قازاقستان حالىق كەڭەسىنىڭ مۇشەلەرى شاحمۇرات ءمۇتالىپ پەن گادجي گادجيەۆ كاسپي تەڭىزىندەگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ وتباسىلارىنا قارجىلاي كومەك كورسەتىلەتىنىن مالىمدەدى.

كاسىپكەر، قازاقستان بوكس فەدەراتسياسىنىڭ پرەزيدەنتى شاحمۇرات ءمۇتالىپ Integra Construction KZ كومپانياسى قازا تاپقان ءار اسكەري قىزمەتشىنىڭ وتباسىنا 25 ملن تەڭگەدەن بەرەتىنىن ايتتى.

ونىڭ سوزىنشە، بۇل كومەك مەملەكەتتىك قولداۋعا قوسىمشا رەتىندە ءار وتباسىنا جەكە تارتىپپەن كورسەتىلەدى.

«قايتىس بولعان بالانى ەشقانداي اقشا قايتارا المايدى. الايدا مۇنداي ساتتە بىردە-ءبىر وتباسى قايعىسىمەن جالعىز قالماۋى كەرەك»، – دەپ جازدى شاحمۇرات ءمۇتالىپ.

ال قازاقستان حالىق كەڭەسىنىڭ تاعى ءبىر مۇشەسى، قازاقستان اۋىر اتلەتيكا فەدەراتسياسىنىڭ پرەزيدەنتى گادجي گادجيەۆ قازا تاپقان اسكەري قىزمەتشىلەردىڭ وتباسىلارىنا 100 ملن تەڭگە كولەمىندە ماتەريالدىق كومەك كورسەتۋ تۋرالى شەشىم قابىلداعانىن حابارلادى.

ەكى قوعام قايراتكەرى دە قازا بولعانداردىڭ تۋعان-تۋىستارى مەن ارىپتەستەرىنە كوڭىل ايتتى.

ەسكە سالايىق، 24 قىركۇيەكتە كاسپي تەڭىزىنىڭ جاعالاۋىندا وقۋ-جاۋىنگەرلىك تاپسىرمانى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋىنە بايلانىستى اسكەري قىزمەتشىلەردى تەڭىز سۋى الىپ كەتكەن.

ۇكىمەتتىك كوميسسيانىڭ ناقتىلانعان مالىمەتىنە سايكەس، تەڭىزگە 17 اسكەري قىزمەتشى كەتكەن. ونىڭ 12-ءسى قازا تاپتى، ۇشەۋى قۇتقارىلدى. تاعى ەكى اسكەري قىزمەتشىنى ىزدەۋ جۇمىستارى جالعاسىپ جاتىر.

تراگەدياعا بايلانىستى قىلمىستىق ءىس قوزعالىپ، وقيعانىڭ ءمان-جايىن انىقتاۋ ءۇشىن ارنايى جەدەل-تەرگەۋ توبى قۇرىلدى.

قازاقستان پرەزيدەنتى قاسىم-جومارت توقاەۆتىڭ شەشىمىمەن 25 قىركۇيەك قازاقستاندا جالپىۇلتتىق ازا تۇتۋ كۇنى بولىپ جاريالاندى.

Abai.kz