باتىس قازاقستان وبلىسىندا قىزمەتتىك مىندەتىن اتقارۋ كەزىندە ءورت ءسوندىرۋ ءبولىمىنىڭ ۆزۆود كومانديرى ميرشات حاليۋللين قازا تاپتى. قۇتقارۋشى تابيعي ءورتتى ءسوندىرۋ كەزىندە اۋىر جاراقات العان، دەپ حابارلايدى Ulysmedia.kz.

قايعىلى وقيعا جانىبەك اۋدانىندا بولعان. تاۋ اۋداندىق وكرۋگىنە قاراستى «تاتران» قىستاعىندا قۋراعان ءشوپ ورتەنگەن. ورتپەن كۇرەسۋگە ءورت ءسوندىرۋ جاساعى جىبەرىلگەن. الايدا وقيعا ورنىنا بارعان جاس كوماندير قازا تاپتى.

ءورتتى ءسوندىرۋ كەزىندە ميرشات حاليۋللين اۋىر جاراقات العان. ارىپتەستەرى ونى شۇعىل تۇردە جانىبەك اۋىلىنىڭ اۋداندىق اۋرۋحاناسىنا جەتكىزگەن. الايدا دارىگەرلەردىڭ كورسەتكەن كومەگىنە قاراماستان، قۇتقارۋشى كوز جۇمدى.

ميرشاتتىڭ قازاسى ونىڭ جاقىندارىنىڭ قابىرعاسىن قايىستىردى. جاس جىگىت وتباسىنىڭ نەگىزگى اسىراۋشىسى بولعان. ارتىندا اكەسى، ءىنىسى مەن قارىنداسى قالدى.

ۆەدومستۆونىڭ رەسمي مالىمدەمەسى

بقو توتەنشە جاعدايلار دەپارتامەنتى قىزمەتكەردىڭ كاسىبي مىندەتىن اتقارۋ كەزىندە قازا بولعانىن راستادى. قازىر وقيعاعا قاتىستى تەكسەرۋ باستالعان.

– ءورتتى ءسوندىرۋ جۇمىستارىن جۇرگىزۋ كەزىندە قىزمەتتىك مىندەتىن اتقارىپ جۇرگەن قىزمەتكەر جاراقات الدى. زارداپ شەككەن ادام اۋداندىق اۋرۋحاناعا جەتكىزىلدى، الايدا سول جەردە قايتىس بولدى. وسى فاكتى بويىنشا ءتيىستى تەكسەرۋ جۇرگىزىلىپ، وقيعانىڭ بارلىق ءمان-جايى انىقتالىپ جاتىر. قازا بولعان قىزمەتكەردىڭ وتباسىنا قاجەتتى كومەك پەن قولداۋ كورسەتىلدى، سونىڭ ىشىندە جەرلەۋ ءراسىمىن ۇيىمداستىرۋعا جاردەم بەرىلدى، – دەپ حابارلادى بقو تجد ءباسپاسوز قىزمەتى.

تەرگەۋ ورگاندارى ءورتتى ءسوندىرۋ كەزىندە بولعان وقيعانىڭ ءمان-جايىن انىقتاپ، قىزمەتكەردىڭ ولىمىنە اكەپ سوققان اۋىر جاراقاتتاردىڭ ناقتى سەبەبىن انىقتاۋعا ءتيىس.

Abai.kz