جەتىسۋ وبلىسىنداعى «كوكتال» وقۋ-جاتتىعۋ پوليگونىندا قازاقستان، قىرعىزستان، رەسەي جانە تاجىكستان اسكەري قىزمەتشىلەرى «شەپ-2026» بىرلەسكەن وقۋ-جاتتىعۋىن باستادى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.

«جەتىسۋ وبلىسىنداعى «كوكتال» وقۋ-جاتتىعۋ پوليگونىندا ورتالىق ازيا ءوڭىرىنىڭ جەدەل ورنالاستىرۋ ۇجىمدىق كۇشتەرىمەن «شەپ-2026» بىرلەسكەن وقۋ-جاتتىعۋى باستالدى. شارا بارىسىندا قازاقستان، قىرعىزستان، رەسەي جانە تاجىكستان اسكەري قىزمەتشىلەرى بىرلەسكەن دايىندىق، باسقارۋ ورگاندارى مەن ۇلتتىق كونتينگەنتتەردىڭ ءوزارا ءىس-قيمىل ماسەلەلەرىن پىسىقتايدى. جىل سايىن وتكىزىلەتىن وقۋ-جاتتىعۋ جەدەل ورنالاستىرۋ ۇجىمدىق كۇشتەرىنىڭ بىرلەسكەن تاپسىرمالاردى ورىنداۋعا دايىندىعى مەن ءوزارا ارەكەتتەستىك دەڭگەيىن ارتتىرۋعا باعىتتالعان»، — دەلىنگەن حابارلامادا.

اشىلۋ سالتاناتىنا ۇقشۇ باس حاتشىسىنىڭ ورىنباسارى ميرلان تۋرگۋنبەكوۆ، قازاقستان قارۋلى كۇشتەرى باس شتابى باستىعىنىڭ ورىنباسارى گەنەرال-مايور اسقار جولامانوۆ، ۇقشۇ بىرىككەن شتابى باستىعىنىڭ ورىنباسارى گەنەرال-لەيتەنانت رۋسلان شپەكباەۆ جانە باسقا دا شاقىرىلعان لاۋازىمدى تۇلعالار قاتىستى.

ۆەدومستۆو مالىمەتىنشە، وقۋ-جاتتىعۋ 13–18 قىركۇيەك ارالىعىندا قر قك دەسانتتىق-شابۋىلداۋ اسكەرلەرىنىڭ قولباسشىسى پولكوۆنيك ماحسۋت گۋسەينوۆتىڭ باسشىلىعىمەن وتۋدە. وعان 1,5 مىڭعا جۋىق اسكەري قىزمەتشى، 300-دەن استام قارۋ-جاراق، اسكەري جانە ارنايى تەحنيكا، سونىڭ ىشىندە 115 ۇشقىشسىز ۇشۋ اپپاراتى تارتىلعان.

قورعانىس مينيسترلىگى اتاپ وتكەندەي، پراكتيكالىق شارالار تاۋلى-ءشولدى جەرلەردىڭ ەرەكشەلىكتەرىن ەسكەرە وتىرىپ جۇرگىزىلۋدە. سونداي-اق وقۋ-جاتتىعۋ بارىسىندا قازاقستاننىڭ شەكارا قىزمەتى جانە ۇلتتىق ۇلانى بولىمشەلەرىمەن ءوزارا ءىس-قيمىل ماسەلەلەرى دە پىسىقتالادى.

Abai.kz