مەملەكەتتىك ناگرادالار «ءشامشى قالداياقوۆ» مەدالى مەن «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعىمەن تولىعادى. ماراپات وتان­دىق مادەنيەت پەن ونەردىڭ دامۋىنا ەلەۋلى ۇلەس قوسقان ازاماتتاردىڭ ەڭبەگىن جوعارى دەڭگەيدە باعالاۋ ءارى ولاردى ىنتالاندىرۋ ماقساتىندا بەرىلمەك.

مەملەكەت باسشىسى قاسىم-جومارت توقاەۆ ءبىرىنشى شاقىرىلىمداعى قۇ­رىل­تايدىڭ العاشقى سەسسياسىنىڭ اشىلۋىندا مۋزىكا جانە بەينەلەۋ ونەرىن دامىتۋعا ەلەۋلى ۇلەس قوسقان ازاماتتارعا ارنالعان ناگرادالاردى ەنگىزۋ، ونىڭ زاڭنامالىق نەگىزىن قالىپتاستىرۋدى تاپسىردى. وسى اپتادا دەپۋتاتتار «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا تۇزەتۋلەر ەنگىزىپ، وتىرىستىڭ قاراۋىنا ۇسىندى. كوپتىڭ قول­داۋىمەن قۇجات ءبىرىنشى وقىلىمدا ما­قۇلداندى.

قۇجاتقا سايكەس مەملەكەتتىك ناگرادالار قاتارىنا «ءشامشى قالداياقوۆ» مەدالى مەن «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعى ەنگىزىلەدى. كۇلاش بايسەيىتوۆا اتىنداعى قازاق ۇلت­تىق ونەر ۋنيۆەرسيتەتىنىڭ رەكتورى عالىم احمەدياروۆ بۇل باستامانىڭ ۇلتتىق مۋزىكا ونەرىنىڭ دامۋىنا سەرپىن بەرىپ، وسى سالادا ەڭبەك ەتىپ جۇرگەن مامانداردىڭ كاسىبي قىزمەتىن باعالاۋعا جاڭاشا جول اشاتىنىن اتاپ ءوتتى.

– ساز الەمىندە وزىندىك قولتاڭباسىن قالدىرعان سىرشىل كومپوزيتور ءشامشى قالداياقوۆ اتىنداعى مەدال ۇلت رۋحانياتىنىڭ ۇلى پەرزەنتىنىڭ مۇ­را­­سىن ۇلىقتاي تۇسەدى. ءارى ونەر مەن ءما­دەنيەتتىڭ وركەندەۋىنە ەلەۋلى ۇلەس قوس­قان ازاماتتاردىڭ ەڭبەگىن مەم­لە­كەت­تىك دەڭگەيدە دارىپتەيدى. بۇل رەتتە تەك ورىنداۋشىلاردىڭ ەمەس، كومپوزيتورلار، ديريجەرلەر، ءان اۆتورلارى، مۋزىكا زەرتتەۋشىلەرى مەن ۇستازداردىڭ ەڭبەگىن دە نازاردان تىس قالدىرماۋ ماڭىزدى. ويتكەنى ۇلتتىق ونەردىڭ دامۋى ساحناداعى جەتىستىكتەرمەن عانا ولشەن­بەيدى. ونىڭ ارتىندا كاسىبي ءبىلىم بەرۋ، ورىنداۋشىلىق ءداستۇردى ساقتاۋ، جاڭا تۋىن­دىلار جاساۋ، جاس تالانتتاردى ءتار­بيە­لەۋ سەكىلدى اۋقىمدى ەڭبەك جاتىر، – دەدى عالىم احمەدياروۆ.

قازاقستاننىڭ ەڭبەك سىڭىرگەن قاي­رات­كەرى، ءانشى ەرلان رىسقالي جاڭا مەدال ۇلتتىق ونەردىڭ دامۋىنا ۇلەس قوس­قان ازاماتتاردىڭ ەڭبەگىن باعالاۋعا ءمۇم­كىن­دىك بەرەتىنىن ايتتى. ونىڭ پايىمىنشا، ماراپاتتىڭ مارتەبەسى ءادىل ىرىكتەۋ مەن ناقتى ەڭبەگى ارقىلى ايقىندالۋعا ءتيىس.

– حالقىمىزدىڭ جۇرەگىنەن ورىن العان بىرەگەي دارىن يەسى ءشامشى قالداياقوۆ ەسىمى مەن مۇراسى – ۇلت مادەنيەتىنىڭ اسىل قازىناسى. مەدال قازاق ونەرىنىڭ دامۋىنا، مادەنيەتىمىزدى ناسيحاتتاۋعا، رۋحاني قۇندىلىقتارىمىزدى دارىپتەۋگە ەلەۋلى ۇلەس قوسقان ازاماتتاردى ىنتالاندىراتىن مارتەبەلى ماراپات بولۋعا ءتيىس. ونىڭ بەدەلى ادىلدىكپەن، ناقتى ولشەمدەرمەن، لايىقتى ەڭبەكپەن ايقىندالۋى قاجەت، – دەدى ەرلان رىسقالي.

ءانشى اقبوتا كەرىمبەكوۆا دا «ءشامشى قالداياقوۆ» مەدالىنىڭ تاعايىندالۋىن ەلىمىزدىڭ ءتول مادەنيەتىنە قىزمەت ەتىپ جۇرگەن ازاماتتاردىڭ ەڭبەگىن باعالاۋعا باعىتتالعان ماڭىزدى قادام دەپ سانايدى. ول مۇنداي ماراپات ونەر ادامدارىنا قولداۋ كورسەتىپ، قازاق ءان ونەرىنىڭ ءداستۇرىن جالعاستىرۋعا ىنتالاندىرادى دەگەن پىكىرىن ءبىلدىردى.

– كەز كەلگەن ماراپات ونەر يەسىنىڭ توككەن تەرىن ەسكەرىپ، شىعارماشىلىعىنا سەرپىن بەرەرى ءسوزسىز. مەنىڭشە، بۇل مەدالدى جاس مولشەرىمەن شەكتەمەي، اعا بۋىنمەن قوسا، ونەر ولكەسىندە وزىندىك قولتاڭباسىن قالىپتاستىرىپ، ايانباي تەر توگىپ جۇرگەن 30-دان اسقان دارىندى جاستارعا دا بەرگەن ابزال. بۇل ولاردىڭ ەڭبەگىن ەل بولىپ باعالاپ، جاڭا بيىكتەرگە جىگەرلەندىرەتىنى ءسوزسىز، – دەدى اقبوتا كەرىمبەكوۆا.

بەينەلەۋ ونەرى سالاسىندا دا جو­عارى كاسىبي شەبەرلىك تانىتىپ، ءۇز­دىك تۋىندىلارىمەن وتاندىق كور­كەم مادەنيەتتى دامىتۋعا ەلەۋلى ۇلەس قو­سىپ جۇرگەن قايراتكەرلەرىمىز از ەمەس. سۋرەتشىلەر جانە ديزاي­نەرلەر وداقتارىنىڭ مۇشەسى، كور­كەم­سۋرەت اكادەمياسىنىڭ اكادەميگى تىلەۋجان باتانوۆ ەل ىشىندە عىلىمي دا، شى­عارماشىلىق تا ەڭبەگى ەرەن، بىراق تاسادا قالىپ قويعان مايتالمانداردىڭ بارىن ايتىپ، بۇل ماراپاتتار وسىنداي ناعىز ونەر يەلەرىنە بەرىلسە دەيدى.

– ءتول ونەرىمىزدى ورگە سۇيرەپ جۇرگەن تۇل­عا­لاردىڭ ەڭبەگىن مەملەكەتتىك دەڭگەي­دە باعالاۋ شىعارماشىل ازاماتتارعا قانات بىتىرەدى. قىرىق جىلدان استام تاجىريبەسى بار مۇعالىم ءارى سۋرەتشى رە­تىن­دە ايتارىم، عالامتور مەن زاماناۋي تەحنولوگيالاردىڭ مۇمكىندىگىن ءتيىمدى پايدالانىپ، كوپشىلىككە بەيمالىم، بىراق مادەنيەتىمىزدىڭ دامۋىنا ولشەۋسىز ۇلەس قوسقان مايتالمانداردى ماراپاتتاپ، كەڭىنەن تانىتۋىمىز قاجەت. وسىلايشا، ءبىز اعا بۋىنعا قۇرمەت كورسەتىپ، كەيىنگى جاس­تاردىڭ بويىنا ونەرگە دەگەن قۇل­شى­نى­سىن وياتامىز، – دەدى قىلقالام شەبەرى.

كوركەمسۋرەت اكادەمياسىنىڭ اكادەميگى، سۋرەتشىلەر وداعى، حا­لىقارالىق ەۋرازيا ديزاينەرلەر ودا­عى­نىڭ مۇشەسى ءماجيت بايتەنوۆ تە وسى ويدى قۋاتتايدى. جارتى عاسىرعا جۋىق ۇستازدىق ەتىپ، جاستاردى ساۋلەت پەن سۋرەت ونەرىنە باۋلىپ كەلە جاتقان ارداگەر بۇل ماراپات ءىزىمىزدى باسقان دارىندى جاستاردىڭ بويىندا سەرپىن وياتىپ، كەلەشەككە سەنىممەن قاراۋىنا جول اشادى دەپ وتىر.

– ماراپات پەن مەملەكەتتىك باعا – قىلقالام شەبەرىنىڭ جىلدار بويى توككەن ماڭداي تەرىن ەلەپ، شىعارماشىلىعىنا دەم بەرەتىن ۇلى كۇش. كەزىندە كەڭەس وداعى تۇسىندا دا، تاۋەلسىزدىك جىلدارىن­دا دا ەلىمىز بەن شەتەلدە تالاي كورمە وتكىزىپ، وتاندىق ونەردى ورگە سۇيرەگەن اعا بۋىننىڭ ەڭبەگى وراسان. دەسە دە، ولاردىڭ اراسىندا ءالى كۇنگە دەيىن لايىقتى باعاسىن الا الماي جۇرگەن اقساقالدارىمىز از ەمەس. وسىنداي باستامالار ارقىلى ونەر مايتالماندارىنىڭ ەڭبەگىن دەر كەزىندە ەلەپ-ەسكەرۋ – مادەنيەتكە كورسەتىلگەن ءىلتيپات، – دەدى ءماجيت بايتەنوۆ.

ونەرگە كورسەتىلگەن قۇرمەت – ۇلت رۋحى مەن جاسامپازدىعىنا كورسەتىلگەن قۇرمەت. تالانتتى تۇلعالاردىڭ ەڭبەگىن لايىقتى باعالاۋ – وتكەنگە تاعزىم ەتىپ، كەيىنگى بۋىنعا ۇلگى كورسەتۋدىڭ جولى. سۋرەتشىلەر وداعىنىڭ مۇشەسى، كەسكىندەمەشى جايىق ەلەسۇلى جاڭا قۇرمەتتى اتاققا ۇمىتكەرلەردىڭ كاسىبي شەبەرلىگى مەن شىعارماشىلىق ەڭبەگىنە باسا ءمان بەرۋ قاجەتتىگىن ايتادى.

– بەينەلەۋ ونەرىندە شەبەرلىكتى شىڭداۋدىڭ شەگى جوق. سۋرەتشى ءومىر بويى ىزدەنىپ، جىل وتكەن سايىن تاجىريبەسىن مولايتىپ، قولتاڭباسىن قالىپتاستىرادى. بۇل اتاققا ونەر جولىندا ۇزاق جىل ەڭبەك ەتىپ، وزىندىك ءستيلىن تاپقان، تۋىندىلارى جوعارى دەڭگەيدە ورىندالاتىن كاسىبي ماماندار لايىق دەپ ويلايمىن. ولاردىڭ شىعارماشىلىعى جاس سۋرەتشىلەرگە ۇلگى بولىپ، بەينەلەۋ ونەرىنىڭ ساپاسى مەن تالابىن ارتتىرۋعا ىقپال ەتەدى، – دەدى جايىق ەلەسۇلى.

ۇلت ونەرىنىڭ ءورىسى كەڭەيىپ، رۋحانيات­تىڭ تامىرى تەرەڭدەۋى ءۇشىن تالانتتى تۇلعالاردىڭ مۇراسى مەن ونەگەلى جو­لى ءاردايىم نازاردا بولۋى كەرەك. جاڭا ناگرادالار وسى باعىتتاعى يگى باس­تا­ما­لار­دىڭ بىرىنە اينالىپ، ۇلتتىق مادە­نيەت­تىڭ قادىرىن ارتتىرىپ، ونەرگە ادال قىز­مەت ەتۋدىڭ بەدەلىن بيىكتەتە تۇسەدى دەگەن سەنىم بار.

دەرەككوزى: egemen.kz

Abai.kz