قارجىلىق مونيتورينگ اگەنتتىگى سوتتالعان پەريزات قايراتتىڭ تۋىستارىنىڭ دۋبايداعى پاتەرلەرى تۋرالى اقپاراتتى تەكسەردى. ۆەدومستۆو بۇل جىلجىمايتىن مۇلىكتىڭ ۇرلانعان قاراجاتقا قاتىسى بارىن انىقتامادى، دەپ حابارلايدى Ulysmedia.kz.

قارجىلىق مونيتورينگ تۋىستارىنىڭ دۋبايدا بىرنەشە پاتەرى بار دەگەن اقپارات جاريالاعان ءانونيمدى Telegram-ارنانىڭ جازباسىنا قاتىستى پىكىر ءبىلدىردى.

تەرگەۋ نەنى انىقتادى؟

اگەنتتىكتىڭ مالىمەتىنشە، اتالعان جىلجىمايتىن مۇلىك 2011-2019 جىلدارى ساتىپ الىنعان. ال قايرات قايىرىمدىلىققا جينالعان قاراجاتتى جىمقىرۋ ءۇشىن پايدالانعان Biz Birgemiz Qazaqstan 2030 قورى كەيىن قۇرىلعان.

تەرگەۋ سوتتالعان پەريزات قايرات پەن ۆەدومستۆو تۋىستارىن «ا. وتباسى» دەپ اتاعان ادامدار اراسىندا قارجىلىق ەسەپ ايىرىسۋلار بولماعانىن انىقتادى.

ا. وتباسىنىڭ ەرلى-زايىپتىلارى 20 جىلدان استام ۋاقىت بويى جىلجىمايتىن مۇلىك ساتىپ الىپ، قايتا ساتىپ كەلەدى. ولار پەريزات قايرات پەن ونىڭ اناسىنان بولەك تۇرىپ، جەكە كاسىپكەرلىكپەن اينالىسقان.

قما مۇلىكتى بۇعاتتاۋ مەن تاركىلەۋگە ونىڭ قىلمىستىق جولمەن الىنعانىن دالەلدەيتىن ايعاقتار بولعان جاعدايدا عانا جول بەرىلەتىنىن اتاپ ءوتتى.

– كۇدىكتىلەرمەن تۋىستىق قاتىناستىڭ بولۋى وزدىگىنەن قىلمىستىق قۋدالاۋعا جانە اكتيۆتەردى تاركىلەۋگە زاڭدى نەگىز بولا المايدى، – دەپ ءتۇسىندىردى ۆەدومستۆو.

پەريزات قايرات اقشانى قايدا جۇمساعان؟

تەرگەۋ بارىسىندا قايراتتىڭ جىمقىرىلعان قايىرىمدىلىق قاراجاتىن قالاي جۇمساعانى تولىق انىقتالدى. اقشاعا كولىكتەر، جوندەۋ جۇمىستارى مەن جيھازدارى بار پاتەرلەر، برەندتىك كيىمدەر مەن اشەكەي بۇيىمدار ساتىپ الىنعان. سونداي-اق قاراجات بيزنەس-كلاسپەن ۇشۋعا، قىمبات قوناقۇيلەر مەن مەيرامحانالارعا جۇمسالعان.

ەسكە سالايىق، 2025 جىلدىڭ شىلدەسىندە استانا سوتى پەريزات قايراتتى 10 جىلعا، ال اناسى عايني الاشباەۆانى 7 جىلعا باس بوستاندىعىنان ايىردى. ەكەۋى دە الاياقتىق جانە قىلمىستىق جولمەن الىنعان اقشانى جىلىستاتۋ باپتارى بويىنشا كىنالى دەپ تانىلدى.

ولار Biz Birgemiz Qazaqstan 2030 قورى ارقىلى 3,5 ملرد تەڭگەدەن استام قاراجاتتى جىمقىرعان. اقشا سۋ تاسقىنىنان زارداپ شەككەندەرگە، پالەستينا تۇرعىندارىنا جانە وڭالتۋعا مۇقتاج بالالارعا كومەك كورسەتۋ ءۇشىن جينالعان. الايدا قايىرىمدىلىق قاراجاتى جەكە قاجەتتىلىكتەرىنە جۇمسالعان.

بۇعان دەيىن قما سوتتالعانداردىڭ مۇلكىن اۋكتسيون ارقىلى ساتاتىنىن حابارلاعان. ساۋداعا ءتورت پاتەر، ءتورت اۆتوكولىك، اشەكەي بۇيىمدار مەن برەندتىك زاتتار قويىلادى. ولاردى ساتۋدان تۇسكەن قاراجات زارداپ شەككەندەرگە كەلتىرىلگەن شىعىندى وتەۋگە باعىتتالادى.

Abai.kz