بيىل Almaty Marathon اياسىنداعى ەكولوگيالىق باعدارلاما بىردەن بىرنەشە كەزەڭدە – ستارتتىق جيىنتىقتاردى تاراتۋ كەزىندە، جارىس جولىندا جانە مارەگە جەتۋ ايماعىندا ۇيىمداستىرىلدى. بۇل تۋرالى «Eco Almaty» جشس وكىلدەرى حابارلادى.

مارەگە جەتۋ ايماعىندا Eco Network الاڭى جۇمىس ىستەپ، قاتىسۋشىلار مەن قوناقتارعا قالدىقتاردى بولەك جيناۋ تۋرالى اقپارات بەرىلدى. سونداي-اق قايتا وڭدەۋگە قانداي قالدىق تۇرلەرىن تاپسىرۋعا بولاتىنى كورسەتىلدى.

باعدارلاما اياسىندا پلاستيك قاقپاقتاردى قايتا وڭدەۋ ۇدەرىسى دە كورسەتىلدى. كەلۋشىلەر پلاستيكتىڭ قالاي سۇرىپتالىپ، كەيىن قايتا پايدالانۋعا دايىندالۋ ءۇشىن ۇساقتالاتىنىن كوردى. مۇندا قايتا وڭدەلگەن شيكىزاتتان جاسالعان بۇيىمدار، سونىڭ ىشىندە «مەن الماتىنى جاقسى كورەمىن» جانە «مارافونعا جۇگىرەمىن» توپتامالارىنان برەلوكتار ۇسىنىلدى.

بالالار ءۇشىن قالدىقتاردى سۇرىپتاۋ جانە قايتا وڭدەۋگە ارنالعان ەكولوگيالىق ۆيكتورينالار مەن بايقاۋلار ۇيىمداستىرىلدى.

قايتا وڭدەۋگە جارامدى قالدىقتار جارىس جولىنىڭ بويىندا دا جينالدى. سۋ بەرۋ نۇكتەلەرىندە ەرىكتىلەر پايدالانىلعان پلاستيك بوتەلكەلەر مەن ستاقانداردى جينادى. مارافون اياقتالعاننان كەيىن ولار سۇرىپتالىپ، ولشەنىپ، قايتا وڭدەۋگە جىبەرىلەدى.

جۇمىس Almaty Marathon Expo كەزىندە باستالدى. ستارتتىق جيىنتىقتاردى تاراتۋ كۇندەرى Eco Network ەرىكتىلەرمەن بىرلەسىپ، كارتون قوراپتار مەن باسقا دا قاپتاما قالدىقتارىن جيناپ، كەيىن سۇرىپتاۋ جانە قايتا وڭدەۋ ءۇشىن وتكىزدى.

Abai.kz