پرەزيدەنت قاسىم-جومارت توقاەۆ پەن ومان سۇلتانى حايسام بەن تاريق ءال سايد شاعىن قۇرامدا كەلىسسوز جۇرگىزدى. بۇل تۋرالى اقوردا حابارلادى.

پرەزيدەنت مارتەبەلى مەيمانعا ءىلتيپات ءبىلدىرىپ، ومان سۇلتانىنىڭ قازاقستانعا جاساعان ءبىرىنشى ساپارىنىڭ ماڭىزدى وقيعا ەكەنىن اتاپ ءوتتى.

– اسا مارتەبەلى سۇلتان، ەلىمىزگە العاش رەت مەملەكەتتىك ساپارمەن كەلگەن ءسىزدى قارسى الۋ – مەن ءۇشىن ۇلكەن مارتەبە. مۇنىڭ تاريحي ءمانى ەرەكشە ەكەنىنە سەنىمدىمىن. ويتكەنى بۇل ەلدەرىمىز اراسىنداعى سان قىرلى ىنتىماقتاستىقتى جانداندىرىپ، جاڭا دەڭگەيگە كوتەرۋگە جول اشادى. بۇعان دەيىن اتاپ وتكەندەي، ءوزارا ىقپالداستىقتىڭ الەۋەتى مول. مۇنى تولىعىمەن ىسكە اسىرۋ قاجەت، – دەدى قاسىم-جومارت توقاەۆ.

مەملەكەت باسشىسى ەلدەرىمىز سەنىمدى سەرىكتەسكە اينالۋى ءۇشىن بارىنشا كۇش سالاتىنىن ايتتى.

– قازاقستاندىقتار ەلىڭىزگە ەرەكشە قۇرمەتپەن قارايدى. ومانعا ساياحاتتاپ بارعان ازاماتتارىمىزدىڭ قاتارى قالىڭ. الايدا ماسكاتتى، وماننىڭ باسقا دا قالالارىن كورمەگەن وتانداستارىمىز بار. ەلدەرىمىز اراسىندا قوسىمشا تىكەلەي كوممەرتسيالىق اۋە رەيستەرى اشىلسا، بارىس-كەلىس الدەقايدا جاندانا تۇسەرى ءسوزسىز. ءسىزدىڭ ساپارىڭىز اياسىندا دوڭعا مۇناي كەن ورنىنا قاتىستى ماڭىزدى كەلىسىمگە قول قويىلعانىنان حاباردارمىن. بۇل دا قوس تاراپتىڭ ءوزارا قارىم-قاتىناستى ىلگەرىلەتۋگە مۇددەلى ءارى دايىن ەكەنىن كورسەتەدى. مۇنى ورتاق جەتىستىگىمىز دەپ سانايمىن، – دەدى قاسىم-جومارت توقاەۆ.

ومان سۇلتانى قوناقجايلىق تانىتقانى ءۇشىن مەملەكەت باسشىسىنا العىس ايتتى.

– كەيىنگى وتىز جىلدان اسا ۋاقىت ىشىندە قارىم-قاتىناسىمىز ايتارلىقتاي ىلگەرىلەپ، نىعايا ءتۇستى. بۇگىنگى كەزدەسۋىمىز قول جەتكىزىلگەن ناتيجەلەردى بەكەمدەپ، ەكىجاقتى بايلانىستاردى جاڭا دەڭگەيگە كوتەرەدى. ساپار اياسىندا ءوزارا تۇسىنىستىك جونىندەگى بىرقاتار كەلىسىم مەن مەموراندۋمعا قول قويامىز. ءسىزدىڭ قولداۋىڭىزبەن ەكونوميكا، ساياسي جانە مادەني-گۋمانيتارلىق سالالاردا بەرىك بايلانىس ورناتامىز دەپ سەنەمىن. ءبىز ەكى ەل اراسىنداعى بارىس-كەلىستىڭ ارتۋىنا مۇددەلىمىز. پرەزيدەنت مىرزا، جىلى قارسى العانىڭىز ءۇشىن تاعى دا العىس ايتامىن. وزىڭىزبەن جاقىن ارادا ماسكات قالاسىندا جۇزدەسەمىز دەپ ويلايمىن، – دەدى حايسام بەن تاريق ءال سايد.

Abai.kz