ءال-فارابي اتىنداعى قازۇۋ باسشىلىعى جۋرناليستيكا فاكۋلتەتىنىڭ بىرقاتار وقىتۋشىسىنىڭ قىزمەتتەن كەتۋىنە قاتىستى رەسمي تۇسىنىكتەمە بەردى. ۋنيۆەرسيتەت مالىمەتىنشە، قابىلدانعان كادرلىق شەشىمدەر بەلگىلەنگەن اكادەميالىق تالاپتار مەن كونكۋرستىق راسىمدەرگە سايكەس جۇزەگە اسىرىلعان.

اتاپ ايتقاندا، جۋرناليستيكا فاكۋلتەتىنىڭ پروفەسسورى كاكەن حامزين مەن دوتسەنت تەمىرعالي كوپباەۆتىڭ ەڭبەك شارتتارىنىڭ قولدانىلۋ مەرزىمى اياقتالعان. اعا وقىتۋشى ەرماحان شايحى اكادەميالىق بىلىكتىلىگىن انىقتاۋ ماقساتىندا وتكىزىلگەن كونكۋرستىق كوميسسيا وتىرىسىنا قاتىسپاعان جانە بەلگىلەنگەن راسىمنەن وتۋدەن باس تارتقان. ال اعا وقىتۋشى مۇرات شايماران اكادەميالىق تالاپتارعا سايكەستىگىن باعالاۋ ماقساتىندا وتكىزىلگەن كونكۋرستان وتە الماعان.

قازۇۋ باسقارما مۇشەسى – اكادەميالىق ماسەلەلەر جونىندەگى پرورەكتور الينا  كولبايقىزى گالەەۆانىڭ تۇسىندىرۋىنشە، وقىتۋشىلاردى لاۋازىمعا قابىلداۋ جوعارى وقۋ ورىندارىندا بەلگىلەنگەن تارتىپكە سايكەس جىل سايىن جۇرگىزىلەدى.

ارنايى قۇرىلعان كونكۋرستىق كوميسسيا ۇمىتكەرلەردىڭ عىلىمي جانە وقۋ-ادىستەمەلىك ەڭبەكتەرىن، پەداگوگيكالىق تاجىريبەسىن، ءدارىس بەرۋ بىلىكتىلىگىن جانە بەلگىلەنگەن وزگە دە تالاپتارعا سايكەستىگىن باعالايدى.

«ءتيىستى شەشىمدەر قولدانىستاعى زاڭناماعا جانە ۋنيۆەرسيتەتتىڭ ىشكى نورماتيۆتىك قۇجاتتارىنا سايكەس قابىلدانادى»، – دەدى الينا گالەەۆا.

ۋنيۆەرسيتەتتىڭ بۇل تۇسىنىكتەمەسى الەۋمەتتىك جەلىدە جۋرناليستيكا فاكۋلتەتىنىڭ بۇرىنعى دەكانى، اقىن ءارى باسپاگەر تەمىرعالي كوپباەۆتىڭ جازباسى تالقىلانعاننان كەيىن جاريالاندى.

تەمىرعالي كوپباەۆ Facebook-تەگى جازباسىندا فاكۋلتەتتە 12 جىلدان 32 جىلعا دەيىن ەڭبەك ەتكەن ءتورت وقىتۋشىنىڭ – ءوزىنىڭ، فيلولوگيا عىلىمدارىنىڭ دوكتورى كاكەن ءحامزيننىڭ، اقىن ءارى عالىم مۇرات شايماراننىڭ جانە ساتيريك-جازۋشى ەرماحان شايحىنىڭ قىزمەتتەن كەتۋىنە قاتىستى ءوز ءۋاجىن بىلدىرگەن.

ول بۇل جاعدايدى فاكۋلتەتتەگى باسقارۋ شەشىمدەرىنە قاتىستى ۇستانىمدارىمەن بايلانىستىرىپ، تاجىريبەلى وقىتۋشىلاردىڭ كەتۋى فاكۋلتەتتىڭ اكادەميالىق بەدەلىنە، جۋرناليستيكا عىلىمىنىڭ دامۋىنا جانە جاس مامانداردى دايارلاۋ ىسىنە كەرى اسەر ەتۋى مۇمكىن دەگەن پىكىر ايتقان.

بۇعان دەيىن الەۋمەتتىك جەلى قولدانۋشىلارى مۇرات شايماراننىڭ فاكۋلتەتتەن كەتۋىنە قاتىستى دا پىكىر بىلدىرگەن بولاتىن. ۋنيۆەرسيتەت ونىڭ جاعدايىن كونكۋرستىق ىرىكتەۋدەن وتە الماۋىمەن ءتۇسىندىردى.

Abai.kz