7 قازان - دۇنيەجۇزىلىك لايىقتى ەڭبەك كۇنىنە وراي استانا قالاسىنداعى «Alem-ai» جاساندى ينتەللەكت حالىقارالىق ورتالىعىندا «تسيفرلىق ەڭبەك جانە جاساندى ينتەللەكت» اتتى اۋقىمدى حالىقارالىق فورۋم ءوز جۇمىسىن اياقتادى.

ەكى كۇنگە سوزىلعان حالىقارالىق جيىن مەملەكەت باسشىسى قاسىم-جومارت توقاەۆتىڭ باستاماسىمەن جاريالانعان تسيفرلاندىرۋ جانە جاساندى ينتەللەكت جىلىنا, سونداي-اق 10 قازان – كاسىپوداقتار كۇنىنە ورايلاستىرىپ ۇيىمداستىرىلدى. شارانى حالىقارالىق ەڭبەك ۇيىمىنىڭ (حەۇ) قولداۋىمەن قازاقستان رەسپۋبليكاسى كاسىپوداقتار فەدەراتسياسى وتكىزدى.

فورۋم جۇمىسىنا قازاقستاننىڭ مەملەكەتتىك ورگاندارىنىڭ وكىلدەرى، حالىقارالىق ەڭبەك ۇيىمى، حالىقارالىق كاسىپوداقتار كونفەدەراتسياسى، شەتەلدىك كاسىپوداق بىرلەستىكتەرى، وتاندىق جانە حالىقارالىق IT-كومپانيالاردىڭ باسشىلارى، عالىمدار مەن ساراپشىلار قاتىستى.

پرەزيدەنت قاسىم-جومارت توقاەۆ قازاقستاندى تولىققاندى تسيفرلىق مەملەكەتكە اينالدىرۋ مىندەتىن قويدى. بۇگىندە «Digital Qazaqstan» ستراتەگياسى ەلدىڭ تسيفرلىق دامۋىنىڭ نەگىزىن قۇرايدى. ساراپشىلاردىڭ مالىمەتىنشە، قازاقستاندا 4,1 ميلليون ادام جاساندى ينتەللەكت ىقپالىمەن وزگەرەتىن كاسىپتەردە ەڭبەك ەتۋدە. وسىعان بايلانىستى تەحنولوگيا يگىلىگى جۇمىسكەرلەرگە لايىقتى ەڭبەكاقى، قاۋىپسىز جۇمىس جاعدايلارى، قايتا دايارلاۋ جانە كاسىبي دامۋ مۇمكىندىكتەرى ارقىلى جەتۋى ءتيىس.       فورۋمنىڭ رەسمي ءبولىمىن اشقان قركف توراعاسى ساتىبالدى داۋلەتالين تسيفرلىق جاڭعىرۋ كەزەڭىندە ەڭبەك ادامىنىڭ مۇددەسىن قورعاۋدىڭ ماڭىزدىلىعىن اتاپ ءوتتى.

«پرەزيدەنت قاسىم-جومارت توقاەۆتىڭ باستاماسىمەن 2026 جىل تسيفرلاندىرۋ جانە جاساندى ينتەللەكت جىلى بولىپ جاريالاندى. ەل الدىنا ەكونوميكانى، مەملەكەتتىك باسقارۋدى جانە قوعامدىق ءومىردى تسيفرلىق ترانسفورماتسيالاۋ مىندەتى قويىلدى. ءبىز بۇل رەفورمالاردى قولدايمىز. كاسىپوداقتاردىڭ مىندەتى – تسيفرلىق ترانسفورماتسيانىڭ ورتاسىندا ەڭبەك ادامى قالۋىن قامتاماسىز ەتۋ. نەگىزگى ماسەلە – جاڭا ەڭبەك الەمىندە ادامعا قانداي ورىن بەرىلەتىنىندە»، – دەدى س. داۋلەتالين.       جيىن بارىسىندا قر ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەربول تۇياقباەۆ ەڭبەك نارىعىنىڭ تسيفرلىق ينفراقۇرىلىمىن دامىتۋ جانە جۇمىسكەرلەردىڭ جاڭا داعدىلاردى مەڭگەرۋى جونىندەگى مەملەكەتتىك تاسىلدەردى باياندادى. ءوز كەزەگىندە «PARYZ» قر ۇلتتىق جۇمىس بەرۋشىلەر كونفەدەراتسياسىنىڭ باسقارما توراعاسى قانىبەك جاڭبىرباەۆ وندىرىسكە زاماناۋي تەحنولوگيالاردى ەنگىزۋ مەملەكەت، جۇمىس بەرۋشىلەر مەن كاسىپوداقتاردىڭ تۇراقتى ارىپتەستىگىن تالاپ ەتەتىندىگىنە نازار اۋداردى.

فورۋمنىڭ باستى ناتيجەسى – تسيفرلىق ەڭبەك جانە جاساندى ينتەللەكت تۋرالى استانا ۇشجاقتى دەكلاراتسياسىنا قول قويىلۋى جانە كاسىپوداقتاردىڭ تسيفرلىق حارتياسىنىڭ قابىلدانۋى بولدى. ۇشجاقتى دەكلاراتسياعا قركف توراعاسى ساتىبالدى داۋلەتالين, ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى

ەربول تۇياقباەۆ جانە «PARYZ» كونفەدەراتسياسىنىڭ باسقارما توراعاسى قانىبەك جاڭبىرباەۆ قول قويدى.

دەكلاراتسياعا سايكەس:

تسيفرلىق تەحنولوگيالار ەڭبەك كەپىلدىكتەرىن تومەندەتپەي، ونىمدىلىك پەن قاۋىپسىزدىكتى ارتتىرۋى ءتيىس;

جۇمىسكەرلەر ءوز ەڭبەگىنە قاتىستى جاساندى ينتەللەكت قابىلداعان شەشىمدەر تۋرالى ۋاقتىلى اقپارات الۋعا، ولاردىڭ تۇسىندىرمەسىن سۇراۋعا جانە ادامنىڭ قايتا قاراۋىن تالاپ ەتۋگە قۇقىلى; تاراپتار جۇمىسكەرلەردى وقىتۋ مەن قايتا دايارلاۋدى، پلاتفورمالىق ەڭبەكتەگى قۇقىقتاردى قورعاۋدى جانە تسيفرلاندىرۋدىڭ سالدارىن ۇجىمدىق كەلىسسوزدەر ارقىلى قاراۋدى مىندەتىنە الادى. سونىمەن قاتار فورۋم قورىتىندىسى بويىنشا ەڭبەكشىلەردىڭ تسيفرلىق قۇقىقتارىن قورعاۋدىڭ نەگىزگى قاعيداتتارىن ايقىندايتىن كاسىپوداقتاردىڭ تسيفرلىق حارتياسى قابىلداندى. دوكۋمەنتتە الگوريتمدەردىڭ اشىقتىعى، دەربەس دەرەكتەردى قورعاۋ، كاسىبي قايتا وقىتۋ جانە ونلاين-پلاتفورمالاردا جۇمىس ىستەيتىندەردى الەۋمەتتىك قامسىزداندىرۋ ماسەلەلەرى ناقتى كورىنىس تاپتى.     فورۋم اياسىندا ءۇش ارنايى باعىت بويىنشا ساراپشىلىق ۇسىنىستار ازىرلەندى:

الگوريتمدىك باسقارۋ جانە جۇمىسكەرلەر قۇقىعى: جي شەشىمدەرىنىڭ اشىقتىعى، ادامنىڭ باقىلاۋى جانە شاعىمدانۋ قۇقىعى; اۆتوماتتاندىرۋ جانە ءادىل كوشۋ: قايتا وقىتۋ، جۇمىس ورىندارىن ساقتاۋ جانە تەحنولوگيالىق وزگەرىستەردىڭ الەۋمەتتىك سالدارىن باسقارۋ;

پلاتفورمالىق ەكونوميكا جانە جۇمىسپەن قامتۋدىڭ جاڭا نىساندارى: ونلاين-پلاتفورمالارداعى ەڭبەك كەپىلدىكتەرى مەن ۇجىمدىق قورعاۋ تەتىكتەرى.

قركف ءوز تاراپىنان تسيفرلىق جاڭعىرۋ جول كارتاسىن ۇسىندى. كەلىسىمدەردى جۇزەگە اسىرۋ ماقساتىندا تسيفرلىق ەڭبەك جانە جي جونىندەگى رەسپۋبليكالىق ۇشجاقتى پلاتفورما مەن جۇمىس توپتارىن قۇرۋ، سونداي-اق مونيتورينگ جۇيەسىن ەنگىزۋ تۋرالى ۋاعدالاستىققا قول جەتكىزىلدى.

جيىنعا قاتىسۋشىلار كەز كەلگەن تەحنولوگيالىق دامۋدىڭ باستى كورسەتكىشى - ادامنىڭ ءومىر ءسۇرۋ ساپاسى مەن ەڭبەك جاعدايىن جاقسارتۋ بولۋى ءتيىس دەگەن ورتاق مامىلەگە كەلدى.

Abai.kz