جەتىسۋ وبلىسىندا اقسۋ جانە كوكسۋ قانت زاۋىتتارى شارۋاشىلىقتاردان ءونىم قابىلداي باستادى. اتالعان ەكى كاسىپورىندا جالپى كولەمى 585 مىڭ توننا ءونىم وڭدەلەدى دەپ كۇتىلۋدە، سونىڭ 211 مىڭ تونناسى اقسۋ زاۋىتىندا، 374 مىڭ تونناسى كوكسۋ زاۋىتىندا وڭدەلمەك. جالپى، 101 مىڭ توننا قانت ءوندىرۋ جوسپارلانعان، ونىڭ 71 مىڭ توننا قانت قىزىلشاسىنان، 30 مىڭ توننا قانت قۇراعىنان الىنادى دەپ مەجەلەنىپ وتىر.

- زاۋىتتاردا كەستە جاسالىپ، بەكىتىلدى. مۇنداي ءتارتىپ كەلىپ تۇسەتىن ءونىم لەگىن رەتتەۋگە جانە قانت قىزىلشاسىن وڭدەۋگە وتكىزۋ كەزىندە كەزەكتىڭ پايدا بولۋ قاۋپىن ازايتۋعا مۇمكىندىك بەرەدى. قازىرگى ۋاقىتتا ەكى زاۋىتتا دا ءونىمدى قابىلداۋ مەن وڭدەۋگە دايىنداۋ جۇمىستارى اياقتالدى. كوكسۋ زاۋىتىنىڭ جۇمىس جوسپارىنا سايكەس، جوندەۋ جۇمىستارى 20 قىركۇيەكتە اياقتالدى. سونىمەن قاتار قىزىلشا قابىلداۋعا 5 بۋم ماشيناسى دايىندالدى، زەرتحاناعا جاڭا جابدىقتار ورناتىلدى. اقسۋ قانت زاۋىتىندا دا جابدىقتار جوندەلدى. سونداي-اق ەكى قازاندىق تولىقتاي تابيعي گازعا اۋىستىرىلدى. ەكى جاڭا قىزىلشا كەسكىش پەن اك-گاز پەشىن مونتاجداۋ جۇمىستارى اياقتالدى، ەلەكتر تسەحىنداعى جوعارى كەرنەۋلى ەلەكتر جابدىقتارىنا سىناق جۇرگىزىلىپ، جاڭا بۋم ماشيناسى ساتىپ الىندى، - دەدى وبلىستىق اۋىل شارۋاشىلىعى باسقارماسىنىڭ باسشىسى ن. كەنەنباەۆ.

ءوندىرىس قۋاتتىلىعىن ارتتىرۋ ماقساتىندا زاۋىتتار كەزەڭ-كەزەڭىمەن  جاڭعىرتۋدان وتكىزىلۋدە.

اتاپ ايتقاندا، كوكسۋ زاۋىتىنىڭ قۋاتىن جىلىنا 250-دەن 500 مىڭ تونناعا دەيىن ۇلعايتا وتىرىپ جاڭارتۋ جۇرگىزىلۋدە، جاڭعىرتۋ جۇمىستارى 2027 جىلى اياقتالادى. تارتىلاتىن ينۆەستيتسيالار كولەمى 29 ملرد. تەڭگەنى قۇرادى.

- ازىق-تۇلىك تسەحىن جاڭعىرتۋدىڭ ءبىرىنشى كەزەڭىن بىتىردىك. قازىر  ەكىنشى كەحەڭى ءجۇرىپ جاتىر، جۋىردا ونى دا اياقتايمىز. بۇگىنگى كۇنى كۇنىنە 2 توننادان قابىلداپ جاتىرمىز، ەڭ الدىمەن ەرتە پىسەتىن سورتتاردى قابىلداي باستادىق. بۇدان ءارى كۇندەلىكتى قابىلداۋدى ارتتىرامىز. زاۋىت قازىر وڭدەۋ پروتسەسىنە دايىندالۋدا، جۋىردا وڭدەۋگە كىرىسەمىز. جاڭا قۇرال-جابدىقتاردى ورناتۋدىڭ ارقاسىندا وڭدەۋ قۋاتىن تاۋلىگىنە 3 مىڭ تونناعا دەيىن ارتتىرا الامىز، الداعى ۋاقىتتا جاڭعىرتۋ اياقتالعاننان كەيىن بۇل كورسەتكىش 5 مىڭ تونناعا جەتكىزىلەدى. جالپى كاسىپورىندى مودەرنيزاتسيادان وتكىزۋ وڭدەۋ كولەمىن ارتتىرۋعا، سوعان سايكەس قىزىلشانىڭ كاگات الاڭىندا قىسقا مەرزىم عانا جاتۋىنا مۇمكىندىك بەرەدى، ياعني الىنعان قانت ساپاسى جاقسارادى دەگەن ءسوز، - كوكسۋ قانت زاۋىتىنىڭ ديرەكتورى التىنبەك اباتوۆ.

قازىرگى تاڭدا كاسىپورىننىڭ جۇمىسىنا 400 ادام تارتىلعان. ءونىمدى قايتا وڭدەۋ جۇمىستارى باستالعاننان كەيىن قىزمەتكەرلەر سانى ارتا تۇسپەك.

كوكسۋ قانت زاۋىتىنا ءونىمدى قايتا وڭدەۋگە العاشقىلاردىڭ ءبىرى بولىپ جارلىوزەك اۋىلدىق وكرۋگىندەگى «قىدىرالى» شارۋا قوجالىعىنىڭ ماماندارى جەتكىزدى.

– قانت قىزىلشاسىن زاۋىتقا جەتكىزۋمەن اينالىسامىن. زاۋىت تاراپىنان ءونىمدى قابىلداۋدا ەشقانداي قيىندىق جوق. كۇنىنە 3-4 رەيس جاسايمىز. كەشە كەلدىم، بۇگىن كەزەك بويىنشا بەسىنشىمىن. كەزەك جىلدام جىلجىپ جاتىر، سوندىقتان بۇگىن ءونىمىمدى زاۋىتقا وتكىزەمىن. سوڭعى جىلدارى ونىمدىلىك جاقسى بولدى، ال بيىلعى كورسەتكىش ودان دا جوعارى، – دەدى «قىدىرالى» شارۋا قوجالىعىنىڭ جۇرگىزۋشىسى اسەت شەڭگەلباەۆ.

شارۋالار اقسۋ قانت زاۋىتىنا دا ءتاتتى ءتۇبىردى وڭدەۋگە بەلسەندى جەتكىزۋدە.

- ءبىز القاپتان قىزىلشا جيناۋدى 23 قىركۇيەكتەن باستادىق. بۇگىن زاۋىتقا العاشقى ءونىمىمىزدى وڭدەۋگە الىپ كەلدىك. بيىل قانت قىزىلشاسىن 15 گەكتارعا سەپتىك، ءار گەكتارىنان 50 تسەنتنەردەن الىپ جاتىرمىز، بيىل ءونىم شىعىمى جاقسى، - دەدى «دارحان» شارۋا قوجالىعىنىڭ جەتەكشىسى نۇرجۇما تىلەۋلىۇلى.

اقسۋ قانت زاۋىتىن ينۆەستور بيىلدان باستاپ جاڭعىرتۋدى جوسپارلاپ وتىر. بۇل وندىرىستىك قۋاتتىلىعىن 350 مىڭ توننادان 600 مىڭ تونناعا دەيىن ۇلعايتۋ ءۇشىن قولعا الىنۋدا. جاڭعىرتۋ جۇمىستارى 2028 جىلى اياقتالادى. جوبانىڭ قۇنى - 25 ملرد. تەڭگە.

بيىل جەتىسۋ وبلىسىندا قانت قىزىلشاسى 13,5 مىڭ گەكتار القاپقا ەگىلدى. بۇل وتكەن جىلعى كورسەتكىشتەن 1,3 مىڭ گەكتارعا ارتىق.

Abai.kz