قازاقستان رەسپۋبليكاسىنىڭ ۆيتسە-پرەزيدەنتى – الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى ەرلان قارين قاسيەتتى تاقتىڭ دىنارالىق ديالوگ جونىندەگى ديكاستەرياسىنىڭ پرەفەكتى، كاردينال دجوردج دجەيكوب كۋۆاكادپەن كەزدەستى. كاردينال استاناعا II بىرلەسكەن كوللوكۆيۋمعا قاتىسۋ ءۇشىن قاسيەتتى تاق دەلەگاتسياسىن باستاپ كەلدى.

كەزدەسۋ بارىسىندا كوللوكۆيۋم مەن سەزد اياسىنداعى ءوزارا ءىس-قيمىل ماسەلەلەرى، سونداي-اق بىرلەسكەن گۋمانيتارلىق باستامالاردى جۇزەگە اسىرۋ جايى تالقىلاندى.

كاردينال دجوردج كۋۆاكاد پرەزيدەنت قاسىم-جومارت توقاەۆقا ريم پاپاسى ءحىV لەونىڭ ىستىق ىقىلاسپەن جولداعان سالەمىن جانە قازاقستان حالقىنا ارناعان ىزگى تىلەگىن جەتكىزدى.

كەزدەسۋ قورىتىندىسى بويىنشا ەرلان قارين مەن كاردينال دجوردج كۋۆاكاد اۋىر ءارى جازىلمايتىن دەرتكە شالدىققان بالالاردىڭ ءومىرىن، دەنساۋلىعى مەن قادىر-قاسيەتىن قورعاۋعا ارنالعان II بىرلەسكەن كوللوكۆيۋمنىڭ اشىلۋ راسىمىنە قاتىستى.

ءىس-شاراعا مەملەكەتتىك ورگانداردىڭ، ءدىني ۇيىمداردىڭ، مەديتسينا، عىلىم جانە ءبىلىم بەرۋ مەكەمەلەرىنىڭ وكىلدەرى، سونداي-اق ساراپشىلار جينالدى.

كوللوكۆيۋمنىڭ اشىلۋىندا ءسوز سويلەگەن ەرلان قارين دىنارالىق ديالوگ ناقتى گۋمانيتارلىق ناتيجەلەرگە باعىتتالۋعا ءتيىس ەكەنىن اتاپ ءوتتى. سونىمەن قاتار مەملەكەت باسشىسى قاسىم-جومارت توقاەۆتىڭ باسشىلىعىمەن جۇزەگە اسىرىلىپ جاتقان اۋقىمدى ساياسي جانە الەۋمەتتىك-ەكونوميكالىق رەفورمالارعا توقتالدى.

ونىڭ ايتۋىنشا، جۇرگىزىلىپ جاتقان وزگەرىستەردىڭ باستى ماقساتى – ازاماتتاردىڭ ءال-اۋقاتىن ارتتىرۋ. ال بالالاردىڭ، اسىرەسە، الەۋمەتتىك تۇرعىدان ەڭ وسال توپتاعى بالالاردىڭ قۇقىقتارى مەن مۇددەلەرىن قورعاۋ مەملەكەتتىك ساياساتتاعى ماڭىزدى باسىمدىقتىڭ ءبىرى سانالادى.

كوللوكۆيۋمعا قاتىسۋشىلار قازاقستان مەن ۆاتيكاننىڭ بىرلەسكەن باستاماسى رەتىندە ۇسىنىلىپ وتىرعان جازىلمايتىن دەرتكە شالدىققان بالالاردىڭ قۇقىقتارى تۋرالى حارتيا جوباسىن تالقىلادى. ۆيتسە-پرەزيدەنت قۇجاتتى ازىرلەۋگە قوسقان ۇلەسى ءۇشىن ديكاستەريا مەن «بامبينو دجەزۋ» گوسپيتالىنە العىس ءبىلدىرىپ، اۋرۋحانانىڭ ءبىزدىڭ ەلدەگى «University Medical Center» كورپوراتيۆتىك قورىمەن ىنتىماقتاستىعىن اتاپ ءوتتى.

ءسوز سوڭىندا ۆيتسە-پرەزيدەنت قاتىسۋشىلارعا جەمىستى جۇمىس پەن مازمۇندى پىكىرتالاس تىلەدى.

Abai.kz