قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ سانكت-پەتەربۋرگتە وتكەن XII حالىقارالىق بىرىككەن مادەنيەتتەر فورۋمىنا قاتىستى. فورۋمعا شەتەلدىك 43 رەسمي دەلەگاتسيا جينالدى. سونىڭ 18-ىنە مادەنيەت مينيسترلەرى جەتەكشىلىك ەتتى.

فورۋم اياسىندا ارمان قىرىقباەۆ رەسەي فەدەراتسياسىنىڭ مادەنيەت ءمينيسترى ولگا ليۋبيموۆامەن كەزدەستى.

كەزدەسۋ باسىندا ولگا ليۋبيموۆا ماڭعىستاۋ وبلىسىندا قازا تاپقان قازاقستاندىق اسكەري قىزمەتشىلەردىڭ وتباسىلارى مەن جاقىندارىنا كوڭىل ايتتى.

تاراپتار قازاقستان مەن رەسەيدىڭ مادەنيەت سالاسىنداعى ىنتىماقتاستىعىن ودان ءارى دامىتۋ جونىندە پىكىر الماستى. اتاپ ايتقاندا، قازاقستان رەسپۋبليكاسى مەن رەسەي فەدەراتسياسى اراسىنداعى مادەني-گۋمانيتارلىق ىنتىماقتاستىق جونىندەگى كىشى كوميسسيانىڭ جۇمىسى مەن بىرلەسكەن جوبالاردى جۇزەگە اسىرۋ ماسەلەلەرىنە توقتالدى. كىشى كوميسسيانىڭ بەسىنشى وتىرىسىن 2027 جىلدىڭ ءبىرىنشى جارتىسىندا استانادا وتكىزۋ جوسپارلانىپ وتىر.

الداعى بىرلەسكەن مادەني جوبالار دا تالقىلاندى. 8 قازاندا ءابىلحان قاستەەۆ اتىنداعى قازاقستان رەسپۋبليكاسىنىڭ ۇلتتىق ونەر مۋزەيىندە «ناسلەديە ەپوحي. يسكۋسستۆو حح ۆەكا يز سوبرانيا گوسۋدارستۆەننوي ترەتياكوۆسكوي گالەرەي» كورمەسى اشىلادى. كورمەگە 30 تۋىندى قويىلادى. سونداي-اق تاراپتار قازاقستان رەسپۋبليكاسىنىڭ ۇلتتىق مۋزەيىندە «ەرميتاج كۇندەرى» جوباسىن وتكىزۋ جايىن قاراستىردى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تاپسىرماسىمەن ارمان قىرىقباەۆ ولگا ليۋبيموۆاعا II دارەجەلى «دوستىق» وردەنىن تابىس ەتتى. ولگا ليۋبيموۆا قازاقستان مەن رەسەي اراسىنداعى دوستىق پەن ىنتىماقتاستىقتى نىعايتۋعا، سونداي-اق ەكى ەلدىڭ مادەني بايلانىستارىن دامىتۋعا قوسقان ەلەۋلى ۇلەسى ءۇشىن ماراپاتتالدى.

Abai.kz