2026 جىلعى 19 قىركۇيەكتە تۇركى الەمى كومپوزيتورلارىنىڭ I قۇرىلتايى اياسىندا تۇركى ەلدەرىنىڭ جەتەكشى مۋزىكالىق ۇيىمدارىنىڭ وكىلدەرى Turkic Union of Composers (TUC) – تۇركى الەمى كومپوزيتورلارىنىڭ وداعىنىڭ نەگىزىن قالادى.

بۇل تاريحي شەشىم كومپوزيتورلار، مۋزىكاتانۋشىلار، ورىنداۋشىلار، كونسەرۆاتوريالار، مۋزىكا اكادەميالارى مەن تۇركى ەلدەرىنىڭ شىعارماشىلىق وداقتارى اراسىنداعى تۇراقتى كاسىبي ىنتىماقتاستىقتىڭ نەگىزىن قالاعان باكۋ دەكلاراتسياسىنا قول قويۋمەن بەكىتىلدى.

TUC-تىڭ قۇرىلۋى قۇرىلتايدىڭ باستى وقيعاسىنا اينالدى. تۇركى مەملەكەتتەرى كومپوزيتورلارىنىڭ ىنتىماقتاستىعى العاش رەت ءبىرتۇتاس ينستيتۋتسيونالدىق نەگىز بەن ۇزاقمەرزىمدى حالىقارالىق پلاتفورماعا يە بولدى. بۇل تۇركى الەمىنىڭ مۋزىكا تاريحىندا جاڭا پاراق اشىپ، ورتاق مادەني مۇرادان بىرلەسكەن شىعارماشىلىققا جانە الەمدىك ساحناداعى ءبىرتۇتاس ۇنگە باستايتىن جاڭا مۇمكىندىكتەرگە جول اشتى.

«ءبىزدىڭ ماقساتىمىز – تۇركى حالىقتارىنىڭ باي مۇراسى جاڭا تۋىندىلاردىڭ، كاسىبي ىنتىماقتاستىقتىڭ جانە حالىقارالىق مادەني ديالوگتىڭ قاينار كوزىنە اينالاتىن جاندى مۋزىكالىق كەڭىستىك قالىپتاستىرۋ. باكۋدە ءوتىپ جاتقان ءبىرىنشى قۇرىلتاي جانە Turkic Union of Composers (TUC) قۇرىلۋى تۇركى الەمىنىڭ مۋزىكالىق ديپلوماتياسى تاريحىندا جاڭا پاراق اشۋدا»، – دەپ اتاپ ءوتتى تۇركى مادەنيەتى جانە مۇراسى قورىنىڭ پرەزيدەنتى، پروفەسسور اقتوتى رايىمقۇلوۆا.

TUC تۇركى الەمىنىڭ شىعارماشىلىق الەۋەتىن بىرىكتىرۋگە، زاماناۋي كومپوزيتورلىق مەكتەپتەردى قولداۋعا، جاڭا مۋزىكالىق تۋىندىلاردىڭ دۇنيەگە كەلۋىنە ىقپال ەتۋگە جانە تۇركى حالىقتارىنىڭ مۋزىكاسىن الەمنىڭ ءىرى حالىقارالىق ساحنالارىندا كەڭىنەن تانىتۋعا باعىتتالعان.

كورنەكتى مۋزىكالىق داستۇرلەرى بار، الەمدىك مادەنيەتكە ۇزەير گادجيبەيلى، قارا قاراەۆ، فيكرەت ءامىروۆ جانە باسقا دا ۇلى كومپوزيتورلاردى سىيلاعان ازەربايجاندا TUC-تىڭ قۇرىلۋى ايرىقشا مانگە يە.

تۇركى الەمى كومپوزيتورلارىنىڭ I قۇرىلتايى 2026 جىلعى 18-20 قىركۇيەك ارالىعىندا XVIII ۇزەير گادجيبەيلى حالىقارالىق مۋزىكا فەستيۆالى اياسىندا وتۋدە. جوبا ازەربايجان رەسپۋبليكاسىنىڭ مادەنيەت مينيسترلىگى مەن تۇركى مادەنيەتى جانە مۇراسى قورى تاراپىنان يسەسكو-نىڭ باكۋ وڭىرلىك كەڭسەسى، ازەربايجان كومپوزيتورلار وداعى جانە ازەربايجان ۇلتتىق كونسەرۆاتورياسىمەن بىرلەسىپ جۇزەگە اسىرىلۋدا.

باكۋ قالاسى، ازەربايجان

Abai.kz