تاجىكستاننىڭ ەنەرگەتيكا جانە سۋ رەسۋرستارى ءمينيسترى دالەر جۋما «Trans-Tajik Gas Pipeline Company» تاجىك-قىتاي بىرلەسكەن كاسىپورنىنىڭ باسشىلىعىمەن «ورتالىق ازيا – قىتاي» گاز قۇبىرىنىڭ ءتورتىنشى جەلىسىن سالۋ جوباسىن تالقىلادى. بۇل تۋرالى تاجىكستاننىڭ «حوۆار» مەملەكەتتىك اقپارات اگەنتتىگى حابارلادى.

كەزدەسۋدە تۇرىكمەنستان گازىن وزبەكستان، تاجىكستان جانە قىرعىزستان اۋماعى ارقىلى قىتايعا جەتكىزۋگە ارنالعان «D» جەلىسى ءسوز بولدى. جالپى ۇزىندىعى 966 شاقىرىمدى قۇرايتىن بۇل قۇبىردىڭ 391 شاقىرىمى تاجىكستان جەرى ارقىلى وتەدى. جوسپارعا سايكەس، ماگيسترالدىڭ وتكىزۋ قابىلەتى جىلىنا 25-تەن 30 ميلليارد تەكشە مەترگە دەيىن گاز تاسىمالداۋعا مۇمكىندىك بەرەدى.

تاجىكستان ەنەرگەتيكا مينيسترلىگىنىڭ مالىمەتىنشە، جوباعا 3 ميلليارد دوللاردان استام قىتاي ينۆەستيتسياسى تارتىلىپ، 3000-نان استام تۇراقتى جۇمىس ورنى اشىلادى دەپ كۇتىلۋدە.

قازىرگى ۋاقىتتا تۇركىمەن گازى قىتايعا وزبەكستان مەن قازاقستان اۋماعى ارقىلى وتەتىن «ا»، «ۆ» جانە «س» دەپ اتالاتىن ءۇش جەلىمەن جەتكىزىلۋدە. ولاردىڭ جالپى قۋاتى جىلىنا 55 ميلليارد تەكشە مەتردى قۇرايدى. ال جاڭا «D» جەلىسى ىسكە قوسىلعاننان كەيىن بۇكىل جۇيەنىڭ وتكىزۋ قابىلەتى جىلىنا 85 ميلليارد تەكشە مەترگە دەيىن ارتادى.

Abai.kz