ەۋرووداق قيلى كەزەڭگە تاپ كەلسە دە، قاتارىن كوبەيتىپ، قۇرامىن ۇلعايتۋعا ءازىر. بريۋسسەل كەلىسسوزدەردىڭ ارالىق كەزەڭدەرىن جىلدامداتۋدى جانە ۇمىتكەر ەلدەردى ۇيىمنىڭ كەيبىر باعدارلامالارىنا ەرتەرەك قوسۋدى كوزدەيدى، دەپ حابارلايدى 24KZ.

قازىرگى تارتىپكە سايكەس ەۋرووداق كەڭەيگىسى كەلسە، 27 مەملەكەتتىڭ بارلىعىنىڭ كەلىسىمىن الۋى قاجەت. ۇيىمعا مۇشەلىككە ۇمىتكەر ەل شامامەن 150 كەزەڭنەن تۇراتىن تەكسەرۋدەن وتەدى. ەۋروكوميسسيا تالاپتاردىڭ ءبىر بولىگىن جەڭىلدەتىپ، شەشىمدى كوپشىلىك داۋىسپەن جىلدام قابىلداۋ ءتارتىبىن ۇسىنىپ وتىر.

جاڭا ەرەجەدە ەۋروپالىق وداق قۇرامىنا كىرىپ الىپ، دەموكراتيا ستاندارتتارىنان اۋىتقيتىندارعا قارسى تەتىكتەر دە قاراستىرىلعان. سەبەبى ۆەنگريامەن قۇقىق ۇستەمدىگى جانە ەۋروپالىق قۇندىلىقتار توڭىرەگىندەگى ۇزاققا سوزىلعان كەلىسپەۋشىلىكتەر ۇيىمعا ەلەۋلى ساباق بولدى. بريۋسسەل بولاشاقتا مەملەكەتتەردىڭ وسىنداي ارەكەتتەرىنە توسقاۋىل قويۋدى قالايدى.

مارتا كوس، ەۋروكوميسسيانىڭ كەڭەيۋ جونىندەگى كوميسسارى:

– ەۋرووداقتىڭ جاڭا مۇشەلەرى ءۇشىن 15 جىلدىق باقىلاۋ كەزەڭىن ەنگىزۋدى كوزدەپ وتىرمىز. وسى ۋاقىت ارالىعىندا اۋىر زاڭ بۇزۋشىلىقتار انىقتالسا، قولدانىستاعى تارتىپكە قاراعاندا جىلدامىراق شارا قابىلداۋعا مۇمكىندىگىمىز بولادى. مۇنداي تەتىك ەۋرووداقتىڭ بۇرىنعى تاجىريبەلەرى نەگىزىندە ازىرلەنىپ وتىر.

ياعني وسى ۋاقىت ارالىعىندا قۇقىق ۇستەمدىگى، دەموكراتيا نەمەسە ادال ىنتىماقتاستىق قاعيدالارىن بۇزعان ەلدىڭ ەۋرووداقتان الاتىن قارجىسى قىسقارۋى مۇمكىن. كەي جاعدايدا ونىڭ داۋىس بەرۋ قۇقىعىنا شەكتەۋ قويىلادى. ەۋروپارلامەنت دەپۋتاتتارى كەڭەيۋ ۇدەرىسىن جەدەلدەتۋ يدەياسىن قولدايدى. الايدا بۇل – تالاپتاردىڭ جەڭىلدەۋىنە اكەلمەۋى ءتيىس.

تونينو پيتسۋلا، ەۋروپارلامەنت دەپۋتاتى:

– ەۋرووداقتىڭ كەڭەيۋى بۇرىنعىداي ناقتى ەرەجەلەرگە، دەموكراتيالىق قاعيدالارعا، قۇقىق ۇستەمدىگىنە جانە وداقتىڭ نەگىزگى قۇندىلىقتارىن قورعاۋعا نەگىزدەلۋى كەرەك. ەگەر جاڭا ەلدەرگە باقىلاۋ كۇشەيتىلەتىن بولسا، بۇرىنعى مۇشەلەرگە دە ءدال سونداي تالاپتار قويىلسىن.

ەندى ەۋروكوميسسيا ۇسىنىسىن ەۋرووداق ەلدەرى قولداۋى كەرەك. بۇل ماسەلە 15-16 قازاندا مەملەكەت باسشىلارىنىڭ قاتىسۋىمەن وتەتىن سامميتتە تالقىلانادى. ال 28 قازاندا بريۋسسەل ۇيىمعا كىرۋگە ۇمىتكەر: چەرنوگوريا، البانيا، مولدوۆا جانە ۋكراينانىڭ ەۋرووداققا قوسىلۋ جولىنداعى كەلەسى قادامدارىن ايقىندايتىن جەكە جوسپارلارىن تانىستىرادى.

اۆتورى: عالىمجان قارامانۇلى

Abai.kz