سونىمەن، بۇگىن پرەزيدەنت قاسىم-جومارت توقاەۆ ۇكىمەت جانە قۇرىلتاي توراعالارىن جيىپ، كەڭەس وتكىزدى. تالقىلانعان باستى ماسەلە – ءماسليحاتتاردىڭ وكىلەتتىگى.

پرەزيدەنت بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ ماسەلەسىن تالقىعا سالدى.

كونستيتۋتسيانىڭ 9-شى ءبولىمى «جەرگىلىكتى مەملەكەتتىك جانە ءوزىن-ءوزى باسقارۋ» دەپ اتالادى. سول ءبولىمنىڭ 88 بابىنىڭ 5-ءشى تارماعىندا: «ءماسليحاتتاردىڭ وكىلەتتىگىن قر پرەزيدەنتى پرەمەر-مينيسترمەن جانە قۇرىلتاي توراعاسىمەن كونسۋلتاتسيا (كەڭەس) جۇرگىزگەننەن كەيىن مەرزىمىنەن بۇرىن توقتاتادى»، - دەپ انىق جازىلعان.

پرەزيدەنت بۇگىن سول باپقا، سول تارماققا سۇيەندى. ولجاس بەكتەنوۆ تە، ايبەك دادەباي دا ءبىراۋىزدى بولدى. ءسويتىپ، پرەزيدەنت كونستيتۋتسيانىڭ نەگىزگى ەرەجەلەرىنە تولىق سايكەس جانە ايتىلعان پىكىرلەردى ەسكەرە وتىرىپ، تۇپكىلىكتى شەشىم قابىلدايتىنىن ايتتى.

جالپى ءماسليحاتتاردىڭ وكىلەتتىگىن توقتاتۋعا نەگىز كوپ. سولاردىڭ ەڭ باستىسى – دەپۋتاتتىق كورپۋستاعى ەلەۋلى وزگەرىستەر ء(بىر پالاتالى جۇيەگە كوشۋ جانە حالىق كەڭەسىنىڭ قۇرىلۋى) جانە پارتيالاردىڭ رەبرەندينگى (امانات پارتياسىنىڭ ادىلەت پارتياسىنا قوسىلۋى).

پرەزيدەنت ءماسليحاتتار سايلاۋىن وتكىزۋ كەرەكتىگى تۋرالى قىركۇيەك ايىندا ايتقان ەدى: «قازىرگى كەزەڭدە ءبىز جەرگىلىكتى وكىلدى ورگانداردىڭ، ياعني ءماسليحاتتاردىڭ سايلاۋىن وتكىزۋىمىز قاجەت. ءماسليحات دەپۋتاتتارىنىڭ وكىلەتتىگى كونستيتۋتسيادا جانە ءتيىستى زاڭداردا ايقىندالعان مەرزىمگە دەيىن ساقتالادى. دەگەنمەن ولاردىڭ كوپشىلىگى «Amanat» پارتياسىنىڭ اتىنان سايلاندى. بۇگىندە بۇل ساياسي ۇيىم «ادىلەت» پارتياسىنا قوسىلىپ، ءوز قىزمەتىن توقتاتتى. جاقىندا ءتيىستى زاڭنامالىق راسىمدەر اياقتالادى. سول كەزدە ءماسليحات دەپۋتاتتارىنىڭ باسىم بولىگىنىڭ قىزمەتىنىڭ زاڭدىلىعىنا قاتىستى ماسەلە تۋىندايدى»، - دەگەن بولاتىن.

شىن مانىندە، مەملەكەتتىك باسقارۋ جۇيەسى زامان تالابىنا ساي جاڭارتىلىپ وتىرۋى قالىپتى قۇبىلىس. ءماسليحاتتار – كۇشكە يە. ولار ايماقتاعى جۇرتشىلىقتىڭ مۇددەسىن قورعاۋشىلار. جەرگىلىكتى بيۋدجەتتەردى بەكىتەتىن دە – ءماسليحاتتار. ءبىر سوزبەن ايتقاندا، ايماقتاردىڭ تىنىس-تىرشىلىگىنە، قالالاردى، اۋىل-اۋدانداردى دامىتۋ ىسىنە تىكەلەي جاۋاپتىلار. سوندىقتان دا، بىزگە بۇل وكىلەتتى ورگاننىڭ زاڭعا ساي جۇمىس ىستەۋى، كاسىبي بولۋى جانە جۇمىسكەر بولۋى ماڭىزدى.

Abai.kz