ازەربايجان ءسىم كاسپيدە قازا تاپقان قازاقستاندىق اسكەريلەرگە بايلانىستى كوڭىل ايتتى...

ازەربايجان ءسىم كاسپي تەڭىزىندە اسكەري-تەڭىز كۇشتەرىنىڭ جاتتىعۋى كەزىندە قازاقستاندىق اسكەري قىزمەتشىلەردىڭ قازا تابۋىنا بايلانىستى كوڭىل ايتتى. ءتيىستى مالىمدەمەنى ازەربايجاننىڭ سىرتقى ساياسي ۆەدومستۆوسى جاريالادى.

«قايعىلى قازاعا بايلانىستى قابىرعامىز قايىسىپ وتىر»، - دەدى باكۋ.

ازەربايجان ءسىم-ءى قازا تاپقانداردىڭ وتباسىلارى مەن جاقىندارىنا، سونداي-اق قازاقستان حالقى مەن ۇكىمەتىنە كوڭىل ايتتى.

«قازاقستان اسكەري-تەڭىز كۇشتەرىنىڭ كاسپي تەڭىزىندەگى اسكەري جاتتىعۋلارى كەزىندە اسكەري قىزمەتشىلەردىڭ قايعىلى قازاعا ۇشىراۋىنا بايلانىستى قابىرعامىز قايىسىپ وتىر. قازا تاپقان اسكەري قىزمەتشىلەردىڭ وتباسىلارى مەن جاقىندارىنا، سونداي-اق باۋىرلاس قازاقستان حالقى مەن ۇكىمەتىنە تەرەڭ قايعىرىپ كوڭىل ايتامىز. اللا تاعالا مارقۇمدارعا ماڭگىلىك تىنىشتىق، ال ولاردىڭ وتباسىلارىنا وسى ءبىر اۋىر ساتتە ءتوزىم مەن سابىر بەرسىن»، — دەلىنگەن حابارلامادا.

ۆەدومستۆو جالعاسىپ جاتقان ىزدەستىرۋ-قۇتقارۋ وپەراتسياسى تۋرالى دا بولەك توقتالىپ ءوتتى: «ءالى دە ءىز-ءتۇزسىز جوعالعاندار تىزىمىندە جۇرگەندەر امان-ەسەن قۇتقارىلادى دەپ ۇمىتتەنەمىز، ال زارداپ شەككەن اسكەري قىزمەتشىنىڭ تەزىرەك ساۋىعىپ كەتۋىن تىلەيمىز»، - دەدى.

تراگەديا تۋرالى نە بەلگىلى؟

24 قىركۇيەكتە ماڭعىستاۋ وبلىسىندا اسكەري-تەڭىز كۇشتەرىنىڭ جاتتىعۋى كەزىندە اسكەري قىزمەتشىلەردى تەڭىزگە اعىزىپ اكەتتى. قازاقستان قورعانىس مينيسترلىگىنىڭ الدىن الا مالىمەتىنشە، بۇل مەتەورولوگيالىق جاعدايدىڭ كەنەتتەن ناشارلاۋى مەن جەلدىڭ كۇشەيۋى سالدارىنان بولعان.

تەڭىزگە 19 اسكەري قىزمەتشى اعىپ كەتكەن. توعىز ادام قازا تاپتى، ۇشەۋى قۇتقارىلدى، ولاردىڭ ءبىرى اۋرۋحاناعا جاتقىزىلدى. قالعاندارىن ىزدەۋ جۇمىستارى جالعاسۋدا.

اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالدى. بۇدان بولەك، وقيعانىڭ سەبەپتەرىن تەكسەرۋ ءۇشىن ۇكىمەتتىك كوميسسيا قۇرىلدى.

Abai.kz