قۇرىلتاي تىڭداۋلارىنا دايىندىق اياسىندا 5-10 قازان ارالىعىندا ازاماتتار مەن ساراپشىلار ءوز جوبالارى مەن ۇسىنىستارىن قۇرىلتايدىڭ رەسمي quryltai.kz سايتى ارقىلى جولداي الادى.

قۇرىلتاي IT مەن جاساندى ينتەللەكت سالاسى ماماندارىن جەلتوقسان ايىندا وتەتىن تسيفرلاندىرۋ جانە جاساندى ينتەللەكت ماسەلەلەرى جونىندەگى قۇرىلتاي تىڭداۋىنىڭ دايىندىق جۇمىستارىنا قاتىسۋعا شاقىرادى. وسى جۇمىس اياسىندا ەلىمىزدىڭ تسيفرلىق ترانسفورماتسيا الەۋەتىن ارتتىرۋعا مۇمكىندىك بەرەتىن ناقتى جوبالار مەن ۇسىنىستاردى تالقىلاۋ جوسپارلانىپ وتىر.

بۇل تۋرالى قۇرىلتايدىڭ تسيفرلاندىرۋ، يننوۆاتسيالار جانە عىلىم كوميتەتىنىڭ توراعاسى دارحان احمەديەۆ بەينەۇندەۋىندە مالىمدەدى.

«تسيفرلاندىرۋدىڭ ناتيجەسى ناقتى بولۋى كەرەك. ءوندىرىستىڭ ءوسۋى، شىعىنداردىڭ تومەندەۋى، كاسىپورىندار كىرىسىنىڭ ارتۋى جانە ەكسپورتتىق مۇمكىندىكتەردىڭ كەڭەيۋى ءۇشىن ناقتى جوبالار قاجەت. الداعى تىڭداۋدا وسى ماسەلەلەردى انىقتاپ قانا قويماي، ولاردى شەشۋدىڭ ناقتى جولدارىن ۇسىنۋعا تىرىسامىز»، – دەدى كوميتەت توراعاسى.

ونىڭ ايتۋىنشا، تىڭداۋدىڭ باستى ماقساتى – تسيفرلاندىرۋ دەڭگەيىن باعالاۋمەن شەكتەلمەي، ەكونوميكانىڭ ناقتى سەكتورلارىنداعى وزەكتى ماسەلەلەردى شەشۋگە مۇمكىندىك بەرەتىن تەحنولوگيالار مەن ءتيىمدى تەتىكتەردى ايقىنداۋ.

وسى باعىتتا بيزنەس وكىلدەرى، عالىمدار، IT ماماندار جانە سالالىق ساراپشىلاردان قۇرالعان جۇمىس توپتارى قۇرىلىپ، ءار سالاداعى وزەكتى ماسەلەلەردى زەردەلەيدى.

سونىمەن قاتار كاسىپورىنداردىڭ ءوز كۇشىمەن ىسكە اسىرا الاتىن جوبالارى، مەملەكەتتىك قولداۋدى قاجەت ەتەتىن باعىتتار جانە زاڭناماعا وزگەرىستەر ەنگىزۋدى تالاپ ەتەتىن ماسەلەلەر سارالانادى. ءتيىستى سالادا تاجىريبەسى بار شەتەلدەگى وتانداستار دا بۇل جۇمىسقا قاتىسا الادى.

قۇرىلتاي تىڭداۋلارىنا دايىندىق اياسىندا 5-10 قازان ارالىعىندا ازاماتتار مەن ساراپشىلار ءوز جوبالارى مەن ۇسىنىستارىن قۇرىلتايدىڭ رەسمي quryltai.kz سايتى ارقىلى جولداي الادى. ول ءۇشىن سايتتىڭ باستى بەتىندەگى ءتيىستى باننەردى باسىپ، قاجەتتى باعىت بويىنشا جۇمىس توبىن تاڭداۋ قاجەت. 11 قازاننان باستاپ كەلىپ تۇسكەن ۇسىنىستار جۇمىس توپتارىنىڭ قاتىسۋىمەن قارالىپ، ءتيىستى باعىتتار بويىنشا جۇيەلەنەدى.

تىڭداۋ مەملەكەت باسشىسى جاريالاعان «تسيفرلاندىرۋ جانە جاساندى ينتەللەكت جىلى» اياسىندا وتكىزىلەدى. بيىل مەملەكەت باسشىسى 2029 جىلعا دەيىنگى Digital Qazaqstan تسيفرلاندىرۋدى اۋقىمدى تۇردە جۇزەگە اسىرۋ جانە جاساندى ينتەللەكت تەحنولوگيالارىن جاپپاي ەنگىزۋدىڭ جالپىۇلتتىق ستراتەگياسىن بەكىتتى. قۇجات جاساندى ينتەللەكتىنى ەكونوميكا سالالارىنا ەنگىزۋگە، ءوندىرىس پەن باسقا دا نەگىزگى سەكتورلاردى جاڭعىرتۋعا باعىتتالعان.

قۇرىلتاي تىڭداۋى وسى ستراتەگيالىق مىندەتتەردى ەكونوميكانىڭ ناقتى سەكتورلارىنداعى جوبالار مەن پراكتيكالىق ۇسىنىستارعا اينالدىرۋعا مۇمكىندىك بەرەدى. سونىمەن قاتار ەلىمىزدە «جاساندى ينتەللەكت تۋرالى» العاشقى زاڭنىڭ كۇشىنە ەنۋى بۇل باستامالاردىڭ زاڭنامالىق نەگىزىن نىعايتىپ، تەحنولوگيالاردى قاۋىپسىز ءارى ءتيىمدى قولدانۋعا تىڭ سەرپىن بەرمەك.

Abai.kz