڭىنەن ناسيحاتتاۋ باعىتىنداعى جۇمىستار جۇيەلى تۇردە جالعاسۋدا.

Abai.kz