رەسپۋبليكا كۇنى قارساڭىندا جەتىسۋ وبلىسىنىڭ اۋىلدىق ەلدى مەكەنىندە تاعى ءبىر جاڭا سپورت كەشەنى اشىلدى. الاكول اۋدانىنىڭ قابانباي اۋىلىنداعى بۇل كەشەندە 300-گە جۋىق ءجاسوسپىرىم سپورتپەن قامتىلىپ وتىر. وسىلايشا، وبلىس قۇرىلعاننان بەرى 40 جاڭا سپورت نىسانى پايدالانۋعا بەرىلدى.

سپورت كەشەنەنىڭ سالتاناتتى اشىلۋىنا قاتىسقان وبلىستىق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى ەركەبۇلان دۋاناەۆ وڭىردە، اسىرەسە اۋىلدىق جەردە سپورت ينفراقۇرىلىمىن دامىتۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى. مەملەكەت باسشىسىنىڭ بۇقارالىق سپورتتى دامىتۋ جانە قولجەتىمدى سپورت ينفراقۇرىلىمىن قالىپتاستىرۋ جونىندەگى تاپسىرمالارىن ىسكە اسىرۋ اياسىندا وڭىردە اتقارىلىپ جاتقان جۇيەلى جۇمىستارعا توقتالىپ، اۋىل تۇرعىندارىن قۋانىشتارىمەن قۇتتىقتادى.

اتاپ وتسەك، سپورت كەشەنىنىڭ قۇرىلىسى وتكەن جىلدىڭ ساۋىرىندە باستالعان بولاتىن. نىساننىڭ جالپى اۋدانى - 2076,2 شارشى مەتر. نىساندا ءتورت زال - ويىن زالى، بوكس، كۇرەس جانە جاتتىعۋ زالدارى قاراستىرىلعان. مۇندا سپورتتىڭ باسكەتبول، ۆولەيبول، فۋتبول، بوكس، دزيۋدو، ۇستەل تەننيسى، جەڭىل اتلەتيكا تۇرلەرىمەن اينالىسۋعا جاعداي جاسالعان. كەشەندە ءبىر مەزگىلدە 80 بالا سپورتپەن شۇعىلدانا الادى.

(سۋرەت:https://www.gov.kz)

جەرگىلىكتى جاتتىقتىرۋشىلار بۇل نىسان بالالاردىڭ سپورتتىق جاتتىعۋلارىنىڭ اۋقىمىن كەڭەيتۋگە مۇمكىندىك بەرەتىنىن ايتادى.

- بۇگىن - اۋىل بالالارى ءۇشىن ەرەكشە قۋانىشتى كۇن. ەندى زاماناۋي سپورت كەشەنىندە جاتتىعۋلاردى قولايلى جاعدايدا ساپالى وتكىزە الامىز. بۇل بالالاردىڭ سپورتپەن تۇراقتى اينالىسۋىنا جانە ءوز قابىلەتتەرىن شىڭداۋىنا جول اشادى. مۇندا اۋداندىق، وبلىستىق جانە رەسپۋبليكالىق جارىستاردا جەڭىسكە جەتەتىن بولاشاق چەمپيوندار تاربيەلەنەتىنىنە سەنىمدىمىن، - دەدى جەڭىل اتلەتيكادان جاتتىقتىرۋشى المات يماشەۆ.

قابانباي اۋىلىنىڭ تۇرعىندارى دا جاڭا سپورت كەشەنىنىڭ اشىلعانىنا ريزا.

- اۋىلىمىششدا وسىنداي سپورت كەشەنىنىڭ اشىلۋىن كوپتەن كۇتتىك. ەندى بالالاردىڭ سپورتپەن اينالىسۋىنا، بوس ۋاقىتىن ءتيىمدى وتكىزۋىنە مۇمكىندىك مولايادى. تۇراقتى جاتتىعۋلار بالالاردىڭ دەنساۋلىعىن نىعايتىپ، مىنەزىن شىڭداۋعا، تاباندىلىققا، جاۋاپكەرشىلىككە، قيىندىقتاردى ەڭسەرۋگە ۇيرەتەدى. اۋىلىمىزدا وسىنداي ماڭىزدى باستامالاردىڭ جۇزەگە اسىرىلىپ جاتقانىنا ريزامىز، – دەيدى اۋىل تۇرعىنى قانات قوجابەكوۆ.

بالالاردىڭ وزدەرى دە قۋانىشتارىن جاسىرمادى.

- مەن ۆولەيبول ويناعاندى جاقسى كورەمىن. بولاشاقتا وسى سپورت تۇرىمەن كاسىبي تۇردە اينالىسقىم كەلەدى. ەندى وسى جاڭا زالدا ۇلكەن جارىستارعا دايىندالۋعا بىزدە بارلىق مۇمكىندىك جاسالعان، - دەيدى جاس سپورتشى امينا قابي.

- مەنىڭ كۇرەسكە قاتىسىپ جۇرگەنىمە ەكى جىل بولدى. بىزگە وسىنداي جاڭا سپورت كەشەنىن سالىپ بەرگەنىنە قۋانىشتىمىز. مۇندا كۇرەسكە قاجەتتى بارلىق جابدىقتار بار. وسىندا تۇراقتى جاتتىعىپ، بولاشاقتا چەمپيون بولامىز دەپ سەندىرەمىن – دەدى سانجار بەرىك.

جالپى، بۇگىندە وبلىستا 1 146 سپورت نىسانى جۇمىس ىستەيدى. اتاپ وتسەك، وبلىس حالقىنىڭ سپورت ينفراقۇرىلىمىمەن قامتاماسىز ەتىلۋ دەڭگەيى 70,5%-عا جەتىپ، رەسپۋبليكالىق ورتاشا كورسەتكىشتەن استى. وسى جىلدىڭ سوڭىنا دەيىن بۇل كورسەتكىشتى 71,4%-عا دەيىن جەتكىزۋ جوسپارلانۋدا. اتاپ وتسەك،  وبلىس قۇرىلعاننان بەرى وڭىردە 40 جاڭا سپورت نىسانى پايدالانۋعا بەرىلسە، سونىڭ ىشىندە الاكول اۋدانىندا 7 سپورت نىسانى ىسكە قوسىلدى، بۇل رەتتە 2 كۇرەس زالى جەرگىلىكتى ينۆەستورلاردىڭ قارجىسىنا سالىنعان. جاڭا نىسانداردىڭ قاتارىندا لەپسى اۋىلىنداعى 240 ورىندى جاتاقحاناسى بار 160 ورىندى كوپفۋنكتسيونالدى سپورت كەشەنىن اتاپ وتۋگە بولادى.

Abai.kz