قازاقستاننىڭ قالالارى مەن اۋىلدىق ەلدى مەكەندەرىندە مەكتەپتەردىڭ، بالاباقشالاردىڭ، مادەنيەت مەكەمەلەرى مەن سپورت نىساندارىنىڭ قولجەتىمدىلىگى ينفراقۇرىلىمدىق قامتاماسىز ەتۋدىڭ نەعۇرلىم كۇشتى قىرلارىنىڭ ءبىرى بولىپ قالا بەرەدى.

بۇل دەرەكتەر قازاقستاندىق قوعامدىق دامۋ ينستيتۋتى جۇرگىزگەن الەۋمەتتانۋلىق زەرتتەۋ ناتيجەسىندە الىندى. زەرتتەۋ اياسىندا تۇرعىندار ءوز وڭىرىندەگى ينفراقۇرىلىم مەن قىزمەتتەردىڭ 17 نەگىزگى ەلەمەنتىن باعالادى.

جالپى العاندا، حالىقتىڭ ينفراقۇرىلىمعا قاناعاتتانۋ دەڭگەيى جوعارى بولىپ وتىر: 2026 جىلدىڭ III توقسانىندا ينفراقۇرىلىمنىڭ ءتۇرلى ەلەمەنتتەرىنە قاناعاتتانعانداردىڭ ۇلەسى 57,8%-دان 78,2%-عا دەيىنگى ارالىقتى قۇرادى.

نەعۇرلىم جوعارى باعالار ءداستۇرلى تۇردە وتباسىلاردىڭ كۇندەلىكتى ءومىرى مەن ادامي كاپيتالدى دامىتۋدا تىكەلەي ماڭىزى بار نىساندارعا قاتىستى بەرىلدى. ەڭ الدىمەن، بۇل مەكتەپتەردىڭ قولجەتىمدىلىگى - 78,2%، بالاباقشالار - 73,3%، سپورت كەشەندەرى مەن نىساندارى - 71,6%، سونداي-اق مادەنيەت مەكەمەلەرى - 71,1% كورسەتتى.

حالىقتىڭ باعالاۋى بويىنشا مەكتەپتەر الەۋمەتتىك ينفراقۇرىلىمنىڭ ەڭ قولجەتىمدى نىسانى بولىپ قالا بەرەدى. 2026 جىلدىڭ III توقسانىندا رەسپوندەنتتەردىڭ 78,2%-ى ءوز قالاسىنداعى، كەنتىندەگى نەمەسە اۋىلىنداعى مەكتەپتەردىڭ قولجەتىمدىلىگىنە قاناعاتتاناتىنىن ءبىلدىردى. ياعني ءاربىر 10 تۇرعىننىڭ شامامەن 8-ءى وڭ باعا بەرگەن.

بالاباقشالاردىڭ قولجەتىمدىلىگى دە وڭ باعالاندى - 73,3%. بۇل كورسەتكىشتىڭ جىل بويى تۇراقتى ساقتالۋى دا وڭ ءۇردىستى اڭعارتادى.

مادەنيەت مەكەمەلەرى مەن سپورت ينفراقۇرىلىمى حالىقتىڭ ءومىر ءسۇرۋ ساپاسىن ارتتىرۋدىڭ ماڭىزدى رەسۋرستارى بولىپ وتىر. مادەنيەت مەكەمەلەرىنىڭ قولجەتىمدىلىگىنە قاناعاتتانۋ دەڭگەيى 71,1%-دى، ال سپورت كەشەندەرى مەن نىساندارى بويىنشا 71,6%-دى قۇرادى.

حالىق اباتتاندىرۋدىڭ باسقا دا ەلەمەنتتەرىن دە سالىستىرمالى تۇردە جوعارى باعالايدى. ساۋالناماعا قاتىسقانداردىڭ 67,8%-ى سەرۋەندەۋ جانە دەمالىس ورىندارىنىڭ بولۋىنا، 67,3%-ى كوگالداندىرۋعا، 63,8%-ى كوشەلەر مەن اۋلالاردىڭ تازالىعى مەن جينالۋ ساپاسىنا كوڭىلى تولاتىنىن بىلدىرگەن. بالالاردى دامىتۋ مۇمكىندىكتەرىنە قاناعاتتانۋ دەڭگەيى 66,2%-دى، اۋىز سۋ ساپاسىنا - 64,4%-دى، مەملەكەتتىك ورگاندار اقپاراتىنىڭ قولجەتىمدىلىگىنە - 64,6%-دى قۇرادى.

جولداردىڭ ساپاسىن باعالاۋداعى وڭ ديناميكانى اتاپ ءوتۋ قاجەت. بۇل كورسەتكىش ءالى دە بولسا ودان ءارى نازار اۋدارۋدى قاجەت ەتەتىن باعىتتاردىڭ قاتارىندا بولعانىمەن، ءبىر جىل ىشىندە وعان قاناعاتتانۋ دەڭگەيى I توقسانداعى 50%-دان III توقساندا 57,8%-عا دەيىن وسكەن. وسىلايشا، قاراستىرىلىپ وتىرعان ينفراقۇرىلىم ەلەمەنتتەرىنىڭ ىشىندە جولداردىڭ ساپاسى بويىنشا قاناعاتتانۋ دەڭگەيىنىڭ ەڭ ەلەۋلى وسىمدەرىنىڭ ءبىرى تىركەلدى.

وسىلايشا، III توقساننىڭ ناتيجەلەرى الەۋمەتتىك ماڭىزى بار ينفراقۇرىلىمنىڭ وڭىرلىك ورتانىڭ باسىم جاقتارىنىڭ ءبىرى بولىپ قالا بەرەتىنىن كورسەتەدى. ەڭ جوعارى باعالار ءبىلىم بەرۋگە، بالالاردىڭ دامۋىنا، سونداي-اق حالىقتىڭ مادەني جانە سپورتتىق بەلسەندىلىگىنە تىكەلەي بايلانىستى نىساندارعا بەرىلگەن. سونىمەن قاتار زەرتتەۋ ودان ءارى دامىتۋعا باسىمدىق بەرۋدى قاجەت ەتەتىن ناقتى باعىتتاردى، ەڭ الدىمەن تسيفرلىق جانە كولىك ينفراقۇرىلىمىن بەلگىلەۋگە مۇمكىندىك بەرەدى.

جالپى العاندا، الىنعان ناتيجەلەر حالىقتىڭ بازالىق ينفراقۇرىلىمعا قاناعاتتانۋ دەڭگەيىنىڭ جوعارى بولىپ ساقتالعانىن كورسەتەدى. سونىمەن قاتار بۇل ناتيجەلەر وڭىرلەردىڭ قازىرگى جاعدايىن باعالاۋعا عانا ەمەس، حالىقتىڭ ءومىر ءسۇرۋ ساپاسىن ودان ءارى ارتتىرۋدىڭ باسىم باعىتتارىن ايقىنداۋعا نەگىز بولادى.

«قازاقستانداعى قوعامدىق-ساياسي جاعدايدىڭ نەگىزگى ينديكاتورلارى بويىنشا توقسان سايىنعى ساۋالناما» 2026 جىلدىڭ III توقسانىندا قازاقستاندىق قوعامدىق دامۋ ينستيتۋتى تاراپىنان جەكە سۇحبات ادىسىمەن جۇرگىزىلدى. زەرتتەۋدىڭ ىرىكتەمە جيىنتىعى – 18 جاستان اسقان 2 400 رەسپوندەنت. زەرتتەۋ جۇرگىزىلگەن اۋماققا رەسپۋبليكالىق ماڭىزى بار قالالار – استانا، الماتى جانە شىمكەنت، 17 وبلىس ورتالىعى، سونداي-اق اۋىلدىق ەلدى مەكەندەر قامتىلدى. ساۋالناما 2026 جىلعى 1-16 تامىز ارالىعىندا جۇرگىزىلدى.

Abai.kz