قازاقستاندا كاسىبي الەۋمەتتىك جۇمىستى زاڭنامالىق تۇرعىدان بەكىتۋ ۇسىنىلدى. بۇل تۋرالى ۆارشادا ءوتىپ جاتقان ەقىۇ-نىڭ ادامي ولشەم جونىندەگى كونفەرەنتسياسىندا «ۇلتتىق كاسىبي الەۋمەتتىك قىزمەتكەرلەر اليانسى» رقب پرەزيدەنتى دينارا ەسيموۆا مالىمدەدى.

ونىڭ ايتۋىنشا، 2025 جىلى اليانس مەملەكەتتىك ورگاندارمەن بىرلەسىپ، «الەۋمەتتىك جۇمىس تۋرالى» زاڭ جوباسىن ازىرلەگەن. قۇجات قازاقستاننىڭ الەۋمەتتىك كودەكسىن قايتالامايدى. زاڭ جوباسى كاسىبي الەۋمەتتىك جۇمىستى، الەۋمەتتىك قىزمەتكەردىڭ مارتەبەسىن جانە وسى باعىتتاعى مەملەكەتتىك ورگاندار مەن ۇيىمداردىڭ ءوزارا ءىس-قيمىل تەتىكتەرىن رەتتەۋگە باعىتتالعان.

«وسىعان بايلانىستى اليانس 2025 جىلى ازىرلەنگەن «الەۋمەتتىك جۇمىس تۋرالى» زاڭ جوباسى نەگىزىندە كاسىبي الەۋمەتتىك جۇمىستى زاڭنامالىق تۇرعىدان بەكىتۋ باعىتىنداعى جۇمىستى جالعاستىرۋ قاجەت دەپ سانايدى»، – دەدى دينارا ەسيموۆا.

ونىڭ سوزىنشە، مۇنداي زاڭ الەۋمەتتىك قىزمەتكەردىڭ مارتەبەسىن كوتەرىپ قانا قويماي، الەۋمەتتىك كومەك كورسەتۋ جۇيەسىنىڭ تيىمدىلىگىن ارتتىرۋعا جانە الەۋمەتتىك قولداۋعا مۇقتاج قازاقستاندىقتاردىڭ كوبىرەك بولىگىن قامتۋعا مۇمكىندىك بەرەدى.

«زاڭ الەۋمەتتىك قىزمەتكەردىڭ مارتەبەسىن كوتەرىپ قانا قويماي، الەۋمەتتىك كومەك كورسەتۋ جۇيەسىنىڭ تيىمدىلىگىن ارتتىرىپ، الەۋمەتتىك كومەك الاتىن قازاقستاندىقتاردىڭ سانىن كوبەيتۋگە مۇمكىندىك بەرەدى»، – دەدى ول.

بالالارعا كاسىبي الەۋمەتتىك كومەك قاجەت

دينارا ەسيموۆا قازاقستاندا شامامەن 7 ملن بالا بار ەكەنىن اتاپ ءوتتى. ونىڭ پىكىرىنشە، بالالاردىڭ ماسەلەلەرىن ەرتە انىقتاپ، ولارعا دەر كەزىندە كومەك كورسەتۋ ءۇشىن كاسىبي الەۋمەتتىك قىزمەتكەرلەر جەتكىلىكتى بولۋى كەرەك.

«الەمنىڭ كوپتەگەن وڭىرىندە تۋ كورسەتكىشى تومەندەپ جاتقانىمەن، ءبىزدىڭ ەلدە بالا تۋ دەڭگەيى ءالى دە جوعارى. وسىعان بايلانىستى ەڭبەك نارىعىندا كاسىبي الەۋمەتتىك قىزمەتكەرلەردىڭ ۇلەسى دە كوپ بولۋى كەرەك. بالا جالعىزدىق، قوعامنان وقشاۋلانۋ، وسالدىق نەمەسە مارگينالدانۋ سياقتى ماسەلەلەرگە تاپ بولعان كەزدە وعان جانىنان تابىلاتىن مامان قاجەت»، – دەدى ول.

ونىڭ ايتۋىنشا، بۇل باعىتتا قازاقستانعا بىلىكتى الەۋمەتتىك قىزمەتكەرلەر مەن قۇقىق قورعاۋ سالاسىنىڭ ماماندارى قاجەت.

«ول ءۇشىن قازاقستاندا الەۋمەتتىك جۇمىس سالاسىندا بىلىكتى مامانداردان تۇراتىن مىقتى كاسىبي ورتا قالىپتاستىرۋ قاجەت. سونىمەن قاتار وزىق حالىقارالىق تاجىريبەنى ەنگىزىپ، اكادەميالىق ىنتىماقتاستىقتى نىعايتۋ جانە قازاقستاندا كاسىبي الەۋمەتتىك جۇمىستىڭ دامۋىنا جاعداي جاساۋ ماڭىزدى»، – دەدى دينارا ەسيموۆا.

سونىمەن قاتار دينارا ەسيموۆا «ۇلتتىق قور – بالالارعا» باعدارلاماسىن الەۋمەتتىك ادىلەتتىلىكتى قامتاماسىز ەتۋگە باعىتتالعان باستامالاردىڭ ءبىرى رەتىندە اتادى.

«ادىلەتتى مەملەكەت ساياساتى اياسىنداعى شەشىمدەردىڭ ءبىرى – «ۇلتتىق قور – بالالارعا» باعدارلاماسى. بۇل – قازاقستاندا تۋعان جانە قازاقستان ازاماتى بولىپ تابىلاتىن بالالارعا بەرىلەتىن تولەم. قاراجاتتى ءبىلىم الۋعا نەمەسە تۇرعىن ءۇي جاعدايىن جاقسارتۋعا پايدالانۋعا بولادى. بۇل باستاما الەۋمەتتىك ادىلەتتىلىك قاعيداتتارىن جۇزەگە اسىرۋعا جانە ءار ازاماتتىڭ بالا كەزىنەن باستاپ مۇمكىندىكتەرىن كەڭەيتۋگە باعىتتالعان»، – دەدى اليانس پرەزيدەنتى.

Abai.kz