قازاقستان Coursera-نىڭ جي جانە ادامي داعدىلاردى دامىتۋ جونىندەگى جاڭا يندەكسىندە الەمدە 55-ورىنعا يە بولدى...

قازاقستان Coursera Global Skills Report 2026 جاھاندىق ەسەبى اياسىندا ۇسىنىلعان جاڭا AI-Human Skills Synergy Index 2026 يندەكسىندە 98 ەلدىڭ ىشىندە 55-ورىنعا يە بولدى. جاڭا يندەكس ءبىلىم الۋشىلاردىڭ جاساندى ينتەللەكت سالاسىنداعى داعدىلاردى ولاردى ءتيىمدى قولدانۋعا قاجەتتى سىني ويلاۋ، كوشباسشىلىق، كوممۋنيكاتسيا جانە كۇردەلى مىندەتتەردى شەشۋ سياقتى نەگىزگى ادامي قۇزىرەتتەرمەن قاتار قانشالىقتى بەلسەندى دامىتىپ جاتقانىن باعالايدى.

يندەكس ونلاين وقىتۋ پايدالانۋشىلارى اراسىندا داعدىلاردى دامىتۋ ديناميكاسىن، سونداي-اق ولاردى ەل دەڭگەيىندە قولدانۋعا قاجەتتى جاعدايلاردى ەسكەرەدى. Coursera ادىستەمەسىنە سايكەس قورىتىندى باعا داعدىلاردى مەڭگەرۋ دەڭگەيى، زەردەلەنەتىن قۇزىرەتتەردىڭ اۋقىمى جانە AI داعدىلارى مەن ادامي داعدىلاردىڭ ۇيلەسىمى جونىندەگى كورسەتكىشتەرگە، سونداي-اق Oxford Insights Government AI Readiness Index دەرەكتەرىنە نەگىزدەلەدى. اتالعان يندەكس مەملەكەتتەردىڭ جاساندى ينتەللەكت الەۋەتىن پايدالانۋ مۇمكىندىگىن مەملەكەتتىك ساياسات، ينفراقۇرىلىم، ادامي كاپيتال، AI سەكتورىنىڭ دامۋى جانە باسقا دا فاكتورلاردى ەسكەرە وتىرىپ باعالايدى.

«قازاقستان AI-Sana ۇلتتىق باعدارلاماسىن ىسكە قوسقاندا تسيفرلىق كۋرستارعا قولجەتىمدىلىكتى قامتاماسىز ەتۋ جەتكىلىكسىز ەكەنىن تۇسىندىك. جۇيەلى وزگەرىستەرگە قول جەتكىزۋ ءۇشىن الىنعان ءبىلىمدى ءبىلىم بەرۋ پروتسەسىنە ەنگىزىپ، ونى ءىس جۇزىندە قولدانۋعا مۇمكىندىك بەرەتىن جاعداي جاساۋ ماڭىزدى بولدى. بۇگىندە باعدارلاماعا 100 جوعارى وقۋ ورنى قاتىسىپ، كۋرستاردى ءبىلىم بەرۋ پروتسەسىنە ەنگىزۋ، ناتيجەلەردى باقىلاۋ جانە جاساندى ينتەللەكت تەحنولوگيالارىنىڭ قارقىندى دامۋىنا سايكەس وقۋ مازمۇنىن تۇراقتى تۇردە جاڭارتۋ باعىتىندا جۇمىس جۇرگىزىپ كەلەدى. سونىمەن قاتار وقىتۋشىلاردىڭ تسيفرلىق جانە پەداگوگيكالىق قۇزىرەتتەرىن دامىتۋعا ەرەكشە ءمان بەرىپ وتىرمىز. قازىردىڭ وزىندە 1 200-دەن استام پەداگوگ زاماناۋي ونلاين وقىتۋ ادىستەرىن مەڭگەرىپ، ساپالى 35 اۆتورلىق كۋرس ازىرلەۋگە قاتىستى. بۇل ءتاسىل جاساندى ينتەللەكت سالاسىنداعى بىلىمگە قولجەتىمدىلىكتى كەڭەيتىپ قانا قويماي ستۋدەنتتەردى وزگەرمەلى ەڭبەك نارىعىنىڭ تالاپتارىنا جۇيەلى تۇردە دايىنداۋعا مۇمكىندىك بەرەدى»، – دەدى قر عىلىم جانە جوعارى ءبىلىم ءمينيسترى ساياسات نۇربەك.

قازاقستاننىڭ ناتيجەسى تسيفرلىق وقىتۋدىڭ بەلسەندى پايدالانۋشىلارى اراسىندا جاساندى ينتەللەكت سالاسىنداعى تەحنيكالىق قۇزىرەتتەرگە عانا ەمەس، ولاردى ءىس جۇزىندە ءتيىمدى قولدانۋعا قاجەتتى داعدىلارعا دا تۇراقتى قىزىعۋشىلىق بار ەكەنىن كورسەتەدى. جاساندى ينتەللەكت ءبىلىم بەرۋ ۇدەرىسىنە، كاسىبي قىزمەتكە جانە كۇندەلىكتى جۇمىس مىندەتتەرىنە كەڭىنەن ەنىپ جاتقان قازىرگى جاعدايدا مۇنداي داعدىلاردى قاتار دامىتۋ ايرىقشا ماڭىزعا يە.

بۇل رەتتە AI-Human Skills Synergy Index كورسەتكىشتەرىن ونىڭ ادىستەمەلىك ەرەكشەلىكتەرىن ەسكەرە وتىرىپ قاراستىرعان ءجون. Coursera دەرەكتەرى نەگىزىنەن پلاتفورما پايدالانۋشىلارىنىڭ ءبىلىم الۋعا قاتىستى بەلسەندىلىگىن كورسەتەدى جانە ەلدەگى بارلىق حالىقتىڭ داعدىلار دەڭگەيىن تىكەلەي سيپاتتامايدى. سوندىقتان قازاقستاننىڭ ناتيجەسى تسيفرلىق وقىتۋعا قاتىسۋشىلار اراسىندا AI جانە ادامي داعدىلاردىڭ دامۋ ديناميكاسىن كورسەتەتىن حالىقارالىق كورسەتكىش ءارى قۇزىرەتتەردى دامىتۋداعى جاھاندىق ۇردىستەردى باعالاۋدىڭ قوسىمشا قۇرالى.

Abai.kz